ગુજરાત વિધાનસભાની ચૂંટણી દરમિયાન અલ્પેશ ઠાકોરે કોંગ્રેસ ઉમેદવાર ગેનીબેન ઠાકોર માટે વોટ નથી માંગ્યા…? જાણો શું છે સત્ય….

આ વિડિયો હાલનો નહિં પરંતુ વર્ષ 2017નો છે. 2017ની વિધાનસભાની ચૂંટણી વખતે અલ્પેશ ઠાકોર કોંગ્રેસ સાથે જોડાયેલા હતા.

ગુજરાત વિધાનસભાની ચૂંટણીમાં ભાજપાને બહુમતિ મળી છે. તે વચ્ચે ભાજપા ગાંધીનગર દક્ષિણના ઉમેદવાર અલ્પેશ ઠાકોરનો એક વિડિયો સોશિયલ મિડિયામાં વાયરલ થઈ રહ્યો છ. જે વિડિયોમાં અલ્પેશ ઠાકોર વાવ કોંગ્રેસના ઉમેદવાર ગેનીબેન ઠાકોર માટે લોકોને મત આપવાનું કહી રહ્યા છે. આ વિડિયોને શેર કરીને દાવો કરવામાં આવી રહ્યો છે કે, “કોંગ્રેસના વાવના ઉમેદવાર ગેની બેન ઠાકોર માટે ભાજપાના નેતા અલ્પેશ ઠાકોરે લોકોને મત આપવા વિંનતી કરી.”

શું દાવો કરવામાં આવી રહ્યો છે.?

Lasu Jadav નામના ફેસબુક યુઝર દ્વારા તારીખ 05 ડિસેમ્બર 2022ના એક પોસ્ટ શેર કરવામાં આવી હતી. આ પોસ્ટમાં દાવો કરવામાં આવ્યો હતો કે, “કોંગ્રેસના વાવના ઉમેદવાર ગેની બેન ઠાકોર માટે ભાજપાના નેતા અલ્પેશ ઠાકોરે લોકોને મત આપવા વિંનતી કરી.”

Facebook | Fb post Archive | Fb video archive

FACT CHECK

ઉપરોક્ત પોસ્ટમાં કરવામાં આવેલા દાવાની સત્યતા તપાસવી જરૂરી જણાતા અમે અમારી પડતાલ/તપાસ કાર્યવાહી શરૂ કરી હતી.

સૌપ્રથમ અમે પોસ્ટ સાથે શેર કરવામાં આવેલા વિડિયો અંગે સર્ચ કરતા અમને અલ્પેશ ઠાકોરના ઓફિશિયલ ફેસબુક પેજ પર આ વિડિયો પ્રાપ્ત થયો હતો. જે વિડિયો 12 ડિસેમ્બર 2017ના અપલોડ કરવામાં આવ્યો હતો. 

જે સાથે માહિતી આપવામાં આવી હતી કે, “વાવ વિધાનસભા ના મતદારો ને વિનંતી કરુ ચુ કે આપ ને ત્યાં કોંગ્રેસ પાર્ટી ના ઉમેદવાર ગેનીબેન ઠાકોર ને વોટ આપી ને વિજયી બનાવો.”

તેમજ તમને જણાવી દઈએ કે 18 જૂલાઈ 2019ના અલ્પેશ ઠાકોર વિધિવત રીતે ભાજપામાં જોડાયા હતા. 

તેમજ વર્ષ 2022ની વિધાનસભાની ચૂંટણીમાં અલ્પેશ ઠાકોર ગાંધીનગર દક્ષિણથી ભાજપાની ટિકિટ પર ચૂંટણી લડ્યા હતા અને કોંગ્રેસના ઉમેદવાર હિમાંશુ પટેલને 43 હજાર મતોથી હરાવ્યા હતા અને જીત મેળવી હતી. 

પરિણામ

આમ, અમારી પડતાલમાં ઉપરોક્ત પોસ્ટ ખોટી સાબિત થાય છે. કારણ કે, પોસ્ટ સાથે શેર કરવામાં આવેલો વિડિયો હાલનો નહિં પરંતુ વર્ષ 2017નો છે. હાલમાં અલ્પેશ ઠાકોર દ્વારા આ પ્રકારે કોઈ નિવેદન આપવામાં આવ્યુ નથી.

(જો તમારી પાસે પણ સોશિયલ મિડિયાના માધ્યમથી કોઈ શંકાસ્પદ મેસેજ, પોસ્ટ, ફોટો અને વિડિયો અથવા સમાચાર હોય, તો તેની સત્યતા જાણવા માટે તમે અમને અમારા વોટ્સઅપ ફેક્ટલાઈન નંબર (9049053770) પર મોકલો. અમારા લેટેસ્ટ ફેક્ટ ચેક વાંચવા માટે Facebook, Instagram અને Twitter પર Fact Crescendoને ફોલો કરો.)