જાણો પહેલગામમાં થયેલા આતંકી હુમલામાં મડદા પર બેઠેલા બાળકના વાયરલ થઈ રહેલા વીડિયોનું શું છે સત્ય…

તાજેતરમાં સોશિયલ મીડિયા પર મડદા પર બેઠેલા બાળકનો એક વીડિયો વાયરલ થઈ રહ્યો છે જેની સાથે એવો દાવો કરવામાં આવી રહ્યો છે કે, તાજેતરમાં પહેલગામ ખાતે થયેલા આતંકી હુમલામાં પિતા ગુમાવનાર બાળક પિતાના મડદા પર બેઠો છે તેનો વીડિયો છે. પરંતુ ફેક્ટ ક્રેસેન્ડોની પડતાલમાં આ દાવો ખોટો અને પાયાવિહોણો હોવાનું સાબિત થાય છે કારણ કે, પોસ્ટમાં મડદા પર બેઠેલા બાળકનો જે વીડિયો મૂકવામાં આવ્યો છે એ તાજેતરમાં પહેલાગામ ખાતે થયેલા આતંકી હુમલાનો નહીં પરંતુ વર્ષ 2020માં કાશ્મીર ખાતે થયેલા આતંકી હુમલામાં દાદાના મડદા પર બેઠેલા બાળકનો છે. આ વીડિયો સોશિયલ મીડિયા પર ખોટી માહિતી સાથે લોકોને ગેરમાર્ગે દોરવા વાયરલ કરવામાં આવી રહ્યો છે.

શું દાવો કરવામાં આવી રહ્યો છે.?

એક ફેસબુક યુઝર દ્વારા 23 એપ્રિલ, 2025 ના રોજ એક પોસ્ટ શેર કરવામાં આવી હતી. પોસ્ટમાં મૂકવામાં આવેલા વીડિયોના શીર્ષકમાં એવું લખવામાં આવ્યું છે કે, પહલગામ આતંકવાદી હુમલામાં બાળકે પોતાના પિતા ગુમાવ્યા… બાળકનું રુદન તમારા રૂંવાડા ઊભા કરી દેશે. આ વીડિયો સાથેના લખાણમાં એવો દાવો કરવામાં આવી રહ્યો છે કે, તાજેતરમાં પહેલગામ ખાતે થયેલા આતંકી હુમલામાં પિતા ગુમાવનાર બાળક પિતાના મડદા પર બેઠો છે તેનો વીડિયો છે.

Facebook Post | Archive

FACT CHECK

ઉપરોક્ત પોસ્ટમાં કરવામાં આવેલા દાવાની સત્યતા તપાસવી જરૂરી જણાતાં અમે અમારી પડતાલ/તપાસ કાર્યવાહી શરૂ કરી હતી. તપાસની શરૂઆતમાં અમે પોસ્ટમાં મૂકવામાં આવેલા વડિયોનો એક સ્ક્રીનશોટ લઈ ગુગલ રિવર્સ ઈમેજનો સહારો લઈને સર્ચ કરતાં અમને પોસ્ટમાં મૂકવામાં આવેલો આજ વીડિયો અમને 1 જુલાઈ, 2020ના રોજ ANI ના X હેન્ડલ પર અપલોડ કરવામાં આવ્યો હોવાની માહિતી પ્રાપ્ત થઈ હતી. જેના પરથી એ સ્પષ્ટ સાબિત થાય છે કે, આ વીડિયો તાજેતરનો નથી.

આ વીડિયોના કેપ્શનમાં લખ્યું છે, “સોપોરમાં આતંકવાદી હુમલા દરમિયાન જમ્મુ અને કાશ્મીર પોલીસ 3 વર્ષના બાળકને બચાવે છે અને તેને તેની માતા પાસે લઈ જાય છે. હુમલા દરમિયાન બાળક તેના મૃત સંબંધીની બાજુમાં બેઠો હતો.”

અમારી વધુ તપાસમાં અમને 4 જુલાઈ, 2020ના રોજ પ્રકાશિત થયેલ ‘નેશનલ હેરાલ્ડ‘ નો એક સમાચાર અહેવાલ મળ્યો હતો. આ અહેવાલ મુજબ, આ ઘટના 1 જુલાઈ, 2020ના રોજ કાશ્મીરના સોપોર શહેરમાં બની હતી.

તે દિવસે સવારે 7.30 વાગે બશીર અહમદ ખાન તેમના ત્રણ વર્ષના પૌત્ર સાથે કારમાં ફરવા ગયા હતા, ત્યારે સોપોરમાં સુરક્ષા દળો અને આતંકવાદીઓ વચ્ચે ગોળીબાર ચાલુ હતો.  ગોળીબાર દરમિયાન, બશીરની કાર રસ્તામાં આવી ગઈ અને બશીરને ગોળી વાગી, જેના પરિણામે તેનું મોત નીપજ્યું હતું.

અમને ‘હિન્દુસ્તાન ટાઇમ્સ‘ અને ઇન્ડિયા ટુડેની અધિકૃત યુટ્યુબ ચેનલ પર પણ આ જ વીડિયો મળ્યો હતો જેમાં વાયરલ વીડિયોમાં બાળક કારની અંદર બેઠેલું રડતું જોઈ શકાય છે. સમાચાર અનુસાર, આતંકવાદીઓ દ્વારા ગોળી મારવામાં આવેલા તેના દાદાની બાજુમાં બેઠેલા ત્રણ વર્ષના માસૂમ બાળકને સુરક્ષા દળોએ બચાવી લીધો હતો. આ ઘટનામાં, આતંકવાદીઓ સાથેની આ અથડામણમાં એક સામાન્ય નાગરિક તેમજ એક CRPF જવાન શહીદ થયો હતો.

આતંકવાદી હુમલો – પહેલગામ

22 એપ્રિલના રોજ કાશ્મીરના અનંતનાગ જિલ્લાના પહેલગામના બૈસરન ખીણમાં થયેલા આતંકવાદી હુમલામાં 26 લોકો માર્યા ગયા હતા અને લગભગ 17 લોકો ઘાયલ થયા હતા. માર્યા ગયેલાઓમાં મોટાભાગના પ્રવાસીઓનો સમાવેશ થાય છે. મૃતકોના પરિવારજનોનો આરોપ છે કે, હુમલાખોરોએ ખાસ કરીને હિન્દુ પુરુષ પ્રવાસીઓને તેમના ધર્મ વિશે પૂછીને નિશાન બનાવ્યા હતા. મૃતકોની યાદીમાં એક સ્થાનિક ગાઇડ અને એક વિદેશી નાગરિકનો પણ સમાવેશ થાય છે.

પરિણામ

આમ, અમારી પડતાલમાં ઉપરોક્ત પોસ્ટમાં કરવામાં આવેલો દાવો અધૂરી માહિતી સાથેનો હોવાનું સાબિત થાય છે કારણ કે, પોસ્ટમાં મડદા પર બેઠેલા બાળકનો જે વીડિયો મૂકવામાં આવ્યો છે એ તાજેતરમાં પહેલાગામ ખાતે થયેલા આતંકી હુમલાનો નહીં પરંતુ વર્ષ 2020માં કાશ્મીર ખાતે થયેલા આતંકી હુમલામાં દાદાના મડદા પર બેઠેલા બાળકનો છે. આ વીડિયો સોશિયલ મીડિયા પર ખોટી માહિતી સાથે લોકોને ગેરમાર્ગે દોરવા વાયરલ કરવામાં આવી રહ્યો છે. 

(જો તમારી પાસે પણ સોશિયલ મીડિયાના માધ્યમથી કોઈ શંકાસ્પદ મેસેજ, પોસ્ટ, ફોટો અને વીડિયો અથવા સમાચાર હોય, તો તેની સત્યતા જાણવા માટે તમે અમને અમારા વોટ્સઅપ ફેક્ટલાઈન નંબર (9049053770) પર મોકલો. અમારા લેટેસ્ટ ફેક્ટ ચેક વાંચવા માટે Facebook, Instagram અને Twitter પર Fact Crescendoને ફોલો કરો.)