જાણો વડાપ્રધાન નરેન્દ્ર મોદીને મેકઅપ કરી રહેલી માહિલાના વાયરલ થઈ રહેલા વીડિયોનું શું છે સત્ય…

તાજેતરમાં સોશિયલ મીડિયા પર વડાપ્રધાન નરેન્દ્ર મોદીને મેકઅપ કરી રહેલી મહિલાનો એક વીડિયો વાયરલ થઈ રહ્યો છે. જેની સાથે એવો દાવો કરવામાં આવી રહ્યો છે કે, પ્રધાનમંત્રી નરેન્દ્ર મોદી મેકઅપ આર્ટિસ્ટ પાસે તૈયાર થઈ રહ્યા છે તેનો આ વીડિયો છે. પરંતુ ફેક્ટ ક્રેસેન્ડોની પડતાલમાં આ દાવો ખોટો અને પાયાવિહોણો હોવાનું સાબિત થાય છે કારણ કે, પોસ્ટમાં મૂકવામાં આવેલો વીડિયો નરેન્દ્ર મોદીની મેકઅપ આર્ટિસ્ટનો નહીં પરંતુ લંડન સ્થિત ‘મેડમ તુસાદ વેક્સ મ્યુઝિયમ’ની એક મહિલા કર્મચારીનો છે. આ મ્યુઝિયમ ખાતે પ્રધાનમંત્રી નરેન્દ્ર મોદીનું મીણમાંથી પૂતળું બનાવવા માટેની જરૂરી પ્રક્રિયા પૂર્ણ કરવા માટેની તૈયારીનો આ વીડિયો છે. આ વીડિયો સોશિયલ મીડિયા પર ખોટી માહિતી સાથે લોકોને ગેરમાર્ગે દોરવા વાયરલ કરવામાં આવી રહ્યો છે.

શું દાવો કરવામાં આવી રહ્યો છે.?

એક સોશિયલ મીડિયા યુઝર દ્વારા 4 ઓક્ટોબર, 2025ના રોજ એક પોસ્ટ શેર કરવામાં આવી હતી. પોસ્ટમાં મૂકવામાં આવેલા ફોટો સાથેના લખાણમાં એવો દાવો કરવામાં આવી રહ્યો છે કે, પ્રધાનમંત્રી નરેન્દ્ર મોદી મેકઅપ આર્ટિસ્ટ પાસે તૈયાર થઈ રહ્યા છે તેનો આ વીડિયો છે.

Facebook Post | Archive

FACT CHECK

ઉપરોક્ત પોસ્ટમાં કરવામાં આવેલા દાવાની સત્યતા તપાસવી જરૂરી જણાતાં અમે અમારી પડતાલ/તપાસ કાર્યવાહી શરૂ કરી હતી. તપાસની શરૂઆતમાં અમે પોસ્ટમાં મૂકવામાં આવેલા વીડિયોનો એક સ્ક્રીનશોટ લઈ ગુગલ રિવર્સ ઈમેજનો સહારો લઈને સર્ચ કરતાં અમને Madame Tussauds London દ્વારા 16 માર્ચ, 2016 ના રોજ અપલોડ કરવામાં આવેલો એક વીડિયો પ્રાપ્ત થયો હતો. જેમાં પોસ્ટમાં મૂકવામાં આ જ વીડિયોને તમે જોઈ શકો છો. આ વીડિયો સાથે એવી માહિતી આપવામાં આવી હતી કે, 7, લોક કલ્યાણ માર્ગ, નવી દિલ્હી સ્થિત પ્રધાનમંત્રીના નિવાસસ્થાને (જે પહેલા 7, રેસ કેર્સ રોડના નામે ઓળખાતું હતું) મેડમ તુસાદ વેક્સ મ્યુઝિયમના કર્મચારીઓ અને કલાકાર પ્રધાનમંત્રીની મુલાકાતે આવ્યા હતા. આ લોકો મ્યુઝિયમ ખાતે પ્રધાનમંત્રી નરેન્દ્ર મોદીનું મીણમાંથી પૂતળું બનાવવા માટેની જરૂરી પ્રક્રિયા પૂર્ણ કરવા માટે આવ્યા હતા.

પોસ્ટમાં મૂકવામાં આવેલો આ જ વીડિયોના દ્રશ્યો એજ સમયે લેવામાં આવ્યા હતા. જે તમે નીચે જોઈ શકો છો.

મેડમ તુસાદ વેક્સ મ્યુઝિયમ, લંડનમાં સ્થિત મીણના પૂતળાઓનું ખૂબ પ્રખ્યાત સંગ્રહાલય છે. આ સંગ્રહાલયમાં વિશ્વ વિખ્યાત હસ્તીઓનાં મીણનાં પૂતળા બનાવવામાં આવે છે અને બાદમાં તે પ્રદર્શન માટે રાખવામાં આવે છે. ‘મેડમ તુસાદ વેક્સ મ્યુઝિયમ’ ની વિશ્વના 6 ખંડોમાં 23 શહેરોમાં શાખાઓ આવેલી છે. 

આજ માહિતી સાથેનો અન્ય એક વીડિયો પણ અમને પ્રાપ્ત થયો હતો જે તમે અહીં જોઈ શકો છો. Namo Sarkar

અમારી વધુ તપાસમાં અમને ગુજરાતી મીડિયા હાઉસ દ્વારા પણ આજ માહિતી સાથેના સમાચાર પ્રસારિત કરવામાં આવ્યા હોવાની માહિતી પ્રાપ્ત થઈ હતી. જે તમે અહીં જોઈ શકો છો. iamgujarat.com | khabarchhe.com

પરિણામ

આમ, અમારી પડતાલમાં ઉપરોક્ત પોસ્ટમાં કરવામાં આવેલો દાવો ખોટો અને પાયાવિહોણો હોવાનું સાબિત થાય છે કારણ કે, પોસ્ટમાં મૂકવામાં આવેલો વીડિયો નરેન્દ્ર મોદીની મેકઅપ આર્ટિસ્ટનો નહીં પરંતુ લંડન સ્થિત ‘મેડમ તુસાદ વેક્સ મ્યુઝિયમ’ની એક મહિલા કર્મચારીનો છે. આ મ્યુઝિયમ ખાતે પ્રધાનમંત્રી નરેન્દ્ર મોદીનું મીણમાંથી પૂતળું બનાવવા માટેની જરૂરી પ્રક્રિયા પૂર્ણ કરવા માટેની તૈયારીનો આ વીડિયો છે. આ વીડિયો સોશિયલ મીડિયા પર ખોટી માહિતી સાથે લોકોને ગેરમાર્ગે દોરવા વાયરલ કરવામાં આવી રહ્યો છે. 

(જો તમારી પાસે પણ સોશિયલ મીડિયાના માધ્યમથી કોઈ શંકાસ્પદ મેસેજ, પોસ્ટ, ફોટો અને વીડિયો અથવા સમાચાર હોય, તો તેની સત્યતા જાણવા માટે તમે અમને અમારા વોટ્સઅપ ફેક્ટલાઈન નંબર (9049053770) પર મોકલો. અમારા લેટેસ્ટ ફેક્ટ ચેક વાંચવા માટે Facebook, Instagram અને Twitter પર Fact Crescendoને ફોલો કરો.)