જાણો વિમાનમાં દેખાઈ રહેલા સાપના વાયરલ ફોટોનું શું છે સત્ય….

તાજેતરમાં સોશિયલ મીડિયા પર વિમાનમાં દેખાઈ રહેલા સાપનો એક ફોટો વાયરલ થઈ રહ્યો છે. જેની સાથે એવો દાવો કરવામાં આવી રહ્યો છે કે, તાજેતરમાં એર ઈન્ડિયા એક્સપ્રેસની એક ફ્લાઈટમાં લગેજ વચ્ચે સાપ દેખાતાં લોકોના જીવ અધ્ધર થઈ ગયા હતા તેનો આ ફોટો છે. પરંતુ ફેક્ટ ક્રેસેન્ડોની પડતાલમાં આ દાવો અધૂરી માહિતી સાથેનો હોવાનું સાબિત થાય છે કારણ કે, પોસ્ટમાં ફ્લાઈટમાં દેખાઈ રહેલા સાપનો જે ફોટો મૂકવામાં આવ્યો છે એ હાલનો નહીં પરંતુ 2016 માં એરો મેક્સિકોના વિમાનમાં બનેલી ઘટનાનો છે. જોકે, તાજેતરમાં પણ એર ઈન્ડિયાની ફ્લાઈટમાં સાપ દેખાયાની ઘટના બની હતી. આ ફોટોને હાલની પરિસ્થિતિ સાથે કોઈ જ સંબંધ નથી. આ ફોટોને સોશિયલ મીડિયા પર ભ્રામક અને ખોટી માહિતી સાથે લોકોને ગેરમાર્ગે દોરવા વાયરલ કરવામાં આવી રહ્યો છે.

શું દાવો કરવામાં આવી રહ્યો છે.?

IamGujarat નામના ફેસબુક પેજ દ્વારા 11 ડિસેમ્બર, 2022 ના રોજ એક પોસ્ટ શેર કરવામાં આવી હતી. પોસ્ટમાં મૂકવામાં આવેલા ફોટોના શીર્ષકમાં એવું લખવામાં આવ્યું છે કે, એર ઈન્ડિયા એક્સપ્રેસની ફ્લાઈટ દુબઈ પહોંચતા જ લગેજ વચ્ચે સાપ નીકળતા મુસાફરોના જીવ અદ્ધર થઈ ગયા. #dubai #snakes. આ ફોટો સાથે એવો દાવો કરવામાં આવી રહ્યો છે કે, તાજેતરમાં એર ઈન્ડિયા એક્સપ્રેસની એક ફ્લાઈટમાં લગેજ વચ્ચે સાપ દેખાતાં લોકોના જીવ અધ્ધર થઈ ગયા હતા તેનો આ ફોટો છે.

Facebook Post | Archive

FACT CHECK

ઉપરોક્ત પોસ્ટમાં કરવામાં આવેલા દાવાની સત્યતા તપાસવી જરૂરી જણાતાં અમે અમારી પડતાલ/તપાસ કાર્યવાહી શરૂ કરી હતી. તપાસની શરૂઆતમાં અમે પોસ્ટમાં મૂકવામાં આવેલા ફોટોને ગુગલ રિવર્સ ઈમેજનો સહારો લઈને સર્ચ કરતાં અમને પોસ્ટમાં મૂકવામાં આવેલા આજ ફોટો સાથેના સમાચાર theguardian.com  દ્વારા 8 નવેમ્બર, 2016 ના રોજ પ્રસારિત કરવામાં આવ્યા હોવાની માહિતી પ્રાપ્ત થઈ હતી. જેમાં એવી માહિતી આપવામાં આવી હતી કે, ટોરિયોનથી મેક્સિકો જઈ રહેલી એરો મેક્સિકોની ફ્લાઈટના લગેજ રુમમાં એક સાપ જોવા મળ્યો હતો તેનો આ વીડિયો છે.

આજ માહિતી સાથેના અન્ય સમાચાર પણ અમને પ્રાપ્ત થયા હતા. જે તમે અહીં જોઈ શકો છો. metro.co.uk | abcnews.go.com

અમારી વધુ તપાસમાં અમને એસોસિયેટેડ પ્રેસ દ્વારા પણ ઉપરોક્ત સમાચાર પ્રસારિત કરવામાં આવ્યા હોવાની માહિતી પ્રાપ્ત થઈ હતી.

હવે એ પણ જાણવું જરુરી હતું કે, તાજેતરમાં એર ઈન્ડિયાની ફ્લાઈટમાં સાપ મળી આવ્યો છે કે કેમ?

આ માહિતી અંગે ગુગલનો સહારો લઈને સર્ચ કરતાં અમને દિવ્યભાસ્કર દ્વારા 10 ડિસેમ્બરના રોજ પ્રસારિત કરવામાં આવેલા એક સમાચાર પ્રાપ્ત થયા હતા. જેમાં એવી માહિતી આપવામાં આવી હતી કે, 10 ફેબ્રુઆરીના રોજ જ્યારે એર એશિયાની ફ્લાઈટ કુઆલાલાંપુરથી ઉડાન ભરી હતી, ત્યારે મુસાફરોએ રસ્તાની વચ્ચે એક લાઈટ કેસની અંદર એક સાપને ફરતો જોયો હતો. સાપ દેખાતાની સાથે જ તવાઉ શહેર તરફ જઈ રહેલી ફ્લાઈટને કૂચિંગ શહેર તરફ ડાયવર્ટ કરવામાં આવી હતી અને તેનું ઈમરજન્સી લેન્ડિંગ કરવામાં આવ્યું હતું. એરલાઇનના અધિકારીઓએ કહ્યું હતું કે આ ખૂબ જ દુર્લભ ઘટના છે જે કોઈપણ ફ્લાઇટ સાથે બની શકે છે. જોકે, વાયરલ ફોટો તાજેતરનો નથી.

પરિણામ

આમ, અમારી પડતાલમાં ઉપરોક્ત પોસ્ટમાં કરવામાં આવેલો દાવો અર્ધસત્ય હોવાનું સાબિત થાય છે કારણ કે, પોસ્ટમાં ફ્લાઈટમાં દેખાઈ રહેલા સાપનો જે ફોટો મૂકવામાં આવ્યો છે એ હાલનો નહીં પરંતુ 2016 માં એરો મેક્સિકોના વિમાનમાં બનેલી ઘટનાનો છે. જોકે, તાજેતરમાં પણ એર ઈન્ડિયાની ફ્લાઈટમાં સાપ દેખાયાની ઘટના બની હતી. આ ફોટોને હાલની પરિસ્થિતિ સાથે કોઈ જ સંબંધ નથી.

(જો તમારી પાસે પણ સોશિયલ મીડિયાના માધ્યમથી કોઈ શંકાસ્પદ મેસેજ, પોસ્ટ, ફોટો અને વીડિયો અથવા સમાચાર હોય, તો તેની સત્યતા જાણવા માટે તમે અમને અમારા વોટ્સઅપ ફેક્ટલાઈન નંબર (9049053770) પર મોકલો. અમારા લેટેસ્ટ ફેક્ટ ચેક વાંચવા માટે Facebook, Instagram અને Twitter પર Fact Crescendoને ફોલો કરો.)