શું ખરેખર અમદાવાદમાં રીલ બનાવવા યુવાન ટ્રેન નીચે સુઈ ગયો…? જાણો શું છે સત્ય….

પોસ્ટ સાથે શેર કરવામાં આવેલો વીડિયો ગુજરાતના અમદાવાદનો નથી. પરંતુ વર્ષ 2016નો બાંગ્લાદેશનો વીડિયો છે. અમદાવાદ સાથે તેને કોઈ લેવા-દેવા નથી.

હાલમાં એક વીડિયો સોશિયલ મીડિયા પર વાયરલ થઈ રહ્યો છે. વીડિયોમાં જોવામળે છે કે, એક યુવાન સામેથી આવતી ટ્રેનની નીચે સુઈ જાય છે અને ટ્રેન જતી રહ્યા બાદ તે સુરક્ષિત ઉભો થાય છે અને કેમેરા સામે એક્શન કરતો જોવા મળે છે. આ વીડિયોને શેર કરીને દાવો કરવામાં આવી રહ્યો છે કે, “અમદાવાદનો આ યુવાન રીલ બનાવવાના ચક્કરમાં ટ્રેનની નીચે સુઈ ગયો હતો.”

શું દાવો કરવામાં આવી રહ્યો છે.?

સોશિયલ મીડિયા યુઝર્સ દ્વારા તારીખ 08 સપ્ટેમ્બર 2025ના એક પોસ્ટ શેર કરવામાં આવી હતી. આ પોસ્ટમાં દાવો કરવામાં આવ્યો હતો કે, “અમદાવાદનો આ યુવાન રીલ બનાવવાના ચક્કરમાં ટ્રેનની નીચે સુઈ ગયો હતો.”

Facebook | Fb post Archive 

FACT CHECK

ઉપરોક્ત પોસ્ટમાં કરવામાં આવેલા દાવાની સત્યતા તપાસવી જરૂરી જણાતા અમે અમારી પડતાલ/તપાસ કાર્યવાહી શરૂ કરી હતી.

સૌપ્રથમ અમે ગૂગલ રિવર્સ ઈમેજના માધ્યમથી સર્ચ કરતા અમને ઘણા પરિણામો પ્રાપ્ત થયા હતા.

ઉપરોક્ત પરિણામો પરથી અમને આ ઘટનાનો ઓરિજનલ વીડિયો પ્રાપ્ત થયો હતો. જે એપ્રિલ 2016ના બાંગ્લાદેશની યુટ્યુબ ચેનલ પર અપલોડ કરવામાં આવ્યો હતો. જેની સાથે માહિતી આપવામાં આવી હતી કે, “એક વિચિત્ર વીડિયો. એક યુવાન ટ્રેન નીચે સૂઈ ગયો.” ઓરિજનલ વીડિયોમાં પાછળ વીડિયો ઉતારનાર વ્યક્તિ બંગાળી ભાષામાં બોલી રહ્યો છે. જે તમે નીચે જોઈ શકો છો.

તેમજ વધુ સર્ચ કરતા અમને Dailymail.uk નો વર્ષ 2016નો એક અહેવાલ પ્રાપ્ત થયો હતો. જેની સાથે માહિતી આપવામાં આવી હતી કે, “એક નીડર સાહસિકે પોતાનો જીવ જોખમમાં મૂકીને એક ઝડપથી દોડતી ટ્રેનને ૧૦ સેકન્ડથી વધુ સમય માટે પોતાના શરીર પર ચાલવા દીધી પરંતુ તેણે ખસેડવાનો ઇનકાર કર્યો અને બાંગ્લાદેશમાં ક્યાંક કેમેરામાં કેદ થયેલા બેદરકાર સ્ટંટ દરમિયાન ટ્રેન તેની નજીક આવી રહી હતી ત્યારે તે ઘૂંટણિયે પડી ગયો.” 

Archive

તેમજ અમારી પડતાલને વધુ મજબૂત કરવા અમે પશ્ચિમ રેલવેના પીઆરઓનો સંપર્ક સાધ્યો હતો. તેમણે અમને જણાવ્યુ હતુ કે, “આ પ્રકારની કોઈ ઘટના ગુજરાતમાં બનવા પામી નથી. આ વીડિયો ઘણા વર્ષોથી સોશિયલ મીડિયામાં વાયરલ થઈ રહ્યો છે. આ વીડિયોને અમદાવાદના નામથી ખોટી રીતે વાયરલ કરવામાં આવી રહ્યો છે.” 

પરિણામ 

આમ, અમારી પડતાલમાં ઉપરોક્ત પોસ્ટ ખોટી સાબિત થાય છે. કારણ કે, પોસ્ટ સાથે શેર કરવામાં આવેલો વીડિયો ગુજરાતના અમદાવાદનો નથી. પરંતુ વર્ષ 2016નો બાંગ્લાદેશનો વીડિયો છે. અમદાવાદ સાથે તેને કોઈ લેવા-દેવા નથી.

(જો તમારી પાસે પણ સોશિયલ મિડિયાના માધ્યમથી કોઈ શંકાસ્પદ મેસેજ, પોસ્ટ, ફોટો અને વિડિયો અથવા સમાચાર હોય, તો તેની સત્યતા જાણવા માટે તમે અમને અમારા વોટ્સઅપ ફેક્ટલાઈન નંબર (9049053770) પર મોકલો. અમારા લેટેસ્ટ ફેક્ટ ચેક વાંચવા માટે Facebook, Instagram અને Twitter પર Fact Crescendoને ફોલો કરો.)