તાજેતરમાં સોશિયલ મીડિયા પર કાગડાઓના ટોળાનો એક વીડિયો વાયરલ થઈ રહ્યો છે જેની સાથે એવો દાવો કરવામાં આવી રહ્યો છે કે, ઈઝરાયેલમાં અચાનક જ જોવા મળેલા હજારો કાગડાનો આ વીડિયો છે પરંતુ ફેક્ટ ક્રેસેન્ડોની પડતાલમાં આ દાવો ભ્રામક હોવાનું સાબિત થાય છે કારણ કે, પોસ્ટમાં કાગડાઓા ટોળાનો જે વીડિયો મૂકવામાં આવ્યો છે એ ઈઝરાયેલનો નહીં પરંતુ અમેરિકાના ટેક્સાસનો છે જે વર્ષ 2024થી સોશિયલ મીડિયા પર ઉપલબ્ધ છે. આ વીડિયોને ઈરાન-ઈઝરાયેલ યુદ્ધ કે હાલની પરિસ્થિતિ સાથે કોઈ જ સંબંધ નથી. આ વીડિયો ખોટી માહિતી સાથે સોશિયલ મીડિયા પર લોકોને ગેરમાર્ગે દોરવા વાયરલ કરવામાં આવી રહ્યો છે.
FACT CHECK
ઉપરોક્ત પોસ્ટમાં કરવામાં આવેલા દાવાની સત્યતા તપાસવી જરૂરી જણાતાં અમે અમારી પડતાલ/તપાસ કાર્યવાહી શરૂ કરી હતી. સૌપ્રથમ અમે પોસ્ટમાં મૂકવામાં આવેલા વીડિયોમાંથી સ્ક્રીનશોટ લીધો અને રિવર્સ ઈમેજ સર્ચ કર્યું. જેનાથી અમને એક ઇન્સ્ટાગ્રામ હેન્ડલ મળ્યું જ્યાં વાયરલ વીડિયો 6 જાન્યુઆરી, 2024ના રોજ અપલોડ કરવામાં આવ્યો હતો.
આ જ માહિતી સાથે અન્ય ઈન્સ્ટાગ્રામ યુઝર દ્વારા પણ આ વીડિયો વર્ષ 2024માં અપલોડ કરવામાં આવ્યો હતો. જે તમે અહીં જોઈ શકો છો. Instagram Post 1 | Instagram Post 2
અમારી વધુ તપાસમાં અમને જાણવા મળ્યું કે, આ જ ફૂટેજ જાન્યુઆરી 2024માં પણ YouTube પર અપલોડ કરવામાં આવ્યું હતું. જેના વર્ણનમાં જણાવાયું છે કે, “ટેક્સાસના પાર્કિંગ લોટમાં સેંકડો પક્ષીઓ ઉતર્યા, જેનાથી હોરર ફિલ્મ જેવું દ્રશ્ય બન્યું.”
આ સંકેતોનો ઉપયોગ કરીને, અમે વધુ શોધખોળ હાથ ધરી અને આ ઘટના સંબંધિત ઘણા સમાચાર અહેવાલો મળ્યા. 4 જાન્યુઆરી, 2024ના રોજ ફોક્સ વેધરના એક લેખમાં અહેવાલ આપવામાં આવ્યો હતો કે, “ટેક્સાસના પાર્કિંગ લોટમાં સેંકડો પક્ષીઓ ઉતર્યા, જેનાથી હોરર ફિલ્મ જેવું દ્રશ્ય બન્યું.”
આ દરમિયાન અમે તેલ અવીવમાં કાગડાઓના ટોળાની તાજેતરની ઘટનાઓ તપાસી અને 26 માર્ચ, 2026ના રોજ મિન્ટ અને ધ ફાઇનાન્સિયલ એક્સપ્રેસ દ્વારા પ્રકાશિત મીડિયા અહેવાલો શોધી કાઢ્યા. આ અહેવાલોમાં શહેર પર કાગડાઓના મોટા ટોળા સાથે સંકળાયેલા નાટકીય દ્રશ્યનું વર્ણન કરવામાં આવ્યું છે. જો કે, આ અહેવાલોમાં સમાવિષ્ટ વીડિયોઝ વાયરલ થઈ રહેલા વીડિયોથી સંપૂર્ણપણે અલગ છે.
પરિણામ
આમ, અમારી પડતાલમાં ઉપરોક્ત પોસ્ટમાં કરવામાં આવેલો દાવો ભ્રામક હોવાનું સાબિત થાય છે કારણ કે, પોસ્ટમાં કાગડાઓા ટોળાનો જે વીડિયો મૂકવામાં આવ્યો છે એ ઈઝરાયેલનો નહીં પરંતુ અમેરિકાના ટેક્સાસનો છે જે વર્ષ 2024થી સોશિયલ મીડિયા પર ઉપલબ્ધ છે. આ વીડિયોને ઈરાન-ઈઝરાયેલ યુદ્ધ કે હાલની પરિસ્થિતિ સાથે કોઈ જ સંબંધ નથી. આ વીડિયો ખોટી માહિતી સાથે સોશિયલ મીડિયા પર લોકોને ગેરમાર્ગે દોરવા વાયરલ કરવામાં આવી રહ્યો છે.
(જો તમારી પાસે પણ સોશિયલ મીડિયાના માધ્યમથી કોઈ શંકાસ્પદ મેસેજ, પોસ્ટ, ફોટો અને વીડિયો અથવા સમાચાર હોય, તો તેની સત્યતા જાણવા માટે તમે અમને અમારા વોટ્સઅપ ફેક્ટલાઈન નંબર (9049053770) પર મોકલો. અમારા લેટેસ્ટ ફેક્ટ ચેક વાંચવા માટે Facebook, Instagram અને Twitter પર Fact Crescendoને ફોલો કરો)
Title: જાણો ઈઝરાયેલ ખાતે ઉમટેલા કાગડાઓના નામે વાયરલ વીડિયોનું શું છે સત્ય…
Fact Check By: Vikas Vyas
Result: False
