ભાજપના નેતાઓ દ્વારા શા માટે તિરંગાની જગ્યાએ પાર્ટીનો ધ્વજ ફરકાવવામાં આવ્યો…? જાણો શું છે સત્ય…

તાજેતરમાં સોશિયલ મીડિયા પર ભાજપનો ધ્વજ ફરકાવીને રાષ્ટ્રગાન ગાઈ રહેલા મધ્યપ્રદેશના મુખ્યમંત્રી શિવરાજસિંહ ચૌહાણનો એક વીડિયો વાયરલ થઈ રહ્યો છે. જેની સાથે એવો દાવો કરવામાં આવી રહ્યો છે કે, ભાજપના નેતાઓ દ્વારા રાષ્ટ્રધ્વજની જગ્યાએ પક્ષનો ધ્વજ ફરકાવીને રાષ્ટ્રધ્વજનું અપમાન કરવામાં આવ્યું. પરંતુ ફેક્ટ ક્રેસેન્ડોની પડતાલમાં આ દાવો ખોટો અને પાયાવિહોણો હોવાનું સાબિત થાય છે. કારણ કે, પોસ્ટમાં મૂકવામાં આવેલો વીડિયો મે 2018 માં જ્યારે ભાજપના પંચાયત ચલો અભિયાન દરમિયાન છતરપુરના રાજનગર ખાતે શિવરાજસિંહ ચૌહાણ દ્વારા ભાજપનો ધ્વજ ફરકાવવામાં આવ્યો હતો એ સમયનો છે. આ વીડિયો કોઈ સ્વતંત્રતા દિવસ કે પ્રજાસત્તાક દિવસનો નથી. આ વીડિયોને વર્તમાન પરિસ્થિતિ સાથે કોઈ જ સંબંધ નથી. આ વીડિયોને સોશિયલ મીડિયા પર ખોટી માહિતી સાથે વાયરલ કરવામાં આવી રહ્યો છે.

શું દાવો કરવામાં આવી રહ્યો છે.?

Labhuji Thakor Azad નામના ફેસબુક યુઝર દ્વારા 10 ઓગષ્ટ, 2022 ના રોજ એક પોસ્ટ શેર કરવામાં આવી હતી. પોસ્ટમાં મૂકવામાં આવેલા વીડિયોના શીર્ષકમાં એવું લખવામાં આવ્યું છે કે, ભારત નો નવો તિરંગો આવી ગયો ભકતો બજાવો તાલી આનાથી મોટું તિરાંગાનું અપમાન કરે એ પાર્ટી સવિધાંન બદલી શકેછે જાવો ભકતો જાગો. પોસ્ટમાં મૂકવામાં આવેલા વીડિયો સાથેના લખાણમાં એવો દાવો કરવામાં આવી રહ્યો છે કે, ભાજપના નેતાઓ દ્વારા રાષ્ટ્રધ્વજની જગ્યાએ પક્ષનો ધ્વજ ફરકાવીને રાષ્ટ્રધ્વજનું અપમાન કરવામાં આવ્યું.

Facebook Post | Archive

FACT CHECK

ઉપરોક્ત પોસ્ટમાં કરવામાં આવેલા દાવાની સત્યતા તપાસવી જરૂરી જણાતાં અમે અમારી પડતાલ/તપાસ કાર્યવાહી શરૂ કરી હતી. તપાસની શરૂઆતમાં અમે પોસ્ટમાં મૂકવામાં આવેલા વીડિયોનો એક સ્ક્રીનશોટ લઈને ગુગલ રિવર્સ ઈમેજના સહારે સર્ચ કરતાં અમને patrika.com દ્વારા પોસ્ટમાં મૂકવામાં આવેલા આજ વીડિયો સાથેના સમાચાર 16 મે, 2018 ના રોજ પ્રસારિત કરવામાં આવ્યા હોવાની માહિતી પ્રાપ્ત થઈ હતી. જેની સાથે એવી માહિતી આપવામાં આવી હતી કે, 14 મેના રોજ સીએમ ચૌહાણ ‘ચલો પંચાયત કી ઓર‘ કાર્યક્રમમાં હાજરી આપવા માટે છતરપુરના રાજનગર પંચાયતના ખજુવા ગામમાં પહોંચ્યા હતા. આ કાર્યક્રમ દરમિયાન પક્ષનો ધ્વજ ફરકાવવામાં આવ્યો હતો અને તેની સામે રાષ્ટ્રગીત ગાવામાં આવ્યું હતું. 

આજ વીડિયો અને માહિતી સાથેના સમાચાર અન્ય મીડિયા હાઉસ દ્વારા પણ પ્રસારિત કરવામાં આવ્યા હતા. જે તમે અહીં જોઈ શકો છો. punjabkesari.in | bhopalsamachar.com

જેના પરથી એ સ્પષ્ટ સાબિત થાય છે કે, આ વીડિયો હાલનો નહીં પરંતુ વર્ષ 2018 ના મે મહિનાનો છે. આ વીડિયોને સ્વતંત્રતા દિવસ કે પ્રજાસત્તાક દિવસ સાથે કોઈ જ સંબંધ નથી.

અમારી તપાસને વધુ મજબૂત બનાવવા માટે અમે મધ્યપ્રદેશના છતરપુર જિલ્લાના ભાજપ પ્રમુખ મલ્ખાનસિંહ સાથે વાત કરતાં તેઓએ અમને જમાવ્યું હતું કે, “આ વીડિયો વર્ષ 2018 નો છે. મે મહિનામાં જ્યારે ચલો પંચાયત કી ઓર નામનો એક કાર્યક્રમ ભાજપ દ્વારા ખજુવા ખાતે કરવામાં આવ્યો હતો. ત્યારે આ કાર્યક્રમમાં મુખ્યમંત્રી શિવરાજસિંહ ચૌહાણ દ્વારા ભાજપનો ધ્વજ ફરકાવવામાં આવ્યો હતો. આ વીડિયો હાલનો નહીં પરંતુ વર્ષ 2018 નો છે.” 

પરિણામ

આમ, અમારી પડતાલમાં ઉપરોક્ત પોસ્ટમાં કરવામાં આવેલો દાવો અધૂરી માહિતી સાથેનો હોવાનું સાબિત થાય છે કારણ કે, પોસ્ટમાં મૂકવામાં આવેલો વીડિયો મે 2018 માં જ્યારે ભાજપના પંચાયત ચલો અભિયાન દરમિયાન છતરપુરના રાજનગર ખાતે શિવરાજસિંહ ચૌહાણ દ્વારા ભાજપનો ધ્વજ ફરકાવવામાં આવ્યો હતો એ સમયનો છે. આ વીડિયો કોઈ સ્વતંત્રતા દિવસ કે પ્રજાસત્તાક દિવસનો નથી. આ વીડિયોને વર્તમાન પરિસ્થિતિ સાથે કોઈ જ સંબંધ નથી.