શું ખરેખર ગુજરાતના ગીરના જંગલમાં વાઘ જોવા મળ્યો હતો…? જાણો શું છે સત્ય….

હાલ સોશિયલ મીડિયામાં એક વીડિયો વાયરલ થઈ રહ્યો છે. જેમાં એક રસ્તાની બાજુમાં એક કાર જોઈ શકાય છે અને આ વચ્ચે એક વાઘ રસ્તો ક્રોસ કરી સામેની બાજુના રસ્તા પર જતો જઈ શકાય છે. આ વીડિયોને શેર કરીને દાવો કરવામાં આવી રહ્યો છે કે, “વાઘનો રસ્તો ક્રોસ કરતો આ વીડિયો ગુજરાતના ગીરના જંગલનો છે.”

શું દાવો કરવામાં આવી રહ્યો છે.?

સોશિયલ મીડિયા યુઝર્સ દ્વારા તારીખ 19 જાન્યુઆરી 2025ના એક પોસ્ટ શેર કરવામાં આવી હતી. આ પોસ્ટમાં દાવો કરવામાં આવ્યો હતો કે, “વાઘનો રસ્તો ક્રોસ કરતો આ વીડિયો ગુજરાતના ગીરના જંગલનો છે.”

Facebook | Fb post Archive | Fb video archive

FACT CHECK

ઉપરોક્ત પોસ્ટમાં કરવામાં આવેલા દાવાની સત્યતા તપાસવી જરૂરી જણાતા અમે અમારી પડતાલ/તપાસ કાર્યવાહી શરૂ કરી હતી.

સૌપ્રથમ અમે ગૂગલ રિવર્સ ઈમેજના માધ્યમથી સર્ચ કરતા અમને ઘણા પરિણામો પ્રાપ્ત થયા હતા.

ઉપરોક્ત પરિણામો પરથી અમને આ જ વીડિયો જૂન 2021ના યુટ્યુબ પર પ્રાપ્ત થયો હતો. જેની સાથે માહિતી આપવામાં આવી હતી કે, “આ વીડિયો મધ્યપ્રદેશના બંધવગઢ નેશનલ પાર્કનો છે.” 

નેચર અને હેરિટેજ નામની યુટ્યુબ ચેનલ દ્વારા પણ આ વીડિયોને શેર કરવામાં આવ્યો હતો. જેમાં આ વીડિયો મધ્યપ્રદેશના બંધવગઢ નેશનલ પાર્કનો હોવાની માહિતી આપવામાં આવી હતી. જે તમે નીચે જોઈ શકો છો. 

તેમજ અમારી પડતાલને વધુ મજબૂત કરવા અમે જૂનાગઢના ફોરેસ્ટ ઓફિસરનો સંપર્ક સાધ્યો હતો તેમણે અમને જણાવ્યુ હતુ કે, “ગીરના જંગલમાં સિંહની વસ્તી છે તેમજ અન્ય પ્રાણીઓની પણ વસ્તી ઘણી છે. પરંતુ વાઘ એક પણ નથી. તેમજ વીડિયોમાં જોવા મળતા રોડમાંનો એક પણ રોડ ગુજરાતના ગીરમાં નથી. આ વીડિયોને ગુજરાતના ગીર સાથે કોઈ લેવા નથી.” 

પરિણામ

આમ, અમારી પડતાલમાં ઉપરોક્ત પોસ્ટ ખોટી સાબિત થાય છે. કારણ કે, પોસ્ટ સાથે શેર કરવામાં આવેલો વીડિયો ગુજરાતના ગીરનો નહીં પરંતુ મધ્યપ્રદેશના બંધવગઢ નેશનલ પાર્કનો છે. ગુજરાતના ગીર સાથે તેનો કોઈ સબંધ નથી.

(જો તમારી પાસે પણ સોશિયલ મિડિયાના માધ્યમથી કોઈ શંકાસ્પદ મેસેજ, પોસ્ટ, ફોટો અને વિડિયો અથવા સમાચાર હોય, તો તેની સત્યતા જાણવા માટે તમે અમને અમારા વોટ્સઅપ ફેક્ટલાઈન નંબર (9049053770) પર મોકલો. અમારા લેટેસ્ટ ફેક્ટ ચેક વાંચવા માટે Facebook, Instagram અને Twitter પર Fact Crescendoને ફોલો કરો.)