જાણો ભારતના મુખ્ય ચૂંટણી કમિશનર અમિત શાહના પગે લાગ્યા હોવાના નામે વાયરલ થઈ રહેલા વીડિયોનું શું છે સત્ય…

તાજેતરમાં સોશિયલ મીડિયા પર અમિત શાહને પગે લાગી રહેલા ભારતના મુખ્ય ચૂંટણી કમિશનર જ્ઞાનેશ કુમારનો એક વીડિયો વાયરલ થઈ રહ્યો છે જેની સાથે એવો દાવો કરવામાં આવી રહ્યો છે કે, ભારતના મુખ્ય ચૂંટણી કમિશનર અમિત શાહના પગે લાગ્યા તેનો આ વીડિયો છે. પરંતુ ફેક્ટ ક્રેસેન્ડોની પડતાલમાં આ દાવો ખોટો અને પાયાવિહોણો સાબિત થાય છે કારણ કે, પોસ્ટમાં ભારતના મુખ્ય ચૂંટણી કમિશનર અમિત શાહના પગે લાગ્યા હોવાનો જે વીડિયો મૂકવામાં આવ્યો છે એ વાસ્તવિક નહીં પરંતુ AI ટેકનોલોજી દ્વારા બનાવવામાં આવેલો એડિટેડ વીડિયો છે. આ વીડિયો સોશિયલ મીડિયા પર ખોટી માહિતી સાથે લોકોને ગેરમાર્ગે દોરવા વાયરલ કરવામાં આવી રહ્યો છે.

શું દાવો કરવામાં આવી રહ્યો છે.?

એક સોશિયલ મીડિયા યુઝર દ્વારા 16 નવેમ્બર, 2025ના રોજ એક પોસ્ટ શેર કરવામાં આવી હતી. પોસ્ટમાં મૂકવામાં આવેલા વીડિયોના શીર્ષકમાં એવું લખવામાં આવ્યું છે કે, મુખ્ય ચુનાવ આયોગ જ્ઞાનેશકુમાર અમિત શાહને પગે લાગતા વિડીયો જુઓ દોસ્તો. આ લખાણમાં એવો દાવો કરવામાં આવી રહ્યો છે કે, ભારતના મુખ્ય ચૂંટણી કમિશનર અમિત શાહના પગે લાગ્યા તેનો આ વીડિયો છે.

Facebook Post | Archive

FACT CHECK

ઉપરોક્ત પોસ્ટમાં કરવામાં આવેલા દાવાની સત્યતા તપાસવી જરૂરી જણાતાં અમે અમારી પડતાલ/તપાસ કાર્યવાહી શરૂ કરી હતી. તપાસની શરૂઆતમાં અમે પોસ્ટમાં મૂકવામાં આવેલા વીડિયોને ધ્યાનથી જોયા બાદ વીડિયોનો એક સ્ક્રીનશોટ લઈ ગૂગલ રિવર્સ ઈમેજ દ્વારા સર્ચ કરતાં પોસ્ટમાં મૂકવામાં આવેલા આ જ વીડિયો વાયરલ વીડિયો જેવો જ એક ફોટો “કન્ટેન્ટ ગાર્ડન” વેબસાઇટના સમાચાર વિભાગમાં જોવા મળ્યો. ફોટો સાથેની માહિતી અનુસાર, 8 નવેમ્બર, 2023ના રોજ નવી દિલ્હીમાં સહકારી સંસ્થાઓ દ્વારા ઓર્ગેનિક ઉત્પાદનોને પ્રોત્સાહન આપવા પર એક રાષ્ટ્રીય સેમિનાર યોજાયો હતો. આ કાર્યક્રમમાં અમિત શાહનું જ્ઞાનેશ કુમાર દ્વારા સન્માન કરવામાં આવ્યું હતું.

તમે નીચેના સ્ક્રીનશોટમાં આ ઇવેન્ટના અન્ય ફોટા જોઈ શકો છો:

કૃષિ જાગરણ નામની યુટ્યુબ ચેનલે 9 નવેમ્બર, 2023ના રોજ આ કાર્યક્રમનો સંપૂર્ણ વીડિયો અપલોડ કર્યો હતો. આ વીડિયોમાં 00:38 મિનિટે અમિત શાહ દીવો પ્રગટાવે છે અને જ્ઞાનેશ કુમારના હાથે એવોર્ડ સ્વીકારવાનો આગ્રહ કરે છે.

ઉપલબ્ધ ફોટા અને વીડિયોમાં ક્યાંય પણ જ્ઞાનેશ કુમાર અમિત શાહના પગે લાગતા હોય એવું દેખાતું નથી.

નોંધનીય છે કે, આ કાર્યક્રમ દરમિયાન જ્ઞાનેશ કુમાર સહકાર મંત્રાલયમાં સચિવ તરીકે સેવા આપી રહ્યા હતા. તેમણે 19 ફેબ્રુઆરી, 2025ના રોજ મુખ્ય ચૂંટણી કમિશનરનું પદ સંભાળ્યું હતું. જે તમે અહીં અને અહીં જોઈ શકો છો. 

પરિણામ

આમ, અમારી પડતાલમાં ઉપરોક્ત પોસ્ટમાં કરવામાં આવેલો દાવો ખોટો હોવાનું સાબિત થાય છે કારણ કે, પોસ્ટમાં ભારતના મુખ્ય ચૂંટણી કમિશનર અમિત શાહના પગે લાગ્યા હોવાનો જે વીડિયો મૂકવામાં આવ્યો છે એ વાસ્તવિક નહીં પરંતુ AI ટેકનોલોજી દ્વારા બનાવવામાં આવેલો એડિટેડ વીડિયો છે. આ વીડિયો સોશિયલ મીડિયા પર ખોટી માહિતી સાથે લોકોને ગેરમાર્ગે દોરવા વાયરલ કરવામાં આવી રહ્યો છે. 

(જો તમારી પાસે પણ સોશિયલ મીડિયાના માધ્યમથી કોઈ શંકાસ્પદ મેસેજ, પોસ્ટ, ફોટો અને વીડિયો અથવા સમાચાર હોય, તો તેની સત્યતા જાણવા માટે તમે અમને અમારા વોટ્સઅપ ફેક્ટલાઈન નંબર (9049053770) પર મોકલો. અમારા લેટેસ્ટ ફેક્ટ ચેક વાંચવા માટે Facebook, Instagram અને Twitter પર Fact Crescendoને ફોલો કરો)