જાણો વલસાડની DPS સ્કૂલના નામે વાયરલ થઈ રહેલા વીડિયોનું શું છે સત્ય…

તાજેતરમાં સોશિયલ મીડિયા પર એક બાળકીને માર મારી રહેલા યુવકનો વીડિયો વાયરલ થઈ રહ્યો છે જેની સાથે એવો દાવો કરવામાં આવી રહ્યો છે કે, તાજેતરમાં વલસાડની DPS સ્કૂલમાં બનેલી ઘટનાનો આ વીડિયો છે. પરંતુ ફેક્ટ ક્રેસેન્ડોની પડતાલમાં આ દાવો ખોટો અને પાયાવિહોણો હોવાનું સાબિત થાય છે કારણ કે, પોસ્ટમાં બાળકીને માર મારી રહેલા યુવકનો જે વીડિયો મૂકવામાં આવ્યો છે એ વર્ષ 2014માં ઈજિપ્ત ખાતે બનેલી ઘટનાનો છે. આ વીડિયોને ગુજરાતના વલસાડની DPS સ્કૂલ સાથે કોઈ જ સંબંધ નથી. આ વીડિયો સોશિયલ મીડિયા પર ખોટી માહિતી સાથે લોકોને ગેરમાર્ગે દોરવા વાયરલ કરવામાં આવી રહ્યો છે.

શું દાવો કરવામાં આવી રહ્યો છે.?

એક સોશિયલ મીડિયા યુઝર દ્વારા 6 ઓગસ્ટ, 2025ના રોજ એક પોસ્ટ શેર કરવામાં આવી હતી. પોસ્ટમાં મૂકવામાં આવેલા વીડિયોના શીર્ષકમાં  લખવામાં આવ્યું છે કે, आप के whatsapp पे जितने भी नंबर एवं ग्रुप हैं एक भी छूटने नही चाहिए, ये वीडियो सबको भेजिए ये वलसाड के DPS SCHOOL Rajbag. આ વીડિયો સાથેના લખાણમાં એવો દાવો કરવામાં આવી રહ્યો છે કે, તાજેતરમાં વલસાડની DPS સ્કૂલમાં બનેલી ઘટનાનો આ વીડિયો છે.

Facebook Post | Archive

FACT CHECK

ઉપરોક્ત પોસ્ટમાં કરવામાં આવેલા દાવાની સત્યતા તપાસવી જરૂરી જણાતાં અમે અમારી પડતાલ/તપાસ કાર્યવાહી શરૂ કરી હતી. તપાસની શરૂઆતમાં અમે પોસ્ટમાં મૂકવામાં આવેલા વડિયોનો એક સ્ક્રીનશોટ લઈ ગુગલ રિવર્સ ઈમેજનો સહારો લઈને સર્ચ કરતાં અમને પોસ્ટમાં મૂકવામાં આવેલા આજ વીડિયો સાથેના સમાચાર egyptianstreets.com દ્વારા 3 ઓગસ્ટ, 2014ના રોજ પ્રસારિત કરવામાં આવ્યા હોવાની માહિતી પ્રાપ્ત થઈ હતી. જેની સાથે એવી માહિતી આપવામાં આવી હતી કે, આ વીડિયો ઇજિપ્તના એક અનાથાશ્રમનો છે જ્યાં મેનેજર બાળકોને મારતો દેખાય છે. આ વ્યક્તિનું નામ ઓસામા મોહમ્મદ ઓથમાન છે. એવું કહેવામાં આવી રહ્યું છે કે, આ વીડિયો તે વ્યક્તિની પત્નીએ રેકોર્ડ કર્યો છે.

ડેઈલી મેલના એક અહેવાલમાં અમને જાણવા મળ્યું હતું કે, જ્યારે આ વીડિયો વાયરલ થયો, ત્યારે ઓસામાએ સ્પષ્ટતા કરી હતી કે, તેણે બાળકોને ખરાબ વર્તન કરતા રોકવા માટે માર માર્યો હતો. ગીઝામાં આવેલા અનાથાશ્રમનું નામ દાર મક્કાહ અલ મોકારામા હોવાનું જાણવા મળ્યું છે. ગીઝા પોલીસે આરોપીની ધરપકડ કરી હતી.

ઉપરોક્ત આ જ માહિતી અને વીડિયો સાથેના અન્ય સમાચાર પણ અમને પ્રાપ્ત થયા હતા. જે તમે અહીં જોઈ શકો છો. time.com | india.com

આ જ વીડિયો અને માહિતી સાથેના સમાચાર હેડલાઈન્સ ટુડે દ્વારા પણ 9 ઓગસ્ટ, 2014ના રોજ તેના સત્તાવાર યુટ્યુબ પર પ્રસારિત કરવામાં આવ્યા હતા.

અમારી તપાસને વધુ મજબૂત બનાવવા માટે અમે ગુજરાતના વલસાડમાં આવેલી DPS સ્કૂલના કાર્યાલયનો સંપર્ક કર્યો હતો. એક્ઝિક્યુટિવ ઓફિસર જેફરી ચેટ્ટીઅરે અમને જણાવ્યું હતું કે, “વલસાડ જિલ્લામાં તેમની એકમાત્ર DPS સ્કૂલ છે. જે જિલ્લાના વાપી શહેરમાં આવેલી છે. વીડિયોમાં દેખાતો વ્યક્તિ ન તો DPS સ્કૂલનો શિક્ષક છે અને ન તો અમારી સ્કૂલમાં આવી કોઈ ઘટના બની છે.”

પરિણામ

આમ, અમારી પડતાલમાં ઉપરોક્ત પોસ્ટમાં કરવામાં આવેલો દાવો અધૂરી માહિતી સાથેનો હોવાનું સાબિત થાય છે કારણ કે, પોસ્ટમાં બાળકીને માર મારી રહેલા યુવકનો જે વીડિયો મૂકવામાં આવ્યો છે એ વર્ષ 2014માં ઈજિપ્ત ખાતે બનેલી ઘટનાનો છે. આ વીડિયોને ગુજરાતના વલસાડની DPS સ્કૂલ સાથે કોઈ જ સંબંધ નથી. આ વીડિયો સોશિયલ મીડિયા પર ખોટી માહિતી સાથે લોકોને ગેરમાર્ગે દોરવા વાયરલ કરવામાં આવી રહ્યો છે. 

(જો તમારી પાસે પણ સોશિયલ મીડિયાના માધ્યમથી કોઈ શંકાસ્પદ મેસેજ, પોસ્ટ, ફોટો અને વીડિયો અથવા સમાચાર હોય, તો તેની સત્યતા જાણવા માટે તમે અમને અમારા વોટ્સઅપ ફેક્ટલાઈન નંબર (9049053770) પર મોકલો. અમારા લેટેસ્ટ ફેક્ટ ચેક વાંચવા માટે Facebook, Instagram અને Twitter પર Fact Crescendoને ફોલો કરો.)