જીમ ટ્રેનિંગનો વિડિયો સાંપ્રદાયિક એંગલથી વાયરલ થઈ રહ્યો… જાણો શું છે સત્ય….

હાલમાં એક વિડિયો સોશિયલ મીડિયા પર ખૂબ જ વાયરલ થઈ રહ્યો છે. વિડિયોમાં એક જીમ ટ્રેનર મહિલાને ટ્રેનિંગ આપી રહ્યો છે અને આ પરિસ્થિતીનો લાભ ઉઠાવી રહ્યો છે. આ વિડિયોને શેર કરીને દાવો કરવામાં આવી રહ્યો છે કે, “મુસ્લિમ જીમ ટ્રેનર દ્વારા હિન્દુ છોકરીને ટ્રેનિંગ આપતી વખતે આ પ્રકારની હરકત કરવામાં આવી રહી છે.”

ફેક્ટ ક્રેસન્ડોની પડતાલમાં આ દાવો ખોટો સાબિત થયો છે. કારણ કે, પોસ્ટ સાથે શેર કરવામાં આવેલો વિડિયો ભારતનો નહિં પરંતુ ત્રિનિદાદ અને ટોબેગોનો છે. તેમજ વિડિયોમાં જોવા મળતા પુરૂષ અને સ્ત્રી બંને પતી અને પત્ની છે.

શું દાવો કરવામાં આવી રહ્યો છે.?

મહેશ પટેલ નામના ફેસબુક યુઝર દ્વારા તારીખ 08 ડિસેમ્બર 2021ના એક પોસ્ટ શેર કરવામાં આવી હતી. આ પોસ્ટમાં દાવો કરવામાં આવ્યો હતો કે, “મુસ્લિમ જીમ ટ્રેનર દ્વારા હિન્દુ છોકરીને ટ્રેનિંગ આપતી વખતે આ પ્રકારની હરકત કરવામાં આવી રહી છે.”

Facebook | Fb post Archive | Fb video archive

FACT CHECK

ઉપરોક્ત પોસ્ટમાં કરવામાં આવેલા દાવાની સત્યતા તપાસવી જરૂરી જણાતા અમે અમારી પડતાલ/તપાસ કાર્યવાહી શરૂ કરી હતી. સૌપ્રથમ અમે પોસ્ટ સાથે શેર કરવામાં આવેલા વિડિયોનો સ્ક્રિન શોટ લઈ અને ગૂગલ રિવર્સ ઈમેજના માધ્યમથી સર્ચ કરતા અમને ઘણા પરિણામો પ્રાપ્ત થયા હતા. 

ઉપરોક્ત પરિણામો પરથી અમને યુક્રેનની વેબસાઈટનો વર્ષ 2017નો એક અહેવાલ પ્રાપ્ત થયો હતો. જેમાં આ વિડિયો અપલોડ કરવામાં આવ્યો હતો. 

તેમજ વધુ સર્ચ કરતા અમને ઈનસ્ટાગ્રામ પર 22 જૂન 2017ના આ વિડિયો પ્રાપ્ત થયો હતો. ઈનસ્ટાગ્રામ યુઝર બોડી બાય ઈમરાન દ્વારા આ વિડિયો અપલોડ કરવામાં આવ્યો હતો.

View this post on Instagram

A post shared by Imran Razac Wbff Pro (@bodybyimran)

Archive

તેમજ આ પોસ્ટમાં ત્રિનિદાદ અને ટોબેગોના દક્ષિણ ત્રિનિદાદ ટાપુના પ્રિન્સેસ ટાઉનને ટેગ કરવામાં આવ્યુ હતુ. તેમજ પોસ્ટની નીચેના ભાગમાં વાંચવામાં આવી રહ્યુ છે કે: ટ્રેનર્સ તેમના ગ્રાહકોને કેવી રીતે શોધે છે… #fitcouple #husband and #wife.

તેમજ વધુ કી વર્ડ સાથે સર્ચ કરતા અમને ફેસબુક પર બોડી બાય ઈમરાન નામનું પેજ પ્રાપ્ત થયુ હતુ. જે એકાઉન્ટ ઈમરાન રઝાક દ્વારા સંચાલિત છે. જે ત્રિનિદાદ અને ટોબેગોના પોર્ટ ઓફ સ્પેનમાં ફિટનેસ કોચ છે. 

તેમજ અમારી પડતાલને વધુ મજબૂત કરવા અમે ઈમરાનનો સંપર્ક સાધ્યો હતો. તેમણે અમને જણાવ્યુ હતુ કે, “આ વિડિયો આ પહેલા પણ ખોટા દાવા સાથે વાયરલ થઈ રહ્યો હતો. વિડિયોમાં જોવા મળતી મહિલા મારી પત્ની છે. તેનું નામ રેશમા છે. આ વિડિયો ખોટા દાવા સાથે વાયરલ કરવામાં આવી રહ્યો છે.”

ગત વર્ષે પણ આ જ વિડિયો સોશિયલ મિડિયામાં ખૂબ વાયરલ થયો હતો. જેમાં પણ આ જ પ્રકારે દાવો કરવામાં આવ્યો હતો.

પરિણામ

આમ, અમારી પડતાલમાં ઉપરોક્ત પોસ્ટ ખોટી સાબિત થાય છે. કારણ કે, પોસ્ટ સાથે શેર કરવામાં આવેલો વિડિયો ભારતનો નહિં પરંતુ ત્રિનિદાદ અને ટોબેગોનો છે. તેમજ વિડિયોમાં જોવા મળતા પુરૂષ અને સ્ત્રી બંને પતી અને પત્ની છે.