જાણો ભાજપના નેતા અમિત શાહને ધમકાવી રહેલા TMC મહિલા નેતા કાકોલી ઘોષના નામે વાયરલ વીડિયોનું શું છે સત્ય…

તાજેતરમાં સોશિયલ મીડિયા પર ભાજપના નેતા અમિત શાહને ધમકાવી રહેલા TMCના મહિલા નેતા કાકોલી ઘોષનો એક વીડિયો વાયરલ થઈ રહ્યો છે જેની સાથે એવો દાવો કરવામાં આવી રહ્યો છે કે, સંસદમાં TMCના મહિલા નેતા કાકોલી ઘોષ દ્વારા ભાજપના નેતા અમિત શાહને ધમકાવવામાં આવ્યા અને બેસી જવાનું કહેવામાં આવ્યું તેનો આ વીડિયો છે. પરંતુ ફેક્ટ ક્રેસેન્ડોની પડતાલમાં આ દાવો ખોટો હોવાનું સાબિત થાય છે કારણ કે, પોસ્ટમાં ભાજપના નેતા અમિત શાહને ધમકાવી રહેલા TMCના મહિલા નેતા કાકોલી ઘોષનો જે વીડિયો મૂકવામાં આવ્યો છે એ એડિટેડ વીડિયો છે. આ વીડિયો બે અલગ-અલગ વીડિયો ભેગા કરીને બનાવવામાં આવ્યો છે. લોકોને ગેરમાર્ગે દોરવા માટે વીડિયો ખોટી માહિતી સાથે સોશિયલ મીડિયા પર વાયરલ કરવામાં આવી રહ્યો છે.

શું દાવો કરવામાં આવી રહ્યો છે.?

એક ફેસબુક યુઝર દ્વારા 10 ફેબ્રુઆરી, 2025ના રોજ એક પોસ્ટ શેર કરવામાં આવી હતી. પોસ્ટમાં મૂકવામાં આવેલા વીડિયોના શીર્ષકમાં એવું લખવામાં આવ્યું છે કે, ગૃહમંત્રીને બેસાડી દેનારી આ મહિલાને વંદન સહિત સલામ!. આ વીડિયો સાથેના લખાણમાં એવો દાવો કરવામાં આવી રહ્યો છે કે, સંસદમાં TMCના મહિલા નેતા કાકોલી ઘોષ દ્વારા ભાજપના નેતા અમિત શાહને ધમકાવવામાં આવ્યા અને બેસી જવાનું કહેવામાં આવ્યું તેનો આ વીડિયો છે.

Facebook Post | Archive

FACT CHECK

ઉપરોક્ત પોસ્ટમાં કરવામાં આવેલા દાવાની સત્યતા તપાસવી જરૂરી જણાતાં અમે અમારી પડતાલ/તપાસ કાર્યવાહી શરૂ કરી હતી. તપાસની શરૂઆતમાં અમે પોસ્ટમાં મૂકવામાં આવેલા વીડિયોને ધ્યાનથી જોયા બાદ ગુગલ રિવર્સ ઈમેજનો સહારો લઈ આ વીડિયોનો એક સ્ક્રીનશોટ લઈને સર્ચ કરતાં પોસ્ટમાં મૂકવામાં આવેલો આજ વીડિયો અમને 01 ઓગસ્ટ, 2022 ના રોજ સંસદ ટીવીની સત્તાવાર યુટ્યુબ ચેનલ પર અપલોડ કરવામાં આવ્યો હોવાની માહિતી પ્રાપ્ત થઈ હતી. આ વીડિયોમાં તૃણમૂલ કોંગ્રેસના સાંસદ ડૉ.કાકોલી ઘોષ દસ્તીદાર મોંઘવારી મુદ્દે બોલતા જોવા મળે છે. આ સંપૂર્ણ વીડિયો જોતાં અમને એ જાણવા મળ્યું કે, વાયરલ વીડિયોની ક્લિપ્સ 3.05 મિનિટે, 11.30 મિનિટે, 12.30 મિનિટે, 12.45 મિનિટે અને 13.00 મિનિટે અલગ-અલગ ટાઈમસ્ટેમ્પ પરથી લેવામાં આવી છે. જો કે, 12:35 મિનિટે, જ્યારે કાકોલી ઘોષ કોઈને આંગળી વડે ઠપકો આપે છે ત્યારે અમિત શાહ અસલ વીડિયોમાં ક્યાંય પણ જોવા મળતા નથી.

આજ વીડિયો 01 ઓગસ્ટ, 2022ના રોજ ઓલ ઈન્ડિયા તૃણમૂલ કોંગ્રેસ (AITC) ની યુટ્યુબ ચેનલ પર પણ અપલોડ કરવામાં આવ્યો હતો.

ત્યારબાદ, અમે અમિત શાહના વાયરલ વીડિયોનો સ્ક્રીનશોટ લીધો અને તેને પણ ગુગલ રિવર્સ ઈમેજનો સહારો લઈ સર્ચ કરતાં અમને 7 ફેબ્રુઆરી, 2022 ના રોજ અપલોડ કરવામાં આવેલ સંસદ ટીવી યુટ્યુબ ચેનલ પર એક મૂળ વીડિયો જોવા મળ્યો હતો. આ વીડિયોમાં અમિત શાહ રાજ્યસભામાં અસદુદ્દીન ઓવૈસીના કાફલા પર થયેલા હુમલા અંગે બોલતા જોવા મળે છે. વાયરલ ક્લિપ વીડિયોના છેલ્લા ભાગમાં 3.40 મિનિટે જોઈ શકાય છે.

આજ વીડિયો 07 ફેબ્રુઆરી, 2022ના રોજ ભારતીય જનતા પાર્ટીની યુટ્યુબ ચેનલ પર પણ અપલોડ કરવામાં આવ્યો હતો. જેના પરથી એ સ્પષ્ટ સાબિત થાય છે કે, વાયરલ વીડિયો બે અલગ-અલગ વીડિયોને ભેગા કરીને બનાવવામાં આવ્યો છે.

પરિણામ

આમ, અમારી પડતાલમાં ઉપરોક્ત પોસ્ટમાં કરવામાં આવેલો દાવો અધૂરી માહિતી સાથેનો હોવાનું સાબિત થાય છે કારણ કે, પોસ્ટમાં ભાજપના નેતા અમિત શાહને ધમકાવી રહેલા TMCના મહિલા નેતા કાકોલી ઘોષનો જે વીડિયો મૂકવામાં આવ્યો છે એ એડિટેડ વીડિયો છે. આ વીડિયો બે અલગ-અલગ વીડિયો ભેગા કરીને બનાવવામાં આવ્યો છે. લોકોને ગેરમાર્ગે દોરવા માટે વીડિયો ખોટી માહિતી સાથે સોશિયલ મીડિયા પર વાયરલ કરવામાં આવી રહ્યો છે. 

(જો તમારી પાસે પણ સોશિયલ મીડિયાના માધ્યમથી કોઈ શંકાસ્પદ મેસેજ, પોસ્ટ, ફોટો અને વીડિયો અથવા સમાચાર હોય, તો તેની સત્યતા જાણવા માટે તમે અમને અમારા વોટ્સઅપ ફેક્ટલાઈન નંબર (9049053770) પર મોકલો. અમારા લેટેસ્ટ ફેક્ટ ચેક વાંચવા માટે Facebook, Instagram અને Twitter પર Fact Crescendoને ફોલો કરો)