જાણો મુંબઈ ખાતે થયેલા ભારે વરસાદને લીધે મુંબઈ એરપોર્ટ પર પાણી ભરાયા હોવાના નામે વાયરલ થઈ રહેલા વીડિયોનું શું છે સત્ય…?

તાજેતરમાં સોશિયલ મીડિયા પર એરપોર્ટ પર ભરાયેલા પાણીનો એક વીડિયો વાયરલ થઈ રહ્યો છે જેની સાથે એવો દાવો કરવામાં આવી રહ્યો છે કે, તાજેતરમાં મુંબઈ ખાતે થયેલા ભારે વરસાદને લીધે મુંબઈ એરપોર્ટ પર પાણી ભરાઈ ગયા તેનો આ વીડિયો છે. પરંતુ ફેક્ટ ક્રેસેન્ડોની પડતાલમાં આ દાવો ખોટો હોવાનું સાબિત થાય છે કારણ કે, પોસ્ટમાં એરપોર્ટ પર ભરાયેલા પાણીનો જે વીડિયો મૂકવામાં આવ્યો છે એ વર્ષ 2023માં ચેન્નઈમાં આવેલા મિચોંગ વાવાઝોડાને લીધે ચેન્નઈ એરપોર્ટ પર પાણી ભરાઈ ગયા હતા તેનો છે. આ વીડિયોને મુંબઈ એરપોર્ટ કે હાલની પરિસ્થિતિ સાથે કોઈ જ સંબંધ નથી. આ વીડિયો સોશિયલ મીડિયા પર ખોટી માહિતી સાથે લોકોને ગેરમાર્ગે દોરવા વાયરલ કરવામાં આવી રહ્યો છે.

શું દાવો કરવામાં આવી રહ્યો છે.?

એક સોશિયલ મીડિયા યુઝર દ્વારા 19 ઓગસ્ટ, 2025ના રોજ એક પોસ્ટ શેર કરવામાં આવી હતી. પોસ્ટમાં મૂકવામાં આવેલા વીડિયોના શીર્ષકમાં  લખવામાં આવ્યું છે કે, જળબંબાકાર… મુંબઈ આંતર રાષ્ટ્રીય એરપોર્ટ પાણી મા ડુબ્યુ.. #મુંબઈ #mumbai. આ વીડિયો સાથેના લખાણમાં એવો દાવો કરવામાં આવી રહ્યો છે કે, તાજેતરમાં મુંબઈ ખાતે થયેલા ભારે વરસાદને લીધે મુંબઈ એરપોર્ટ પર પાણી ભરાઈ ગયા  તેનો આ વીડિયો છે.

Facebook Post | Archive

FACT CHECK

ઉપરોક્ત પોસ્ટમાં કરવામાં આવેલા દાવાની સત્યતા તપાસવી જરૂરી જણાતાં અમે અમારી પડતાલ/તપાસ કાર્યવાહી શરૂ કરી હતી. તપાસની શરૂઆતમાં અમે પોસ્ટમાં મૂકવામાં આવેલા વડિયોનો એક સ્ક્રીનશોટ લઈ ગુગલ રિવર્સ ઈમેજનો સહારો લઈને સર્ચ કરતાં અમને પોસ્ટમાં મૂકવામાં આવેલા આજ વીડિયો સાથેના સમાચાર ઝી 24 કલાક દ્વારા 4 ડિસેમ્બર, 2023ના રોજ પ્રસારિત કરવામાં આવ્યા હતા.  જેની સાથે એવી માહિતી આપવામાં આવી હતી કે, મિચોંગ’ વાવાઝોડાને પગલે ચેન્નાઈમાં અતિભારે વરસાદ  થતાં એરપોર્ટની આવી હાલત થઈ તેનો આ વીડિયો છે. જેના પરથી એ સ્પષ્ટ સાબિત થાય છે કે, પોસ્ટમાં મૂકવામાં આવેલો વીડિયો તાજેતરનો નહીં પરંતુ જૂનો છે અને તે મુંબઈનો નહીં પરંતુ ચેન્નઈનો છે.

આ જ વીડિયો અને માહિતી સાથેના અમને અન્ય સમાચાર અહેવાલો પણ પ્રાપ્ત થયા હતા. જેમાં પણ આ વીડિયો ચેન્નઈ એરપોર્ટનો હોવાની માહિતી આપવામાં આવી છે. જે તમે અહીં જોઈ શકો છો. Times Now | The New Indian Express

પોસ્ટમાં મૂકવામાં આવેલા આ જ વીડિયોના દ્રશ્યો અને માહિતી સાથેના સમાચાર ટીવી9 ગુજરાતી દ્વારા પણ 5 ડિસેમ્બર, 2023ના રોજ પ્રસારિત કરવામાં આવ્યા હતા. જે તમે નીચે જોઈ શકો છો.

પરિણામ

આમ, અમારી પડતાલમાં ઉપરોક્ત પોસ્ટમાં કરવામાં આવેલો દાવો અધૂરી માહિતી સાથેનો હોવાનું સાબિત થાય છે કારણ કે, પોસ્ટમાં એરપોર્ટ પર ભરાયેલા પાણીનો જે વીડિયો મૂકવામાં આવ્યો છે એ વર્ષ 2023માં ચેન્નઈમાં આવેલા મિચોંગ વાવાઝોડાને લીધે ચેન્નઈ એરપોર્ટ પર પાણી ભરાઈ ગયા હતા તેનો છે. આ વીડિયોને મુંબઈ એરપોર્ટ કે હાલની પરિસ્થિતિ સાથે કોઈ જ સંબંધ નથી. આ વીડિયો સોશિયલ મીડિયા પર ખોટી માહિતી સાથે લોકોને ગેરમાર્ગે દોરવા વાયરલ કરવામાં આવી રહ્યો છે. 

(જો તમારી પાસે પણ સોશિયલ મીડિયાના માધ્યમથી કોઈ શંકાસ્પદ મેસેજ, પોસ્ટ, ફોટો અને વીડિયો અથવા સમાચાર હોય, તો તેની સત્યતા જાણવા માટે તમે અમને અમારા વોટ્સઅપ ફેક્ટલાઈન નંબર (9049053770) પર મોકલો. અમારા લેટેસ્ટ ફેક્ટ ચેક વાંચવા માટે Facebook, Instagram અને Twitter પર Fact Crescendoને ફોલો કરો.)