તાજેતરમાં સોશિયલ મીડિયા પર દાહોદ રેલવે સ્ટેશનનો એક વીડિયો વાયરલ થઈ રહ્યો છે જેની સાથે એવો દાવો કરવામાં આવી રહ્યો છે કે, દાહોદ રેલવે સ્ટેશન પરથી 2 આતંકવાદી પકડાયા તેનો આ વીડિયો છે. પરંતુ ફેક્ટ ક્રેસેન્ડોની પડતાલમાં આ દાવો ખોટો હોવાનું સાબિત થાય છે. કારણ કે પોસ્ટમાં મૂકવામાં આવેલો વીડિયો દાહોદ રેલવે સ્ટેશન પર રેલવે પોલીસ દ્વારા કરવામાં આવેલી મોકડ્રીલનો છે. આ વીડિયોને ખોટી માહિતી સાથે લોકોને ગેરમાર્ગે દોરવા સોશિયલ મીડિયા પર વાયરલ કરવામાં આવી રહ્યો છે.
શું દાવો કરવામાં આવી રહ્યો છે.?
DTV News DAHOD નામના ફેસબુક પેજ દ્વારા 1 એપ્રિલ, 2021 ના રોજ એક પોસ્ટ શેર કરવામાં આવી હતી. પોસ્ટમાં મૂકવામાં આવેલા વીડિયોના શીર્ષકમાં એવું લખવામાં આવ્યું છે કે, દાહોદના રેલ્વે સ્ટેશનમાં ભરાઈ ગયા 2 આંતકવાદીઓ પછી રેલ્વે પોલીસે એમને કેવી રીતે ચાલકીથી દબોચી લીધા જુઓ સમગ્ર મામલો. 🧑🏻💻 Twitter:- #dtvnewsdahod #dtvnewsdahod #dahodcity #terrorist. પોસ્ટમાં મૂકવામાં આવેલા વીડિયો સાથેના લખાણમાં એવો દાવો કરવામાં આવી રહ્યો છે કે, દાહોદ રેલવે સ્ટેશન પરથી 2 આતંકવાદી પકડાયા તેનો આ વીડિયો છે.
Facebook Post | Archive | Video Archive
FACT CHECK
ઉપરોક્ત પોસ્ટમાં કરવામાં આવેલા દાવાની સત્યતા તપાસવી જરૂરી જણાતાં અમે અમારી પડતાલ/તપાસ કાર્યવાહી શરૂ કરી હતી. તપાસની શરૂઆતમાં અમે ગુગલનો સહારો લઈને જુદા-જુદા કીવર્ડથી સર્ચ કરતાં અમને public.app નામની વેબસાઈટ પર પોસ્ટમાં મૂકવામાં આવેલા આજ વીડિયો સાથેના સમાચાર પ્રાપ્ત થયા હતા. જેની સાથે એવી માહિતી આપવામાં આવી હતી કે, દાહોદ રેલવે સ્ટેશન પર રેલવે પોલીસ દ્વારા એક મોકડ્રીલનું આયોજન કરવામાં આવ્યું હતું તેનો આ વીડિયો છે.
અમારી તપાસને વધુ મજબૂત બનાવવા માટે અમે દાહોદ ખાતે સંદેશ ન્યૂઝ ચેનલના પત્રકાર હેમલભાઈનો સંપર્ક કરતાં તેઓએ અમને જમાવ્યું હતું કે, “દાહોદ રેલવે સ્ટેશન પર રેલવે પોલીસ દ્વારા કરવામાં આવેલી મોકડ્રીલનો આ વીડિયો છે. હકીકતમાં કોઈ જ આતંકવાદી પકડાયા નથી. લોકોએ આવી ખોટી અફવાઓથી દૂર રહેવું જોઈએ.”
વધુમાં તેઓએ અમને આ મોકડ્રીલના અન્ય વીડિયો પણ મોકલી આપ્યા હતા. જે તમે નીચે જોઈ શકો છો.
ત્યાર બાદ અમે દાહોદ રેલવે સ્ટેશન પર રેલવે પોલીસનો સંપર્ક કરતાં ફરજ પરના અધિકારી દ્વારા પણ આ વીડિયો એક મોકડ્રીલનો હોવાનું અમને જણાવવામાં આવ્યું હતું.
પરિણામ
આમ, અમારી પડતાલમાં ઉપરોક્ત પોસ્ટમાં કરવામાં આવેલો દાવો ખોટો અને પાયાવિહોણો હોવાનું સાબિત થાય છે કારણ કે, પોસ્ટમાં મૂકવામાં આવેલો વીડિયો દાહોદ રેલવે સ્ટેશન પર રેલવે પોલીસ દ્વારા કરવામાં આવેલી મોકડ્રીલનો છે જેને હકીકત સાથે કોઈ જ સંબંધ નથી.
