એક વર્દીધારી મહિલાના ફોટોવાળો વીડિયો યુક્રેનના ઉપરાષ્ટ્રપતિની પત્નીના નામે વાયરલ… જાણો શું છે સત્ય….

તાજેતરમાં રશિયા અને યુક્રેન વચ્ચે યુદ્ધ ચાલી રહ્યું છે ત્યારે સોશિયલ મીડિયા પર ઘણા બધા ખોટા સમાચારો, માહિતી, ફોટો અને વીડિયો વાયરલ થઈ રહ્યા છે. જે અંતર્ગત તાજેતરમાં સોશિયલ મીડિયા પર વર્દીધારી મહિલાનો એક ફોટો વાયરલ થઈ રહ્યો છે. આ ફોટો સાથેના વીડિયોમાં એવો દાવો કરવામાં આવી રહ્યો છે કે, તાજેતરમાં રશિયા અને યુક્રેન વચ્ચે ચાલી રહેલા યુદ્ધમાં યુક્રેનના ઉપરાષ્ટ્રપતિની પત્નીએ યુક્રેનની રક્ષા માટે હથિયાર ઉઠાવ્યા તેનો આ ફોટો છે. પરંતુ ફેક્ટ ક્રેસેન્ડોની પડતાલમાં આ દાવો ખોટો અને પાયાવિહોણો હોવાનું સાબિત થાય છે કારણ કે, પોસ્ટમાં મૂકવામાં આવેલા વીડિયોમાં જે ફોટો મૂકવામાં આવ્યો છે એ યુક્રેનના રાષ્ટ્રપતિની પત્નીનો નહીં પરંતુ એક વર્દીધારી મહિલા સૈનિકનો છે. વધુમાં યુક્રેનમાં ઉપરાષ્ટ્રપતિ માટેનું કોઈ સંવિધાનિક પદ જ રાખવામાં નથી આવ્યું. આ ફોટોને રશિયા અને યુક્રેન વચ્ચેના યુદ્ધની હાલની પરિસ્થિતિ સાથે કોઈ જ સંબંધ નથી. આ ફોટો સાથેના વીડિયોને સોશિયલ મીડિયા પર ભ્રામક અને ખોટી માહિતી સાથે લોકોને ગેરમાર્ગે દોરવા વાયરલ કરવામાં આવી રહ્યો છે.

શું દાવો કરવામાં આવી રહ્યો છે.?

TV9 Gujarati નામના ફેસબુક પેજ દ્વારા 28 ફેબ્રુઆરી, 2022 ના રોજ એક પોસ્ટ શેર કરવામાં આવી હતી. પોસ્ટમાં મૂકવામાં આવેલા વીડિયો સમાચારના શીર્ષકમાં એવું લખવામાં આવ્યું છે કે, યુક્રેનિયન વાઇસ પ્રેસિડેન્ટની પત્નીએ રશિયા યુક્રેન યુદ્ધ વચ્ચે હથિયાર ઉઠાવ્યા |Tv9News #Ukraine #UkraineRussiaWar #Russia. પોસ્ટમાં મૂકવામાં આવેલા વીડિયો સાથે એવો દાવો કરવામાં આવી રહ્યો છે કે, પોસ્ટમાં મૂકવામાં આવેલા વીડિયોમાં તાજેતરમાં રશિયા અને યુક્રેન વચ્ચે ચાલી રહેલા યુદ્ધમાં યુક્રેનના ઉપરાષ્ટ્રપતિની પત્નીએ યુક્રેનની રક્ષા માટે હથિયાર ઉઠાવ્યા તેનો આ ફોટો છે.

Facebook Post | Archive

FACT CHECK

ઉપરોક્ત પોસ્ટમાં કરવામાં આવેલા દાવાની સત્યતા તપાસવી જરૂરી જણાતાં અમે અમારી પડતાલ/તપાસ કાર્યવાહી શરૂ કરી હતી. સૌપ્રથમ અમે ગુગલનો સહારો લઈને જુદા-જુદા કીવર્ડથી સર્ચ કરતાં અમને યુક્રેનનું સંવિધાન પ્રાપ્ત થયું હતું. આ સંવિધાનમાં અમને ક્યાંય પણ યુક્રેન દેશમાં ઉપરાષ્ટ્રપતિ નામનું કોઈ સંવિધાનિક પદ હોય એવી કોઈ જ માહિતી પ્રાપ્ત થઈ નહતી. યુક્રેન સરકારની સત્તાવાર વેબસાઈટ પર પણ અમને ક્યાંય યુક્રેન ખાતે ઉપરાષ્ટ્રપતિ નામનું કોઈ સંવિધાનિક પદ હોવાની માહિતી જોવા મળી નહતી. 

https://rm.coe.int/constitution-of-ukraine/168071f58b

અમારી વધુ તપાસમાં અમને papers.ssrn.com નામની વેબસાઈટ પર પણ યુક્રેન ખાતે ઉપરાષ્ટ્રપતિનું કોઈ સંવિધાનિક પદ હોય એવી કોઈ જ માહિતી પ્રાપ્ત થઈ નહતી.

ત્યાર બાદ અમારી વધુ તપાસમાં અમને પોસ્ટમાં મૂકવામાં આવેલો આજ ફોટો Nataliya નામની એક ટ્વિટર યુઝર દ્વારા 8 એપ્રિલ, 2021 ના રોજ અપલોડ કરવામાં આવ્યો હતો. જેમાં ક્યાંય પણ આ મહિલા યુક્રેનના ઉપરાષ્ટ્રપતિની પત્ની હોવાની કોઈ જ માહિતી અમને જોવા મળી નહતી.

Доброго ранку, моя Україно !
Доброго ранку, земле моя ! pic.twitter.com/H8JJEyhidu

— Nataliya (@Nataliy94087733) April 8, 2021

આજ ફોટો પિન્ટરેસ્ટ નામની વેબસાઈટ પર પણ ઘણા સમય પહેલા અપલોડ કરવામાં આવ્યો હતો. જેના પરથી એ સ્પષ્ટ સાબિત થાય છે કે, પોસ્ટમાં મૂકવામાં આવેલા વીડિયોમાં વર્દીધારી મહિલાનો જે ફોટો મૂકવામાં આવ્યો છે યુક્રેનના ઉપરાષ્ટ્રપતિની પત્ની નથી. 

પરિણામ

આમ, અમારી પડતાલમાં ઉપરોક્ત પોસ્ટમાં કરવામાં આવેલો દાવો ભ્રામક હોવાનું સાબિત થાય છે કારણ કે, પોસ્ટમાં મૂકવામાં આવેલા વીડિયોમાં જે ફોટો મૂકવામાં આવ્યો છે એ યુક્રેનના રાષ્ટ્રપતિની પત્નીનો નહીં પરંતુ એક વર્દીધારી મહિલા સૈનિકનો છે. વધુમાં યુક્રેનમાં ઉપરાષ્ટ્રપતિ માટેનું કોઈ સંવિધાનિક પદ જ રાખવામાં નથી આવ્યું. આ ફોટોને રશિયા અને યુક્રેન વચ્ચેના યુદ્ધની હાલની પરિસ્થિતિ સાથે કોઈ જ સંબંધ નથી.