જાણો વડોદરામાં એક ઈમારતમાં ભયાનક આગ લાગતાં 100 લોકોના મોત થયા હોવાના નામે વાયરલ થઈ રહેલા વીડિયોનું શું છે સત્ય…

તાજેતરમાં સોશિયલ મીડિયા પર એક બહુમાળી ઈમારતમાં લાગેલી ભયાનક આગનો એક વીડિયો વાયરલ થઈ રહ્યો છે જેની સાથે એવો દાવો કરવામાં આવી રહ્યો છે કે, વડોદરામાં એક બહુમાળી ઈમારતમાં આગ લાગતાં 100 લોકોના મોત થયા. પરંતુ ફેક્ટ ક્રેસેન્ડોની પડતાલમાં આ દાવો ખોટો અને પાયાવિહોણો હોવાનું સાબિત થાય છે કારણ કે, પોસ્ટમાં બહુમાળી ઈમારતમાં લાગેલી ભયાનક આગનો જે વીડિયો મૂકવામાં આવ્યો છે એ વડોદરાનો નહીં પરંતુ ઈરાન ખાતે બનેલી ઘટનાનો છે. આ વીડિયોને ગુજરાતના વડોદરા શહેર સાથે કોઈ જ સંબંધ નથી. આ વીડિયો સોશિયલ મીડિયા પર ખોટી માહિતી સાથે લોકોને ગેરમાર્ગે દોરવા વાયરલ કરવામાં આવી રહ્યો છે.

શું દાવો કરવામાં આવી રહ્યો છે.?

એક સોશિયલ મીડિયા યુઝર દ્વારા 13 ઓક્ટોબર, 2025ના રોજ એક પોસ્ટ શેર કરવામાં આવી હતી. પોસ્ટમાં મૂકવામાં આવેલા વીડિયો સાથેના લખાણમાં એવો દાવો કરવામાં આવી રહ્યો છે કે, વડોદરામાં એક બહુમાળી ઈમારતમાં આગ લાગતાં 100 લોકોના મોત થયા.

Facebook Post | Archive

FACT CHECK

ઉપરોક્ત પોસ્ટમાં કરવામાં આવેલા દાવાની સત્યતા તપાસવી જરૂરી જણાતાં અમે અમારી પડતાલ/તપાસ કાર્યવાહી શરૂ કરી હતી. જો આવી કોઈ 100 લોકોના મોતની ઘટના ગુજરાતમાં બની હોય તો તે એક મોટા સમાચાર હોય માટે અમે તપાસની શરૂઆતમાં ગુગલનો સહારો લઈને સર્ચ કરતાં વડોદરામાં આવી કોઈ જ ઘટના તાજેતરમાં બની હોય એવી કોઈ જ માહિતી પ્રાપ્ત થઈ ન હતી. 

ત્યાર બાદ અમે પોસ્ટમાં મૂકવામાં આવેલા વડિયોનો એક સ્ક્રીનશોટ લઈ ગુગલ રિવર્સ ઈમેજનો સહારો લઈને સર્ચ કરતાં અમને પોસ્ટમાં મૂકવામાં આવેલા આ જ વીડિયો સાથેના સમાચાર hamshahrionline.ir દ્વારા પ્રસારિત કરવામાં આવ્યા હતા. આ વીડિયોમાં એવી માહિતી આપવામાં આવી હતી કે,  ઈરાનમાં આવેલી Sabzevar Cement Buildingમાં આગ લાગતાં 47 જેટલા લોકોના મોત થયા હતા.

અમારી વધુ તપાસમાં અમને આ જ માહિતી અને વીડિયો સાથેના અન્ય સમાચાર પણ પ્રાપ્ત થયા હતા. જે તમે અહીં જોઈ શકો છો. ilna.ir | ifilo.net

BBC News Persian દ્વારા પણ આ જ વીડિયો અને માહિતી સાથેના સમાચાર 18 સપ્ટેમ્બર, 2025ના રોજ પ્રસારિત કરવામાં આવ્યા હતા.

અમારી તપાસને વધુ મજબૂત બનાવવામાટે અમે વડોદરાના સ્થાનિકો તેમજ પત્રકાર સાથે વાત કરતાં તેઓએ અમને જણાવ્યું હતું કે, તાજેતરમાં આવી કોઈ જ ઘટના વડોદરામાં બની નથી અને વાયરલ વીડિયો પણ વડોદરાનો નથી.

પરિણામ

આમ, અમારી પડતાલમાં ઉપરોક્ત પોસ્ટમાં કરવામાં આવેલો દાવો અધૂરી માહિતી સાથેનો હોવાનું સાબિત થાય છે કારણ કે, પોસ્ટમાં બહુમાળી ઈમારતમાં લાગેલી ભયાનક આગનો જે વીડિયો મૂકવામાં આવ્યો છે એ વડોદરાનો નહીં પરંતુ ઈરાન ખાતે બનેલી ઘટનાનો છે. આ વીડિયોને ગુજરાતના વડોદરા શહેર સાથે કોઈ જ સંબંધ નથી. આ વીડિયો સોશિયલ મીડિયા પર ખોટી માહિતી સાથે લોકોને ગેરમાર્ગે દોરવા વાયરલ કરવામાં આવી રહ્યો છે. 

(જો તમારી પાસે પણ સોશિયલ મીડિયાના માધ્યમથી કોઈ શંકાસ્પદ મેસેજ, પોસ્ટ, ફોટો અને વીડિયો અથવા સમાચાર હોય, તો તેની સત્યતા જાણવા માટે તમે અમને અમારા વોટ્સઅપ ફેક્ટલાઈન નંબર (9049053770) પર મોકલો. અમારા લેટેસ્ટ ફેક્ટ ચેક વાંચવા માટે Facebook, Instagram અને Twitter પર Fact Crescendoને ફોલો કરો.)