કરાચીના પ્રિન્સિપાલનો વાંધાજનક વીડિયો ભારતના પોલીસ કર્મચારીના નામે વાયરલ…જાણો શું છે સત્ય….

પોસ્ટ સાથે શેર કરવામાં આવેલો વીડિયો ભારતના પોલીસ કર્મચારીનો નહીં પરંતુ પાકિસ્તાનના કરાચીનો છે. તેને ભારત સાથે કોઈ લેવા-દેવા નથી.

રાજસ્થાનના ચિત્તોડગઢમાં એક સરકારી શાળાના આચાર્ય અને શિક્ષકનો વાંધાજનક વીડિયો થોડા દિવસો પહેલા વાયરલ થયો હતો, જેના પછી તેમને નોકરીમાંથી કાઢી મૂકવામાં આવ્યા હતા. ત્યાર બાદ એક પૂરુષનો મહિલા સાથે વાંધાજનક કૃત્ય કરતો વીડિયો સોશિયલ મીડિયા પર વાયરલ થઈ રહ્યો છે. આ વીડિયોને શેર કરીને દાવો કરવામાં આવી રહ્યો છે કે, “પ્રિન્સિપાલ પછી હવે ભારતના પોલીસકર્મીનો વાંધાજનક વીડિયો વાયરલ થઈ રહ્યો છે.”

શું દાવો કરવામાં આવી રહ્યો છે.?

સોશિયલ મીડિયા યુઝર્સ દ્વારા તારીખ 05 ફેબ્રુઆરી 2025ના એક પોસ્ટ શેર કરવામાં આવી હતી. આ પોસ્ટમાં દાવો કરવામાં આવ્યો હતો કે, “પ્રિન્સિપાલ પછી હવે ભારતના પોલીસકર્મીનો વાંધાજનક વીડિયો વાયરલ થઈ રહ્યો છે.”

Facebook | Fb post Archive | Fb video archive

FACT CHECK

ઉપરોક્ત પોસ્ટમાં કરવામાં આવેલા દાવાની સત્યતા તપાસવી જરૂરી જણાતા અમે અમારી પડતાલ/તપાસ કાર્યવાહી શરૂ કરી હતી. 

સૌપ્રથમ અમે ગૂગલ રિવર્સ ઈમેજના માધ્યમથી સર્ચ કરતા અમને ઘણા પરિણામો પ્રાપ્ત થયા હતા. ઉપરોક્ત પરિણામો પરથી અમને ફન વર્લ્ડ નામની યુટ્યુબ ચેનલ પર વાયરલ વીડિયો મળ્યો. આ વીડિયો 2023માં અપલોડ કરવામાં આવ્યો હતો. જેની સાથે માહિતી આપવામાં આવી હતી કે, વાયરલ વીડિયો પાકિસ્તાનના કરાચીનો છે. 

તેમજ વધુ સર્ચ કરતા અમને નયા પાકિસ્તાન ડિજિટલ નામની યુટ્યુબ ચેનલ પર વાયરલ વીડિયો સંબંધિત બીજો વીડિયો મળ્યો. આ વીડિયો 17 સપ્ટેમ્બર 2023ના રોજ અપલોડ કરવામાં આવ્યો હતો. ઉપલબ્ધ માહિતી અનુસાર, વાયરલ વીડિયો પાકિસ્તાનના કરાચી શહેરમાં સ્થિત એક શાળાના આચાર્યનો છે. આ પુરુષ મહિલાઓનું શોષણ કરતો હતો અને તેને રેકોર્ડ કર્યા પછી તે પછીથી તેમને બ્લેકમેલ કરતો હતો.

તેમજ વધુ સર્ચ કરતા અમને પાકિસ્તાની ન્યૂઝ વેબસાઇટ ડોન દ્વારા 6 સપ્ટેમ્બર 2023ના રોજ પ્રકાશિત અહેવાલ પ્રાપ્ત થયો હતો. આ અહેવાલમાં માહિતી આપવામાં આવી હતી કે, કરાચીના ગુલશન-એ-હદીદ વિસ્તારમાં આવેલી એક ખાનગી શાળાના આચાર્ય ઇરફાન ગફૂર મેમણની પોલીસે મહિલાઓ પર બળાત્કાર અને શોષણના આરોપસર ધરપકડ કરી હતી. ગફુર પાસેથી મહિલાઓના શોષણના 25 વીડિયો મળી આવ્યા હતા. આ કેસમાં લગભગ 45 મહિલાઓ પીડિત હોવાનું જાણવા મળ્યું. 

પરિણામ

આમ, અમારી પડતાલમાં ઉપરોક્ત પોસ્ટ ખોટી સાબિત થાય છે. કારણ કે, પોસ્ટ સાથે શેર કરવામાં આવેલો વીડિયો ભારતના પોલીસ કર્મચારીનો નહીં પરંતુ પાકિસ્તાનના કરાચીનો છે. તેને ભારત સાથે કોઈ લેવા-દેવા નથી.

(જો તમારી પાસે પણ સોશિયલ મિડિયાના માધ્યમથી કોઈ શંકાસ્પદ મેસેજ, પોસ્ટ, ફોટો અને વિડિયો અથવા સમાચાર હોય, તો તેની સત્યતા જાણવા માટે તમે અમને અમારા વોટ્સઅપ ફેક્ટલાઈન નંબર (9049053770) પર મોકલો. અમારા લેટેસ્ટ ફેક્ટ ચેક વાંચવા માટે Facebook, Instagram અને Twitter પર Fact Crescendoને ફોલો કરો.)