વર્ષ 2011ના સુનામીના વીડિયોને હાલમાં જાપાનમાં આવેલા ભૂકંપ બાદનો ગણાવી શેર કરવામાં આવી રહ્યો… જાણો શું છે સત્ય….

અમને જાણવા મળ્યું કે આ વીડિયો 11 માર્ચ 2011ના રોજ જાપાનના મિયાકો કિનારે આવેલા જીવલેણ સુનામીનો છે. હાલમાં કોઈ સુનામી આવી નથી.

જાપાનમાં હમેશાં ભૂકંપ બાદ સુનામીની ચેતવણી આપવામાં આવે જ છે. હાલ પણ 8 ડિસેમ્બર 2025ના આવેલા ભૂકંપ બાદ ચેતવણી આપવામાં આવી હતી. ત્યારે હાલમાં એક વીડિયો સોશિયલ મીડિયામાં વાયરલ થઈ રહ્યો છે. જેમાં સુનામીના કારણે કાર સહિતની ચીજ-વસ્તુઓ દરિયામાં તણાઈ રહેલી જોવા મળે છે. આ વીડિયોને શેર કરીને દાવો કરવામાં આવી રહ્યો છે કે, “હાલમાં ભૂકંપ બાદ જાપાનમાં આવેલા સુનામીનો આ વીડિયો છે.”

શું દાવો કરવામાં આવી રહ્યો છે.?

સોશિયલ મીડિયા યુઝર્સ દ્વારા તારીખ 09 ડિસેમ્બર 2025ના એક પોસ્ટ શેર કરવામાં આવી હતી. આ પોસ્ટમાં દાવો કરવામાં આવ્યો હતો કે, “હાલમાં ભૂકંપ બાદ જાપાનમાં આવેલા સુનામીનો આ વીડિયો છે.”

Facebook | Fb post Archive 

FACT CHECK

ઉપરોક્ત પોસ્ટમાં કરવામાં આવેલા દાવાની સત્યતા તપાસવી જરૂરી જણાતા અમે અમારી પડતાલ/તપાસ કાર્યવાહી શરૂ કરી હતી. 

સૌપ્રથમ અમે ગૂગલ રિવર્સ ઈમેજના માધ્યમથી સર્ચ કરતા અમને ઘણા પરિણામો પ્રાપ્ત થયા હતા. 

ઉપરોક્ત પરિણામો પરથી અમને જાપાનના એક પ્રખ્યાત ન્યૂઝ આઉટલેટ TBS NEWS DIGની યુટ્યુબ ચેનલ પર આવો જ એક વીડિયો મળ્યો હતો. આ વીડિયો 25 ફેબ્રુઆરી 2021ના ​​રોજ અપલોડ કરવામાં આવ્યો હતો, જેમાં જાપાની શીર્ષકમાં નોંધવામાં આવ્યું હતું કે તે 11 માર્ચ 2011ના રોજ જાપાનના મિયાકો કિનારે આવેલા જીવલેણ સુનામીનો છે.

તેમજ વધુ સર્ચ કરતા અમને એબીસી ન્યુઝ દ્વારા પ્રસારિત અહેવાલ પ્રાપ્ત થયો હતો. જેમાં જાપાનમાં વર્ષ 2011 દરમિયાન આવેલા વિનાશકારી ભૂકંપ બાદના સુનામીના દ્રશ્યો વર્ણવવામાં આવ્યા હતા. જે તમે નીચે જોઈ શકો છો. 

તેમજ વધુ કીવર્ડ સાથે સર્ચ કરતા અમને મિરર અને ડેઇલી પ્રેસ દ્વારા પ્રકાશિત 2011ના સુનામી વિશેના અહેવાલો પ્રાપ્ત થયા હતા. જેમાં પણ આવા જ દ્રશ્યો જોઈ શકાય છે.

પરિણામ

આમ, અમારી પડતાલમાં ઉપરોક્ત પોસ્ટ ખોટી સાબિત થાય છે. કારણ કે, આ વીડિયો 11 માર્ચ 2011ના રોજ જાપાનના મિયાકો કિનારે આવેલા જીવલેણ સુનામીનો છે. હાલમાં કોઈ સુનામી આવી નથી.

(જો તમારી પાસે પણ સોશિયલ મિડિયાના માધ્યમથી કોઈ શંકાસ્પદ મેસેજ, પોસ્ટ, ફોટો અને વિડિયો અથવા સમાચાર હોય, તો તેની સત્યતા જાણવા માટે તમે અમને અમારા વોટ્સઅપ ફેક્ટલાઈન નંબર (9049053770) પર મોકલો. અમારા લેટેસ્ટ ફેક્ટ ચેક વાંચવા માટે Facebook, Instagram અને Twitter પર Fact Crescendoને ફોલો કરો.)