હિંદુ છોકરી સાથે મુસ્લિમ છોકરાએ લગ્ન કર્યા હોવાનો સ્ક્રિપ્ટેડ વીડિયો વાસ્તવિક ઘટનાના નામે વાયરલ… જાણો શું છે સત્ય….

તાજેતરમાં સોશિયલ મીડિયા પર હિંદુ છોકરી સાથે મુસ્લિમ છોકરાએ પોતાની ઓળખ છુપાવીને લગ્ન કર્યા હોવાનો એક વીડિયો વાયરલ થઈ રહ્યો છે. આ વીડિયો સાથેના લખાણમાં એવો દાવો કરવામાં આવી રહ્યો છે કે, હિંદુ છોકરી સાથે મુસ્લિમ છોકરાએ પોતાની ઓળખ છુપાવીને લગ્ન કર્યા હોવાનો આ એક વાસ્તવિક ઘટનાનો વીડિયો છે. પરંતુ ફેક્ટ ક્રેસેન્ડોની પડતાલમાં આ દાવો ખોટો અને પાયાવિહોણો હોવાનું સાબિત થાય છે કારણ કે, પોસ્ટમાં જે વીડિયો મૂકવામાં આવ્યો છે એ કોઈ વાસ્તવિક ઘટનાનો નહીં પરંતુ કાલ્પનિક રીતે લોકજાગૃતિ માટે બનાવવામાં આવેલો સ્ક્રિપ્ટેડ વીડિયો છે. આ વીડિયોને સોશિયલ મીડિયા પર ભ્રામક અને ખોટી માહિતી સાથે લોકોને ગેરમાર્ગે દોરવા વાયરલ કરવામાં આવી રહ્યો છે.

શું દાવો કરવામાં આવી રહ્યો છે…?

એક સોશિયલ મીડિયા યુઝર દ્વારા 8 સપ્ટેમ્બર, 2025ના રોજ એક પોસ્ટ શેર કરવામાં આવી હતી. પોસ્ટમાં મૂકવામાં આવેલા વીડિયો સાથેના શીર્ષકમાં એવું લખવામાં આવ્યું છે કે, સમાજ ની બહેન દિકરીઓને ચેતવણી આપતો કિસ્સો. પોસ્ટમાં મૂકવામાં આવેલા વીડિયો સાથેના લખાણમાં એવો દાવો કરવામાં આવી રહ્યો છે કે, હિંદુ છોકરી સાથે મુસ્લિમ છોકરાએ પોતાની ઓળખ છુપાવીને લગ્ન કર્યા હોવાનો આ એક વાસ્તવિક ઘટનાનો વીડિયો છે.

Facebook Post | Archive

FACT CHECK

ઉપરોક્ત પોસ્ટમાં કરવામાં આવેલા દાવાની સત્યતા તપાસવી જરૂરી જણાતાં અમે અમારી પડતાલ/તપાસ કાર્યવાહી શરૂ કરી હતી. સૌપ્રથમ અમે પોસ્ટમાં મૂકવામાં આવેલા વીડિયોનો એક સ્ક્રીનશોટ લઈ ગુગલ રિવર્સ ઈમેજના માધ્યમથી સર્ચ કરતાં અમને પોસ્ટમાં મૂકવામાં આવેલા આજ વીડિયોનું લાંબુ સંસ્કરણ મોન્ટી દીપક શર્મા નામના એક યુટ્યુબ પેજ પર પ્રાપ્ત થયું હતું. જેમાં પોસ્ટમાં મૂકવામાં આવેલો આ જ વીડિયો 23 જુલાઈ, 2025ના રોજ અપલોડ કરવામાં આવ્યો હતો.

આ જ પેજ પર અમને પોસ્ટમાં મૂકવામાં આવેલા વીડિયોમાં દેખાતા પાત્રોના અન્ય વીડિયો પણ જોવા મળ્યા હતા. જેના પરથી એ સ્પષ્ટ સાબિત થાય છે કે, આ વીડિયો સ્ક્રિપ્ટેડ છે. વધુમાં અમને એક વીડિયોમાં વચ્ચે એક ડિસ્ક્લેમર પણ જોવા મળ્યું હતું જેમાં એવું લખેલું હતું કે, આ બધા જ વીડિયો સ્ક્રિપ્ટેડ છે જે લોક જાગૃતિ અને મનોરંજનના હેતુથી બનાવવામાં આવ્યા છે.

વધુમાં અમને મોન્ટી દીપક શર્માના ફેસબુક અને ઈન્સ્ટાગ્રામ એકાઉન્ટ પણ પ્રાપ્ત થયા હતા. જેના પર પણ આ પ્રકારના અલગ-અલગ વીડિયો અપલોડ કરવામાં આવ્યા છે.

અમારી તપાસને વધુ મજબૂત બનાવવા માટે અમે ફેસબુક પર આપેલા નંબર પર સંપર્ક કરતાં તેઓએ અમને જણાવ્યું હતું કે, આ તમામ વીડિયો સ્ક્રિપ્ટેડ છે અને એ માત્ર મનોરંજન માટે જ બનાવવામાં આવ્યા છે.

પરિણામ

આમ, અમારી પડતાલમાં ઉપરોક્ત પોસ્ટમાં કરવામાં આવેલો દાવો ભ્રામક હોવાનું સાબિત થાય છે કારણ કે, પોસ્ટમાં જે વીડિયો મૂકવામાં આવ્યો છે એ કોઈ વાસ્તવિક ઘટનાનો નહીં પરંતુ કાલ્પનિક રીતે લોકજાગૃતિ માટે બનાવવામાં આવેલો સ્ક્રિપ્ટેડ વીડિયો છે. આ વીડિયોને સોશિયલ મીડિયા પર ભ્રામક અને ખોટી માહિતી સાથે લોકોને ગેરમાર્ગે દોરવા વાયરલ કરવામાં આવી રહ્યો છે.

(જો તમારી પાસે પણ સોશિયલ મીડિયાના માધ્યમથી કોઈ શંકાસ્પદ મેસેજ, પોસ્ટ, ફોટો અને વીડિયો અથવા સમાચાર હોય, તો તેની સત્યતા જાણવા માટે તમે અમને અમારા વોટ્સઅપ ફેક્ટલાઈન નંબર (9049053770) પર મોકલો. અમારા લેટેસ્ટ ફેક્ટ ચેક વાંચવા માટે Facebook, Instagram અને Twitter પર Fact Crescendoને ફોલો કરો.)