તાજેતરમાં સોશિયલ મીડિયા પર રોડનો એક ફોટો વાયરલ થઈ રહ્યો છે. જેની સાથે એવો દાવો કરવામાં આવી રહ્યો છે કે, ભારતમાં જેણે પણ આ રોડ બનાવ્યો હોય તેને એક એવોર્ડ આપવો જોઈએ. પરંતુ ફેક્ટ ક્રેસેન્ડોની પડતાલમાં આ દાવો ખોટો હોવાનું સાબિત થાય છે કારણ કે, પોસ્ટમાં રોડનો જે ફોટો મૂકવામાં આવ્યો છે એ વર્ષ 2023થી સોશિયલ મીડિયા પર ઉપલબ્ધ છે અને આ રોડ ભારતનો નહીં પરંતુ બલ્ગેરિયા દેશના એક શહેરમાં બનેલા રોડનો છે. આ ફોટોને હાલની પરિસ્થિતિ કે ભારત દેશ સાથે કોઈ જ સંબંધ નથી. આ ફોટો સોશિયલ મીડિયા પર ખોટી માહિતી સાથે લોકોને ગેરમાર્ગે દોરવા વાયરલ કરવામાં આવી રહ્યો છે.
શું દાવો કરવામાં આવી રહ્યો છે.?
એક સોશિયલ મીડિયા યુઝર દ્વારા 23 ઓગસ્ટ, 2025ના રોજ એક પોસ્ટ શેર કરવામાં આવી હતી. પોસ્ટમાં મૂકવામાં આવેલા ફોટો સાથેના લખાણમાં એવો દાવો કરવામાં આવી રહ્યો છે કે, ભારતમાં જેણે પણ આ રોડ બનાવ્યો હોય તેને એક એવોર્ડ આપવો જોઈએ. પોસ્ટની નીચે કરવામાં આવેલી કોમેન્ટમાં તમે જોઈ શકો છો કે, લોકો આ રોડ ભારતમાં ભાજપ સરકારે બનાવ્યો હોય એવું માની રહ્યા છે.
FACT CHECK
ઉપરોક્ત પોસ્ટમાં કરવામાં આવેલા દાવાની સત્યતા તપાસવી જરૂરી જણાતાં અમે અમારી પડતાલ/તપાસ કાર્યવાહી શરૂ કરી હતી. તપાસની શરૂઆતમાં અમે પોસ્ટમાં મૂકવામાં આવેલા ફોટોને ધ્યાનથી જોયા બાદ ગુગલ રિવર્સ ઈમેજનો સહારો લઈ સર્ચ કરતાં અમને પોસ્ટમાં મૂકવામાં આવેલા આ જ ફોટો સાથેના સમાચાર એક બલ્ગેરિયન વેબસાઈટ btvnovinite.bg દ્વારા 13 ઓક્ટોમ્બર, 2023ના રોજ પ્રસારિત કરવામાં આવ્યા હોવાની માહિતી પ્રાપ્ત થઈ હતી. જેમાં એવી માહિતી આપવામાં આવી હતી કે, આ ફોટો બલ્ગેરિયાના ડ્રૈગાલેવત્સી નામના શહેરમાં કરવામાં આવેલા ડામર કામનો છે.
અહેવાલો અનુસાર, રોડ બનાવનારાઓએ આ રસ્તા પર રેલ્વે ટ્રેકની જેમ ડામર નાખ્યો છે. સ્થાનિક લોકો એમ પણ કહે છે કે, જો તમે તેને પાવડા વગર હાથથી દબાવો છો, પછી રસ્તા પરનો ડામર તૂટી જશે. કોઈને ખબર નથી કે, આ રસ્તો આ રીતે કેમ બનાવવામાં આવ્યો હતો. બલ્ગેરિયાના અન્ય મીડિયા સંગઠનોએ પણ આ જ સમાચાર આપ્યા છે.
અમારી વધુ તપાસમાં અમને 17 ઓક્ટોબર, 2023ના રોજ એક ફેસબુક પેજ પર આ વાયરલ રસ્તાની ઘણી તસવીરો શેર કરવામાં આવી હતી. આ તસવીરોમાંથી એક આ વિસ્તારના નકશાની છે, જેમાં આ રસ્તા તેમજ આસપાસના રસ્તાઓ વિશે બલ્ગેરિયન ભાષામાં માહિતી આપવામાં આવી છે.
પરિણામ
આમ, અમારી પડતાલમાં ઉપરોક્ત પોસ્ટમાં કરવામાં આવેલો દાવો ખોટો અને પાયાવિહોણો હોવાનું સાબિત થાય છે કારણ કે, પોસ્ટમાં રોડનો જે ફોટો મૂકવામાં આવ્યો છે એ વર્ષ 2023થી સોશિયલ મીડિયા પર ઉપલબ્ધ છે અને આ રોડ ભારતનો નહીં પરંતુ બલ્ગેરિયા દેશના એક શહેરમાં બનેલા રોડનો છે. આ ફોટોને હાલની પરિસ્થિતિ કે ભારત દેશ સાથે કોઈ જ સંબંધ નથી. આ ફોટો સોશિયલ મીડિયા પર ખોટી માહિતી સાથે લોકોને ગેરમાર્ગે દોરવા વાયરલ કરવામાં આવી રહ્યો છે.
(જો તમારી પાસે પણ સોશિયલ મીડિયાના માધ્યમથી કોઈ શંકાસ્પદ મેસેજ, પોસ્ટ, ફોટો અને વીડિયો અથવા સમાચાર હોય, તો તેની સત્યતા જાણવા માટે તમે અમને અમારા વોટ્સઅપ ફેક્ટલાઈન નંબર (9049053770) પર મોકલો. અમારા લેટેસ્ટ ફેક્ટ ચેક વાંચવા માટે Facebook, Instagram અને Twitter પર Fact Crescendoને ફોલો કરો.)
Title:જાણો ભારતમાં બનેલા રોડના નામે વાયરલ થઈ રહેલા ફોટોનું શું છે સત્ય…
Fact Check By: Vikas VyasResult:Missing Context
