હિમાચલ પ્રદેશનો જૂનો વીડિયો ઉત્તરકાશીના ધરાલીમાં બનેલી દુર્ઘટના નામે વાયરલ…. જાણો શું છે સત્ય….

પોસ્ટ સાથે શેર કરવામાં આવેલો આ વીડિયો ઉત્તરકાશી જિલ્લાના ધરાલીનો નહીં પરંતુ ત્રણ વર્ષ પહેલા હિમાચલના સોલન જિલ્લામાં અચાનક આવેલા પૂર દરમિયાનનો છે. હાલની ઘટના સાથે તેને કોઈ લેવા-દેવા નથી.

5 ઓગસ્ટના રોજ ચીનની સરહદે આવેલા ઉત્તરાખંડના ઉત્તરકાશી જિલ્લાના ધરાલીમાં વાદળ ફાટવાથી ખીર ગંગામાં પૂર આવ્યું હતું. પાણીના પ્રવાહને કારણે ઘણા ઘરો અને બહુમાળી ઇમારતો ધરાશાયી થઈ હતી. આ દુર્ઘટનામાં અત્યાર સુધીમાં પાંચ લોકોના મોત થયા છે અને લગભગ ચારસો મુસાફરો ફસાયેલા છે, તેમને બહાર કાઢવાના પ્રયાસો ચાલી રહ્યા છે. 

પૂરમાં ફસાયેલા લોકોને બચાવવાનો એક વીડિયો સોશિયલ મીડિયા પર વાયરલ થઈ રહ્યો છે. જેને શેર કરીને દાવો કરવામાં આવી રહ્યો છે કે, “ઉત્તરાખંડના ઉત્તરકાશી જિલ્લાના ધરાલીમાં બનેલી દુર્ઘટના દરમિયાનના રેસક્યુનો વીડિયો છે.”

શું દાવો કરવામાં આવી રહ્યો છે.?

સોશિયલ મીડિયા યુઝર્સ દ્વારા તારીખ 07 ઓગસ્ટ 2025ના એક પોસ્ટ શેર કરવામાં આવી હતી. આ પોસ્ટમાં દાવો કરવામાં આવ્યો હતો કે, “ઉત્તરાખંડના ઉત્તરકાશી જિલ્લાના ધરાલીમાં બનેલી દુર્ઘટના દરમિયાનના રેસક્યુનો વીડિયો છે.”

Facebook | Fb post Archive | Fb video archive

FACT CHECK

ઉપરોક્ત પોસ્ટમાં કરવામાં આવેલા દાવાની સત્યતા તપાસવી જરૂરી જણાતા અમે અમારી પડતાલ/તપાસ કાર્યવાહી શરૂ કરી હતી.

સૌપ્રથમ અમે પોસ્ટ સાથે શેર કરવામાં આવેલા વીડિયોને ગૂગલ રિવર્સ ઈમેજના માધ્યમથી સર્ચ કરતા અમને ઘણા પરિણામો પ્રાપ્ત થયા હતા.

ઉપરોક્ત પરિણામો પરથી અમને હિમાચલ અભી અભી લાઈવ નામના ફેસબુક એકાઉન્ટ 28 જૂલાઈ 2022ના શેર કરવામાં આવેલો વાયરલ વીડિયો પ્રાપ્ત થયો હતો.

જેની સાથે માહિતી આપવામાં આવી હતી કે, “આ વીડિયો હિમાચલ પ્રદેશના સોલન જિલ્લાના નાલાગઢ વિસ્તારમાં રામશહેર નજીક ગુરૂકુંડનો છે, જ્યાં 5 સ્થળાંતરિત યુવાનો સેલ્ફી લેવાનો પ્રયાસ કરતી વખતે ચિકલી નદીના તીવ્ર પ્રવાહમાં એક ખડક પર ફસાઈ ગયા હતા. ઘણા કલાકોની જહેમત બાદ, સ્થાનિક લોકોએ દોરડાની મદદથી પાંચેય યુવાનોને બહાર કાઢ્યા.”  

તેમજ વધુ સર્ચ કરતા અમને અમને 28 જૂલાઈ 2022ના રોજ નાલાગઢના એક ફેસબુક એકાઉન્ટ પરથી શેર કરવામાં આવેલી પોસ્ટ મળી. આ પોસ્ટમાં, વાયરલ વીડિયોને લગતા ઘણા વીડિયો હતા, જે અલગ અલગ એંગલથી લેવામાં આવ્યા હતા. જે તમે નીચે જોઈ શકો છો. 

ARCHIVE

આ ક્લુનો ઉપયોગ કરી અમે સર્ચ કરતા અમને દેવભૂમિ મિરર નામના ફેસબુક એકાઉન્ટ પરથી 29 જુલાઈ 2022 ના રોજ કરવામાં આવેલી એક પોસ્ટ પણ મળી, જેમાં કહેવામાં આવ્યું હતું કે ઉત્તર પ્રદેશના પાંચ યુવાનો ગુરૂકુંડની મુલાકાત લેવા આવ્યા હતા, પછી તેઓ સેલ્ફી લેવા માટે નદીમાં ઉતર્યા હતા. દરમિયાન, અચાનક પૂરને કારણે, તેઓ નદીમાં ફસાઈ ગયા. દરમિયાન, બહેરીના રહેવાસી મનોજ કુમાર અને તેમના સંબંધી આનંદ શર્મા, જે ત્યાંથી પસાર થઈ રહ્યા હતા, તેમણે તે યુવાનોને નદીમાં ફસાયેલા જોયા, તેથી તેઓએ સ્થાનિક લોકોની મદદથી અને દોરડાની મદદથી તેમને સુરક્ષિત રીતે બહાર કાઢ્યા. 

ARCHIVE 

આ ઉપરાંત, અમને 28 જૂલાઈ 2022ના રોજ દૈનિક ભાસ્કરની વેબસાઇટ પર પ્રકાશિત થયેલો એક અહેવાલ પણ મળ્યો. વાયરલ વીડિયો સંબંધિત દ્રશ્યો પણ આ અહેવાલમાં હાજર હતા.

પરિણામ

આમ, અમારી પડતાલમાં ઉપરોક્ત પોસ્ટ ખોટી સાબિત થાય છે. કારણ કે, પોસ્ટ સાથે શેર કરવામાં આવેલો આ વીડિયો ઉત્તરકાશી જિલ્લાના ધરાલીનો નહીં પરંતુ ત્રણ વર્ષ પહેલા હિમાચલના સોલન જિલ્લામાં અચાનક આવેલા પૂર દરમિયાનનો છે. હાલની ઘટના સાથે તેને કોઈ લેવા-દેવા નથી.

(જો તમારી પાસે પણ સોશિયલ મિડિયાના માધ્યમથી કોઈ શંકાસ્પદ મેસેજ, પોસ્ટ, ફોટો અને વિડિયો અથવા સમાચાર હોય, તો તેની સત્યતા જાણવા માટે તમે અમને અમારા વોટ્સઅપ ફેક્ટલાઈન નંબર (9049053770) પર મોકલો. અમારા લેટેસ્ટ ફેક્ટ ચેક વાંચવા માટે Facebook, Instagram અને Twitter પર Fact Crescendoને ફોલો કરો.)