જાણો તાજેતરમાં મક્કાથી મદીના જઈ રહેલી બસના અકસ્માતના નામે વાયરલ વીડિયોનું શું છે સત્ય….

તાજેતરમાં સોશિયલ મીડિયા પર બ્રિજ પર થયેલા ભયાનક ટેન્કર બ્લાસ્ટનો એક વીડિયો વાયરલ થઈ રહ્યો છે. આ વીડિયો સાથેના લખાણમાં એવો દાવો કરવામાં આવી રહ્યો છે કે, તાજેતરમાં મક્કાથી મદીના જઈ રહેલી શ્રદ્ધાળુઓની બસ ટેન્કર સાથે ટકરાતાં અકસ્માત સર્જાયો હતો તેનો આ વીડિયો છે. પરંતુ ફેક્ટ ક્રેસેન્ડોની પડતાલમાં આ દાવો ખોટો હોવાનું સાબિત થાય છે કારણ કે, પોસ્ટમાં બ્રિજ પર થયેલા ભયાનક ટેન્કર બ્લાસ્ટનો જે વીડિયો મૂકવામાં આવ્યો છે એ વર્ષ 2017માં સાઉદી અરબમાં બનેલી ઘટનાનો છે. આ વીડિયોને હાલની પરિસ્થિતિ સાથે કોઈ જ સંબંધ નથી. આ વીડિયો સોશિયલ મીડિયા પર ભ્રામક અને ખોટી માહિતી સાથે લોકોને ગેરમાર્ગે દોરવા વાયરલ કરવામાં આવી રહ્યો છે.

શું દાવો કરવામાં આવી રહ્યો છે…?

એક સોશિયલ મીડિયા યુઝર દ્વારા 17 નવેમ્બર, 2025ના રોજ એક પોસ્ટ શેર કરવામાં આવી હતી. પોસ્ટમાં મૂકવામાં આવેલા વીડિયો સાથેના શીર્ષકમાં એવું લખવામાં આવ્યું છે કે, સાઉદી અરેબિયા માં મક્કા થી મદીના જતી શ્રધ્ધાળુઓ ની બસ નું અકસ્માત ડિઝલ ભરેલા ટેન્કર સાથે થતાં ભયાનક આગ લાગી હતી જેમાં ભારતીય 42 શ્રધ્ધાળુઓ ના મોત ની આશંકા. પોસ્ટમાં મૂકવામાં આવેલા વીડિયો સાથેના લખાણમાં એવો દાવો કરવામાં આવી રહ્યો છે કે, તાજેતરમાં મક્કાથી મદીના જઈ રહેલી શ્રદ્ધાળુઓની બસ ટેન્કર સાથે ટકરાતાં અકસ્માત સર્જાયો હતો તેનો આ વીડિયો છે.

Facebook Post | Archive

FACT CHECK

ઉપરોક્ત પોસ્ટમાં કરવામાં આવેલા દાવાની સત્યતા તપાસવી જરૂરી જણાતાં અમે અમારી પડતાલ/તપાસ કાર્યવાહી શરૂ કરી હતી. સૌપ્રથમ અમે પોસ્ટમાં મૂકવામાં આવેલા આ જ વીડિયોનો એક સ્ક્રીનશોટ લઈ ગુગલ રિવર્સ ઈમેજનો લઈ સર્ચ કરતાં અમને પોસ્ટમાં મૂકવામાં આવેલો આ જ વીડિયો Fahad Alhazmi દ્વારા તેના યુટ્યુબ પર 24 જૂન, 2017ના રોજ અપલોડ કરવામાં આવ્યો હોવાની માહિતી પ્રાપ્ત થઈ હતી. જેમાં એવી માહિતી આપવામાં આવી હતી કે, અકાબા શાર 1 માં ઇંધણ ટેન્કર પલટી ગયું, ડ્રાઇવરનું બળીને મોત. જેના પરથી એ સ્પષ્ટ સાબિત થાય છે કે, આ વીડિયો તાજેતરનો નહીં પરંતુ વર્ષ 2017નો છે.

અમારી વધુ તપાસમાં અમને આ જ વીડિયો અને માહિતી સાથેના સમાચાર alarabiya.net દ્વારા પણ 24 જૂન, 2017ના રોજ પ્રસારિત કરવામાં આવ્યા હતા.

પોસ્ટમાં મૂકવામાં આવેલો આ જ વીડિયો સાથેના સમાચાર almowaten.net દ્વારા પણ વર્ષ 2017માં પ્રસારિત કરવામાં આવ્યા હતા.

પરિણામ

આમ, અમારી પડતાલમાં ઉપરોક્ત પોસ્ટમાં કરવામાં આવેલો દાવો ભ્રામક હોવાનું સાબિત થાય છે કારણ કે, પોસ્ટમાં બ્રિજ પર થયેલા ભયાનક ટેન્કર બ્લાસ્ટનો જે વીડિયો મૂકવામાં આવ્યો છે એ વર્ષ 2017માં સાઉદી અરબમાં બનેલી ઘટનાનો છે. આ વીડિયોને હાલની પરિસ્થિતિ સાથે કોઈ જ સંબંધ નથી. આ વીડિયો સોશિયલ મીડિયા પર ભ્રામક અને ખોટી માહિતી સાથે લોકોને ગેરમાર્ગે દોરવા વાયરલ કરવામાં આવી રહ્યો છે.

(જો તમારી પાસે પણ સોશિયલ મીડિયાના માધ્યમથી કોઈ શંકાસ્પદ મેસેજ, પોસ્ટ, ફોટો અને વીડિયો અથવા સમાચાર હોય, તો તેની સત્યતા જાણવા માટે તમે અમને અમારા વોટ્સઅપ ફેક્ટલાઈન નંબર (9049053770) પર મોકલો. અમારા લેટેસ્ટ ફેક્ટ ચેક વાંચવા માટે Facebook, Instagram અને Twitter પર Fact Crescendoને ફોલો કરો.)