તાજેતરમાં બ્રિટનમાં 24 ઓક્ટોમ્બરે વડાપ્રધાન તરીકે ઋષિ સુનક નક્કી થયા છે ત્યારે સોશિયલ મીડિયા ઋષિ સુનકના કેટલાક વીડિયો અને ફોટા વાયરલ થઈ રહ્યા છે. જેની સાથે એવો દાવો કરવામાં આવી રહ્યો છે કે, બ્રિટનના પ્રધાનમંત્રી બન્યા બાદ ઋષિ સુનકે પૂજા-અર્ચના કરી તેના આ ફોટા છે. પરંતુ ફેક્ટ ક્રેસેન્ડોની પડતાલમાં આ દાવો ખોટો અને પાયાવિહોણો હોવાનું સાબિત થાય છે. કારણ કે, પોસ્ટમાં મૂકવામાં આવેલા ઋષિ સુનકના પૂજા-અર્ચના કરી રહેલા ફોટા તેમના પ્રધાનમંત્રી બન્યા પહેલાં તેઓ 18 ઓગષ્ટ, 2022 ના રોજ તેમની પત્ની અક્ષતા સાથે ઈસ્કોન મંદિરમાં જન્માષ્ટમી પર્વની ઉજવણી માટે ગયા હતા તે સમયના છે. આ ફોટોને સોશિયલ મીડિયા પર ખોટી માહિતી સાથે વાયરલ કરવામાં આવી રહ્યા છે.
શું દાવો કરવામાં આવી રહ્યો છે.?
Rohit R Rupapara નામના ફેસબુક યુઝર દ્વારા 24 ઓક્ટોમ્બર, 2022 ના રોજ એક પોસ્ટ શેર કરવામાં આવી હતી. પોસ્ટમાં મૂકવામાં આવેલા ફોટોના શીર્ષકમાં એવું લખવામાં આવ્યું છે કે, જેણે પોણી દુનિયા ઉપર રાજ કર્યું છે કહેવાતું હતું કે બ્રિટનના રાજમા સૂર્ય નથી આથમતો એવાં દેશ બ્રિટનના વડાપ્રધાન બન્યા પછી પણ આ માણસ મંદિરે જઈને પૂજા કરે છે આ એમના સંસ્કાર છે….. અને આપણે ત્યાં ગોપાલ ઇટાલિયા જેવાં બે કોડીના લુખ્ખાઓ હીંદુ ધર્મનો વિરોધ કરી લોકોને મંદિરે જવાની પણ ના પડી રહ્યાં છે… સંસ્કાર સંસ્કાર મા ફર્ક હોય છે…. પોસ્ટમાં મૂકવામાં આવેલા ફોટો સાથેના લખાણમાં એવો દાવો કરવામાં આવી રહ્યો છે કે, બ્રિટનના પ્રધાનમંત્રી બન્યા બાદ ઋષિ સુનકે પૂજા-અર્ચના કરી તેના આ ફોટા છે.
FACT CHECK
ઉપરોક્ત પોસ્ટમાં કરવામાં આવેલા દાવાની સત્યતા તપાસવી જરૂરી જણાતાં અમે અમારી પડતાલ/તપાસ કાર્યવાહી શરૂ કરી હતી. તપાસની શરૂઆતમાં અમે પોસ્ટમાં મૂકવામાં આવેલા ફોટોને ગુગલ રિવર્સ ઈમેજનો સહારો લઈને સર્ચ કરતાં અમને આજ તક દ્વારા 19 ઓગષ્ટ, 2022 ના રોજ પોસ્ટમાં મૂકવામાં આવેલા આજ ફોટા સાથેના સમાચાર પ્રાપ્ત થયા હતા. જેમાં એવી માહિતી આપવામાં આવી હતી કે, ભારતીય મૂળના બ્રિટનના પ્રધાનમંત્રી પદના ઉમેદવારઋષિ સુનકે તેમની પત્ની સાથે જન્માષ્ટમી પર્વની ઉજવણી નિમિત્તે ઈસ્કોનના રાધાકૃષ્ણ મંદિરની મુલાકાત લીધી હતી.
આજ માહિતી સાથેના અન્ય સમાચાર પણ અમને પ્રાપ્ત થયા હતા. જે તમે અહીં જોઈ શકો છો. navbharattimes.indiatimes.com | aninews.in
અમારી વધુ તપાસમાં અમને આજ ફોટા બ્રિટનના નવા પ્રધાનમંત્રી ઋષિ સુનક દ્વારા પણ 18 ઓગષ્ટ, 2022 ના રોજ આજ ફોટા અને માહિતી સાથે તેમના સત્તાવાર ટ્વિટર પર એક ટ્વિટ કરવામાં આવી હતી.
ઉપરોક્ત તમામ સંશોધન પરથી એ સ્પષ્ટ સાબિત થાય છે કે, પોસ્ટમાં મૂકવામાં આવેલા તમામ ફોટા ષિ સુનકના પ્રધાનમંત્રી બન્યા પહોલાંના છે.
પરિણામ
આમ, અમારી પડતાલમાં ઉપરોક્ત પોસ્ટમાં કરવામાં આવેલો દાવો અધૂરી માહિતી સાથેનો હોવાનું સાબિત થાય છે કારણ કે, પોસ્ટમાં મૂકવામાં આવેલા ઋષિ સુનકના પૂજા-અર્ચના કરી રહેલા ફોટા તેમના પ્રધાનમંત્રી બન્યા પહેલાં તેઓ 18 ઓગષ્ટ, 2022 ના રોજ તેમની પત્ની અક્ષતા સાથે ઈસ્કોન મંદિરમાં જન્માષ્ટમી પર્વની ઉજવણી માટે ગયા હતા તે સમયના છે.
Title:બ્રિટનના પ્રધાનમંત્રી ઋષિ સુનકના જૂના ફોટા ખોટી માહિતી સાથે વાયરલ
Fact Check By: Vikas VyasResult: False
