જાણો કોંગ્રેસના ઉમેદવાર ગેનીબેન ઠાકોરને મત આપવાની અપીલ કરી રહેલા અલ્પેશ ઠાકોરના વાયરલ થઈ રહેલા વીડિયોનું શું છે સત્ય…

તાજેતરમાં સોશિયલ મીડિયા પર ભાજપના નેતા અલ્પેશ ઠાકોરનો એક વીડિયો વાયરલ થઈ રહ્યો છે જેની સાથે એવો દાવો કરવામાં આવી રહ્યો છે કે, અલ્પેશ ઠાકોર લોકોને કોંગ્રેસના બનાસકાંઠાના લોકસભા સીટના ઉમેદવાર ગેનીબેન ઠાકોરને મત આપવાની અપીલ કરી રહ્યા છે. પરંતુ ફેક્ટ ક્રેસેન્ડોની પડતાલમાં આ દાવો ખોટો અને પાયાવિહોણો હોવાનું સાબિત થાય છે કારણ કે, પોસ્ટમાં કોંગ્રેસના બનાસકાંઠાના લોકસભા સીટના ઉમેદવાર ગેનીબેન ઠાકોરને મત આપવાની અપીલ કરી રહેલા અલ્પેશ ઠાકોરનો જે વીડિયો મૂકવામાં આવ્યો છે એ તાજેતરનો નહીં પરંતુ વર્ષ 2017 નો છે. એ સમયે તેઓ કોંગ્રેસ પક્ષમાં હતા. આ વીડિયોને હાલની પરિસ્થિતિ સાથે કોઈ જ સંબંધ નથી. આ વીડિયો સોશિયલ મીડિયા પર ખોટી માહિતી સાથે લોકોને ગેરમાર્ગે દોરવા વાયરલ કરવામાં આવી રહ્યો છે.

શું દાવો કરવામાં આવી રહ્યો છે.?

એક ફેસબુક યુઝર દ્વારા 26 માર્ચ, 2024 ના રોજ એક પોસ્ટ શેર કરવામાં આવી હતી. પોસ્ટમાં મૂકવામાં આવેલા વીડિયોના શીર્ષકમાં એવું લખવામાં આવ્યું છે કે, મોટા ભાઈ ની વાત ધ્યાન માં લેજો. પોસ્ટમાં મૂકવામાં આવેલા વીડિયો સાથેના લખાણમાં એવો દાવો કરવામાં આવી રહ્યો છે કે, અલ્પેશ ઠાકોર લોકોને કોંગ્રેસના બનાસકાંઠાના લોકસભા સીટના ઉમેદવાર ગેનીબેન ઠાકોરને મત આપવાની અપીલ કરી રહ્યા છે.

Facebook Post | Archive

FACT CHECK

ઉપરોક્ત પોસ્ટમાં કરવામાં આવેલા દાવાની સત્યતા તપાસવી જરૂરી જણાતાં અમે અમારી પડતાલ/તપાસ કાર્યવાહી શરૂ કરી હતી. તપાસની શરૂઆતમાં અમે પોસ્ટમાં મૂકવામાં આવેલા વડિયોનો એક સ્ક્રીનશોટ લઈ ગુગલ રિવર્સ ઈમેજનો સહારો લઈને સર્ચ કરતાં અમને પોસ્ટમાં મૂકવામાં આવેલો આજ વીડિયો અલ્પેશ ઠાકોરના સત્તાવાર ફેસબુક દ્વારા 12 ડિસેમ્બર, 2017 ના રોજ અપલોડ કરવામાં આવ્યો હોવાની માહિતી પ્રાપ્ત થઈ હતી. જેમાં એવી માહિતી આપવામાં આવી હતી કે, અલ્પેશ ઠાકોર એવી અપીલ કરી રહ્યા છે કે, “વાવ વિધાનસભા ના મતદારો ને વિનંતી કરું છું કે, આપના ત્યાં કોંગ્રેસ પાર્ટીના ઉમેદવાર ગેનીબેન ઠાકોરને વોટ આપીને વિજયી બનાવો.”

અમારી વધુ તપાસમાં અમને એ જાણવા મળ્યું હતું કે, 18 જૂલાઈ, 2019ના રોજ અલ્પેશ ઠાકોર વિધિવત રીતે ભાજપામાં જોડાયા હતા.

તેમજ વર્ષ 2022ની વિધાનસભાની ચૂંટણીમાં અલ્પેશ ઠાકોર ગાંધીનગર દક્ષિણથી ભાજપાની ટિકિટ પર ચૂંટણી લડ્યા હતા અને કોંગ્રેસના ઉમેદવાર હિમાંશુ પટેલને 43 હજાર મતોથી હરાવ્યા હતા અને જીત મેળવી હતી. 

પરિણામ

આમ, અમારી પડતાલમાં ઉપરોક્ત પોસ્ટમાં કરવામાં આવેલો દાવો અધૂરી માહિતી સાથેનો હોવાનું સાબિત થાય છે કારણ કે, પોસ્ટમાં કોંગ્રેસના બનાસકાંઠાના લોકસભા સીટના ઉમેદવાર ગેનીબેન ઠાકોરને મત આપવાની અપીલ કરી રહેલા અલ્પેશ ઠાકોરનો જે વીડિયો મૂકવામાં આવ્યો છે એ તાજેતરનો નહીં પરંતુ વર્ષ 2017 નો છે. એ સમયે તેઓ કોંગ્રેસ પક્ષમાં હતા. આ વીડિયોને હાલની પરિસ્થિતિ સાથે કોઈ જ સંબંધ નથી. આ વીડિયો સોશિયલ મીડિયા પર ખોટી માહિતી સાથે લોકોને ગેરમાર્ગે દોરવા વાયરલ કરવામાં આવી રહ્યો છે. 

(જો તમારી પાસે પણ સોશિયલ મીડિયાના માધ્યમથી કોઈ શંકાસ્પદ મેસેજ, પોસ્ટ, ફોટો અને વીડિયો અથવા સમાચાર હોય, તો તેની સત્યતા જાણવા માટે તમે અમને અમારા વોટ્સઅપ ફેક્ટલાઈન નંબર (9049053770) પર મોકલો. અમારા લેટેસ્ટ ફેક્ટ ચેક વાંચવા માટે Facebook, Instagram અને Twitter પર Fact Crescendoને ફોલો કરો.)