જાણો વરસાદ સાથે પડી રહેલા કરાના વાયરલ વીડિયોનું શું છે સત્ય…

તાજેતરમાં ઠંડીનું જોર વધી રહ્યું છે ત્યારે સોશિયલ મીડિયા પર કરાના વરસાદનો એક વીડિયો વાયરલ થઈ રહ્યો છે જેની સાથે એવો દાવો કરવામાં આવી રહ્યો છે કે, પોસ્ટમાં મૂકવામાં આવેલો વીડિયો તાજેતરમાં ગુજરાતના દાંતા-અંબાજી પંથકમાં પડેલા કરાના વરસાદનો છે. પરંતુ ફેક્ટ ક્રેસેન્ડોની પડતાલમાં આ દાવો ખોટો અને પાયાવિહોણો સાબિત થાય છે કારણ કે, પોસ્ટમાં મૂકવામાં આવેલો વીડિયો ગુજરાતના દાંતા-અંબાજી પંથકનો નહીં પરંતુ નેપાળના ચિતવાન જિલ્લાના ગડૌલી ગામમાં દિવાકર બારતૌલા નામના વ્યક્તિ દ્વારા લેવામાં આવ્યો હતો. લોકોને ગેરમાર્ગે દોરવા માટે વીડિયોને ખોટી માહિતી સાથે સોશિયલ મીડિયા પર વાયરલ કરવામાં આવી રહ્યો છે.

શું દાવો કરવામાં આવી રહ્યો છે.?

Anand Parmar નામના ફેસબુક પેજ દ્વારા 30 જાન્યુઆરી, 2023 ના રોજ એક પોસ્ટ શેર કરવામાં આવી હતી. પોસ્ટમાં મૂકવામાં આવેલા વીડિયોના શીર્ષકમાં એવું લખવામાં આવ્યું છે કે, દાતા અંબાજી માં માથું ફાડી નાખે તેવા કરા પડ્યા….. પોસ્ટમાં મૂકવામાં આવેલા વીડિયો સાથેના લખાણમાં એવો દાવો કરવામાં આવી રહ્યો છે કે, પોસ્ટમાં મૂકવામાં આવેલો વીડિયો તાજેતરમાં ગુજરાતના દાંતા-અંબાજી પંથકમાં પડેલા કરાના વરસાદનો છે.

Facebook Post | Archive

FACT CHECK

ઉપરોક્ત પોસ્ટમાં કરવામાં આવેલા દાવાની સત્યતા તપાસવી જરૂરી જણાતાં અમે અમારી પડતાલ/તપાસ કાર્યવાહી શરૂ કરી હતી. તપાસની શરૂઆતમાં અમે પોસ્ટમાં મૂકવામાં આવેલા વીડિયોને ધ્યાનથી જોયા બાદ અમે ગુગલ રિવર્સ ઈમેજનો સહારો લઈને આ વીડિયોનો એક સ્ક્રીનશોટ લઈને સર્ચ કરતાં પોસ્ટમાં મૂકવામાં આવેલા આજ વીડિયો આજ વીડિયો સાથેના સમાચાર અમને uk.news.yahoo.com નામની એક વેબસાઈટ પર 28 એપ્રિલ, 2020 ના રોજ પ્રસારિત કરવામાં આવ્યા હોવાની માહિતી પ્રાપ્ત થઈ હતી. જેમાં એવી માહિતી આપવામાં આવી હતી કે, નેપાળના ચિતવાનમાં કરાનો વરસાદ થયો હતો તેનો આ વીડિયો છે.

Archive

આજ વીડિયો અન્ય કેટલાક સમાચારમાં પણ પ્રસારિત કરવામાં આવ્યો હતો. જે તમે અહીં જોઈ શકો છો. Dailymotion.com

અમારી વધુ તપાસમાં અમે ઉપરનો વિડિઓ એક ટીકટોક યુઝર દિવાકર બારતૌલા (@diwakarbartaula) દ્વારા 18 એપ્રિલ, 2020 ના રોજ તેના ટીકટોક એકાઉન્ટ પર અપલોડ કરવામાં આવ્યો હોવાની માહિતી પ્રાપ્ત થઈ હતી. જેમાં નેપાળી ભાષામાં કેપ્શનમાં એવું લખવામાં આવ્યું છે કે, પબજી ગેમમાં શૂટિંગની જેમ જ આજે વરસાદ પડ્યો હતો.

Tiktok

અમારી તપાસને વધુ મજબૂત બનાવવા માટે ફેક્ટ ક્રેસેન્ડોએ દિવાકર બારતૌલાના મિત્રો અને સંબંધીઓનો સંપર્ક કરવામાં આવ્યો હતો. તેમણે અમને જણાવ્યું હતું કે, આ વીડિયો દિવાકરે જાતે શૂટ કર્યો હતો. ત્યારબાદ બે દિવસના અથાગ પ્રયત્નો પછી અમે દિવાકર બારતૌલાના સંપર્કમાં આવ્યા હતા. દિવાકરે અમને કહ્યું કે, તેણે જ આ વીડિયો શૂટ કર્યો છે.

વધુમાં દિવાકર બારતૌલાએ ફેક્ટ ક્રેસેન્ડોને જણાવ્યું હતું કે, “મેં આ વીડિયો લીધો છે. હું ગડૌલી ગામનો રહેવાસી છું અને આ વીડિયો મારા મોબાઇલ પર મારા ખેતરમાં 18 એપ્રિલે લેવામાં આવ્યો હતો. અમારા ગામમાં તે દિવસે ભારે વરસાદ પડ્યો હતો.”

પોસ્ટમાં મૂકવામાં આવેલો વીડિયો તેના જ ખેતરનો છે તે સાબિત કરવા માટે, અમે તે પછી તેને ખેતરમાં જઇને જ્યાંથી વીડિયો વાયરલ થયો હતો ત્યાંથી બીજો વીડિયો શૂટ કરવાનું કહ્યું. તે મુજબ તેઓ ત્યાં ગયા અને અમને એક બીજો વીડિયો મોકલ્યો. તે વાયરલ વીડિયોમાં દેખાતા થાંભલા અને ઝાડ સ્પષ્ટ રીતે જોઈ શકાય છે. આટલું જ નહીં, પતરાનું ઘર પણ વીડિયોના અંતમાં જોઈ શકાય છે. આ પતરાઓ પર વરસાદ પડ્યો અને ગોળીબાર જેવો અવાજ આવ્યો. તમે નીચે દિવાકર બારતૌલા દ્વારા મોકલેલો વીડિયો જોઈ શકો છો.

પરિણામ

આમ, અમારી પડતાલમાં ઉપરોક્ત પોસ્ટમાં કરવામાં આવેલો દાવો અધૂરી માહિતી સાથેનો હોવાનું સાબિત થાય છે કારણ કે, પોસ્ટમાં મૂકવામાં આવેલો વીડિયો ગુજરાતના દાંતા-અંબાજી પંથકનો નહીં પરંતુ નેપાળના ચિતવાન જિલ્લાના ગડૌલી ગામમાં દિવાકર બારતૌલા નામના વ્યક્તિ દ્વારા લેવામાં આવ્યો હતો. લોકોને ગેરમાર્ગે દોરવા માટે વીડિયોને ખોટી માહિતી સાથે સોશિયલ મીડિયા પર વાયરલ કરવામાં આવી રહ્યો છે. 

(જો તમારી પાસે પણ સોશિયલ મીડિયાના માધ્યમથી કોઈ શંકાસ્પદ મેસેજ, પોસ્ટ, ફોટો અને વીડિયો અથવા સમાચાર હોય, તો તેની સત્યતા જાણવા માટે તમે અમને અમારા વોટ્સઅપ ફેક્ટલાઈન નંબર (9049053770) પર મોકલો. અમારા લેટેસ્ટ ફેક્ટ ચેક વાંચવા માટે Facebook, Instagram અને Twitter પર Fact Crescendoને ફોલો કરો)