જાણો વૃદ્ધ માતાને વૃદ્ધાશ્રમમાં મૂકવા આવેલી મહિલાના વાયરલ વીડિયોનું શું છે સત્ય….

તાજેતરમાં સોશિયલ મીડિયા પર વૃદ્ધા અને મહિલાનો એક વીડિયો વાયરલ થઈ રહ્યો છે. આ વીડિયો સાથેના લખાણમાં એવો દાવો કરવામાં આવી રહ્યો છે કે, ઘરમાં માને રાખવાની જગ્યા ન હોવાથી દીકરી તેને વૃદ્ધાશ્રમમાં મૂકી આવી તેનો આ વીડિયો છે. પરંતુ ફેક્ટ ક્રેસેન્ડોની પડતાલમાં આ દાવો ખોટો અને પાયાવિહોણો હોવાનું સાબિત થાય છે કારણ કે, પોસ્ટમાં વૃદ્ધા અને મહિલાનો જે વીડિયો મૂકવામાં આવ્યો છે એ કોઈ વાસ્તવિક ઘટનાનો નહીં પરંતુ કાલ્પનિક રીતે લોકજાગૃતિ માટે બનાવવામાં આવેલો સ્ક્રિપ્ટેડ વીડિયો છે. આ વીડિયોને સોશિયલ મીડિયા પર ભ્રામક અને ખોટી માહિતી સાથે લોકોને ગેરમાર્ગે દોરવા વાયરલ કરવામાં આવી રહ્યો છે.

શું દાવો કરવામાં આવી રહ્યો છે?

એક સોશિયલ મીડિયા યુઝર દ્વારા 8 જાન્યુઆરી, 2026ના રોજ એક પોસ્ટ શેર કરવામાં આવી હતી. પોસ્ટમાં મૂકવામાં આવેલા વીડિયો સાથેના શીર્ષકમાં એવું લખવામાં આવ્યું છે કે, ઘરમાં માં ને રાખવાની જગ્યા નથી એટલે દીકરી માં ને વૃદ્ધાશ્રમ મૂકવા આવી… શું કહેશો તમે આ કળિયુગની દીકરીને..!? કમેન્ટમાં લખો. પોસ્ટમાં મૂકવામાં આવેલા વીડિયો સાથે એવો દાવો કરવામાં આવી રહ્યો છે કે, ઘરમાં માને રાખવાની જગ્યા ન હોવાથી દીકરી તેને વૃદ્ધાશ્રમમાં મૂકી આવી તેનો આ વીડિયો છે.

Facebook Post | Archive

FACT CHECK

ઉપરોક્ત પોસ્ટમાં કરવામાં આવેલા દાવાની સત્યતા તપાસવી જરૂરી જણાતાં અમે અમારી પડતાલ/તપાસ કાર્યવાહી શરૂ કરી હતી. સૌપ્રથમ અમે પોસ્ટમાં મૂકવામાં આવેલા વીડિયોનો એક સ્ક્રીનશોટ લઈ ગુગલ રિવર્સ ઈમેજના માધ્યમથી સર્ચ કરતાં અમને પોસ્ટમાં મૂકવામાં આવેલો આ જ વીડિયો આશિષ વત્સ નામના એક ઈન્સ્ટાગ્રામ યુઝર દ્વારા 23 ડિસેમ્બર, 2025ના રોજ અપલોડ કરવામાં આવ્યો હોવાની માહિતી પ્રાપ્ત થઈ હતી.

આશિષે ડિસેમ્બર 2025માં વાયરલ થયેલા વીડિયો જેવા જ ઘણા વીડિયો શેર કર્યા હતા. વીડિયોમાં એક પુરુષ તેની માતાને લાવનારી મહિલાને કહે છે કે, તેની માતાએ તેનો આટલા વર્ષો સુધી ઉછેર કર્યો છતાં તે તેની સાથે આવું કેમ કરી રહી છે? આનો જવાબ આપતાં સ્ત્રી કહે છે કે, એવું નથી કે તેણે મારા પર કોઈ ઉપકાર કર્યો હોય.

વધુ તપાસમાં અમને આશિષની યુટ્યુબ ચેનલ મળી, જ્યાં તેની યુટ્યુબ ચેનલ પર બીજો સ્ક્રિપ્ટેડ વીડિયો હતો, જેમાં વાયરલ વીડિયોમાં રહેલી એ જ વૃદ્ધ મહિલા અભિનય કરતી જોવા મળે છે. જેના પરથી એ સ્પષ્ટ સાબિત થાય છે કે, વાયરલ વીડિયો સ્ક્રિપ્ટેડ છે.

અમે વાયરલ વીડિયોમાં દેખાતી મહિલા અને ચેનલ પર દેખાતી મહિલાના ફોટાનું વિશ્લેષણ કર્યું. જેમાં રહેલી સમાનતા તમે નીચે જોઈ શકો છો.

પરિણામ

આમ, અમારી પડતાલમાં ઉપરોક્ત પોસ્ટમાં કરવામાં આવેલો દાવો ભ્રામક હોવાનું સાબિત થાય છે કારણ કે, પોસ્ટમાં વૃદ્ધા અને મહિલાનો જે વીડિયો મૂકવામાં આવ્યો છે એ કોઈ વાસ્તવિક ઘટનાનો નહીં પરંતુ કાલ્પનિક રીતે લોકજાગૃતિ માટે બનાવવામાં આવેલો સ્ક્રિપ્ટેડ વીડિયો છે. આ વીડિયોને સોશિયલ મીડિયા પર ભ્રામક અને ખોટી માહિતી સાથે લોકોને ગેરમાર્ગે દોરવા વાયરલ કરવામાં આવી રહ્યો છે.

(જો તમારી પાસે પણ સોશિયલ મીડિયાના માધ્યમથી કોઈ શંકાસ્પદ મેસેજ, પોસ્ટ, ફોટો અને વીડિયો અથવા સમાચાર હોય, તો તેની સત્યતા જાણવા માટે તમે અમને અમારા વોટ્સઅપ ફેક્ટલાઈન નંબર (9049053770)પર મોકલો. અમારા લેટેસ્ટ ફેક્ટ ચેક વાંચવા માટે Facebook, Instagramઅને Twitterપર Fact Crescendoને ફોલો કરો.)