તાજેતરમાં સોશિયલ મીડિયા પર રંગ બદલતી ગાડીનો એક વીડિયો વાયરલ થઈ રહ્યો છે જેની સાથે એવો દાવો કરવામાં આવી રહ્યો છે કે, સુરતમાં જોવા મળેલી રંગ બદલતી ગાડીનો આ વીડિયો છે. પરંતુ ફેક્ટ ક્રેસેન્ડોની પડતાલમાં આ દાવો ખોટો હોવાનું સાબિત થાય છે કારણ કે, પોસ્ટમાં રંગ બદલતી ગાડીનો જે વીડિયો મૂકવામાં આવ્યો છે એ વાસ્તવિક નહીં પરંતુ સોફ્ટવેરની મદદથી એડિટ કરેલો વીડિયો છે. આ વીડિયો લોકોને ગેરમાર્ગે દોરવા ખોટી માહિતી સાથે સોશિયલ મીડિયા પર વાયરલ કરવામાં આવી રહ્યો છે.
શું દાવો કરવામાં આવી રહ્યો છે.?
એક ફેસબુક યુઝર દ્વારા 19 સપ્ટેમ્બર, 2024 ના રોજ એક પોસ્ટ શેર કરવામાં આવી હતી. પોસ્ટમાં મૂકવામાં આવેલા વીડિયોના શીર્ષકમાં એવું લખવામાં આવ્યું છે કે, રંગ બદલતા કાંચડા જોયા, રંગ બદલતા રાજકિય નેતાઓ જોયા હવે રંગ બદલતા વાહનો જોવા મળશે !. આ વીડિયો સાથેના લખાણમાં એવો દાવો કરવામાં આવી રહ્યો છે કે, સુરતમાં જોવા મળેલી રંગ બદલતી ગાડીનો આ વીડિયો છે.
https://archive.org/details/a9564a72-4a4b-4d6b-a7d3-e0e3ad73d6c7
FACT CHECK
ઉપરોક્ત પોસ્ટમાં કરવામાં આવેલા દાવાની સત્યતા તપાસવી જરૂરી જણાતાં અમે અમારી પડતાલ/તપાસ કાર્યવાહી શરૂ કરી હતી. તપાસની શરૂઆતમાં અમે પોસ્ટમાં મૂકવામાં આવેલા વીડિયોને ધ્યાનથી જોયા બાદ એક સ્ક્રીનશોટ લઈને ગુગલ રિવર્સ ઈમેજના માધ્યમથી સર્ચ કરતાં પોસ્ટમાં મૂકવામાં આવેલો આજ વીડિયો અમને એક ઈન્સ્ટાગ્રામ યુઝર દ્વારા 13 ડિસેમ્બર, 2023 ના રોજ અપલોડ કરવામાં આવ્યો હોવાની પ્રાપ્ત થઈ હતી. આ વીડિયોમાં ક્યાંય પણ ગાડીનો રંગ બદલાતો દેખાતો નથી. જેના પરથી એ સ્પષ્ટ સાબિત થાય છે કે, પોસ્ટમાં મૂકવામાં આવેલો વીડિયો એડિટ કરેલો છે.
અમારી વધુ તપાસમાં અમને આજ વીડિયો વધુ એક ઈન્સ્ટાગ્રામ યુઝર દ્વારા 19 જુલાઈ, 2024 ના રોજ પોસ્ટ કરવામાં આવ્યો હોવાની માહિતી પ્રાપ્ત થઈ હતી. જેમાં આ વીડિયો એડિટેડ હોવાની એક વ્યક્તિ દ્વારા માહિતી આપવામાં આવી છે. જેમાં તમે જોઈ શકો છો કે, જે રીતે ગાડીનો રંગ બદલાય છે એની સાથે પાછળ રહેલી ગાડીની પાછળની લાઈટનો તેમજ બાજુમાંથી પસાર થઈ રહેલા યુવકે પહેરેલી ટીશર્ટનો પણ રંગ બદલાય છે. જેના પરથી એ સ્પષ્ટ સાબિત થાય છે કે, આ વીડિયો કોઈ સોફ્ટવેરની મદદથી એડિટ કરવામાં આવ્યો છે.
નીચે તમે ઓરિજીનલ વીડિયો અને એડિટેડ વીડિયો વચ્ચેનો તફાવત જોઈ શકો છો.
પરિણામ
આમ, અમારી પડતાલમાં ઉપરોક્ત પોસ્ટમાં કરવામાં આવેલો દાવો ખોટો હોવાનું સાબિત થાય છે કારણ કે, પોસ્ટમાં રંગ બદલતી ગાડીનો જે વીડિયો મૂકવામાં આવ્યો છે એ વાસ્તવિક નહીં પરંતુ સોફ્ટવેરની મદદથી એડિટ કરેલો વીડિયો છે. આ વીડિયો લોકોને ગેરમાર્ગે દોરવા ખોટી માહિતી સાથે સોશિયલ મીડિયા પર વાયરલ કરવામાં આવી રહ્યો છે.
(જો તમારી પાસે પણ સોશિયલ મીડિયાના માધ્યમથી કોઈ શંકાસ્પદ મેસેજ, પોસ્ટ, ફોટો અને વીડિયો અથવા સમાચાર હોય, તો તેની સત્યતા જાણવા માટે તમે અમને અમારા વોટ્સઅપ ફેક્ટલાઈન નંબર (9049053770) પર મોકલો. અમારા લેટેસ્ટ ફેક્ટ ચેક વાંચવા માટે Facebook, Instagram અને Twitter પર Fact Crescendoને ફોલો કરો)
