પોસ્ટ સાથે શેર કરવામાં આવેલો વીડિયો ગુજરાતના વડોદરાનો નહીં પરંતુ યુપીના જૌનપુર નજીકનો છે. વડોદરાનો હોવાની વાત તદ્દન ખોટી છે.
હાલ એક વીડિયો સોશિયલ મીડિયામાં વાયરલ થઈ રહ્યો છે. જેમાં હાઈ-વે પર એક બાઈકમાં ભયંકર આગ લાગી હોવાનું જોઈ શકાય છે. જ્યારે આ જ બાઈકની બાજુમાં એક યુવાન પણ સળગેલી હાલતમાં જોવા મળે છે આસાપાસના લોકો આ યુવાનને આગ માંથી બહાર કાઢવાના પ્રયત્ન કરી રહ્યા છે. આ વીડિયોને શેર કરીને દાવો કરવામાં આવી રહ્યો છે કે, “ગંભીર અકસ્માતના આ દ્રશ્યો ગુજરાતના વડોદરા શહેરના છે.”
શું દાવો કરવામાં આવી રહ્યો છે.?
સોશિયલ મીડિયા યુઝર્સ દ્વારા તારીખ 23 નવેમ્બર 2025ના એક પોસ્ટ શેર કરવામાં આવી હતી. આ પોસ્ટમાં દાવો કરવામાં આવ્યો હતો કે, “ગંભીર અકસ્માતના આ દ્રશ્યો ગુજરાતના વડોદરા શહેરના છે.”
FACT CHECK
ઉપરોક્ત પોસ્ટમાં કરવામાં આવેલા દાવાની સત્યતા તપાસવી જરૂરી જણાતા અમે અમારી પડતાલ/તપાસ કાર્યવાહી શરૂ કરી હતી.
સૌપ્રથમ અમે ગૂગલ રિવર્સ ઈમેજના માધ્યમથી સર્ચ કરતા અમને ઘણા પરિણામો પ્રાપ્ત થયા હતા.
ઉપરોક્ત પરિણામો પરથી અમને News1India ના ઓફિશિયલ ટ્વિટર પેજ પર 19 નવેમ્બર 2025ના અપલોડ કરવામાં આવેલો આ સ્થળનો વીડિયો પ્રાપ્ત થયો હતો. જેની સાથે માહિતી આપવામાં આવી હતી કે, “જૌનપુરના કુલ્હનામાઉ હાઇવે પર રોડવેઝ બસ અને બુલેટ વચ્ચે ભીષણ ટક્કર થઈ હતી જેમાં બુલેટમાં સવાર બે લોકો ઘાયલ થયા, બાઇકમાં આગ લાગવાથી એક દાઝી ગયો જ્યારે બીજા એક યુવાનને ગંભીર હાલતમાં જિલ્લા હોસ્પિટલમાં દાખલ કરવામાં આવ્યો. અકસ્માત બાદ હાઇવે પર અંધાધૂંધી મચી ગઈ. સ્થાનિક લોકોએ ઘાયલોને તાત્કાલિક હોસ્પિટલમાં ખસેડ્યા. પોલીસે બસ અને બાઇકને કબજે કરી તપાસ શરૂ કરી.”
તેમજ આ જ ટ્વિટના જવાબમાં જૌનપુર પોલીસ દ્વારા પણ ટ્વિટ કરવામાં આવ્યુ હતુ જેમાં જણાવ્યુ હતુ કે, “પોલીસ સ્ટેશન ઇન્ચાર્જ બક્ષાને જરૂરી કાર્યવાહી કરવાનો નિર્દેશ આપવામાં આવ્યો છે.”
તેમજ વધુ સર્ચ કરતા અમને દૈનિક ભાસ્કર દ્વારા પણ આ અંગે વિસ્તૃત માહિતી આપતો અહેવાલ પ્રસારિત કર્યો હતો. જેની સાથે માહિતી આપવામાં આવી હતી કે, “સ્થાનિક રહેવાસીઓના જણાવ્યા અનુસાર, જૌનપુરથી સુલતાનપુર જતી રોડવેઝ બસે તે જ દિશામાં જઈ રહેલા બુલેટ બાઇક સવારને ઓવરટેક કરવાનો પ્રયાસ કર્યો હતો. ત્યારબાદ બસ ચાલકે બાઇકને ટક્કર મારી હતી. ટક્કર બાદ, બુલેટ બાઇક બસના પાછળના ટાયરમાં ફસાઈ ગઈ અને લગભગ બે મીટર સુધી ખેંચાઈ ગઈ.”
પરિણામ
આમ, અમારી પડતાલમાં ઉપરોક્ત પોસ્ટ ખોટી સાબિત થાય છે. કારણ કે, પોસ્ટ સાથે શેર કરવામાં આવેલો વીડિયો ગુજરાતના વડોદરાનો નહીં પરંતુ યુપીના જૌનપુર નજીકનો છે. વડોદરાનો હોવાની વાત તદ્દન ખોટી છે.
(જો તમારી પાસે પણ સોશિયલ મિડિયાના માધ્યમથી કોઈ શંકાસ્પદ મેસેજ, પોસ્ટ, ફોટો અને વિડિયો અથવા સમાચાર હોય, તો તેની સત્યતા જાણવા માટે તમે અમને અમારા વોટ્સઅપ ફેક્ટલાઈન નંબર (9049053770) પર મોકલો. અમારા લેટેસ્ટ ફેક્ટ ચેક વાંચવા માટે Facebook, Instagram અને Twitter પર Fact Crescendoને ફોલો કરો.)
Title:શું ખરેખર ગંભીર અકસ્માતના દ્રશ્યો ગુજરાતના વડોદરા શહેરના છે…? જાણો શું છે સત્ય….
Fact Check By: Frany KariaResult: False
