જાણો ભાજપના નેતા હાર્દિક પટેલના નામે વાયરલ થઈ રહેલા વીડિયોનું શું છે સત્ય…

તાજેતરમાં સોશિયલ મીડિયા પર ભાજપના નેતા હાર્દિક પટેલના નિવેદનનો એક વીડિયો વાયરલ થઈ રહ્યો છે જેની સાથે એવો દાવો કરવામાં આવી રહ્યો છે કે, તાજેતરમાં ભાજપના નેતા હાર્દિક પટેલ ફરી એકવાર અનામત મુદ્દે સરકારની સામે મેદાને પડ્યા છે તેનો આ વીડિયો છે. પરંતુ ફેક્ટ ક્રેસેન્ડોની પડતાલમાં આ દાવો ખોટો હોવાનું સાબિત થાય છે કારણ કે, પોસ્ટમાં ભાજપના નેતા હાર્દિક પટેલના નિવેદનનો જે વીડિયો મૂકવામાં આવ્યો છે એ તાજેતરનો નહીં પરંતુ વર્ષ 2017માં જ્યારે ગુજરાતમાં પાટીદાર અનામત આંદોલન થયું હતું એ સમયે હાર્દિક પટેલે હિંમતનગર ખાતે એક હુંકાર સભામાં આપેલા નિવેદનનો છે. આ વીડિયોને તાજેતરની પરિસ્થિતિ સાથે કોઈ જ સંબંધ નથી. લોકોને ગેરમાર્ગે દોરવા માટે વીડિયો ખોટી માહિતી સાથે સોશિયલ મીડિયા પર વાયરલ કરવામાં આવી રહ્યો છે.

શું દાવો કરવામાં આવી રહ્યો છે.?

એક ફેસબુક યુઝર દ્વારા 28 માર્ચ, 2025ના રોજ એક પોસ્ટ શેર કરવામાં આવી હતી. પોસ્ટમાં મૂકવામાં આવેલા વીડિયો સાથેના લખાણમાં એવો દાવો કરવામાં આવી રહ્યો છે કે, તાજેતરમાં ભાજપના નેતા હાર્દિક પટેલ ફરી એકવાર અનામત મુદ્દે સરકારની સામે મેદાને પડ્યા છે તેનો આ વીડિયો છે.

Facebook Post | Archive

FACT CHECK

ઉપરોક્ત પોસ્ટમાં કરવામાં આવેલા દાવાની સત્યતા તપાસવી જરૂરી જણાતાં અમે અમારી પડતાલ/તપાસ કાર્યવાહી શરૂ કરી હતી. તપાસની શરૂઆતમાં અમે પોસ્ટમાં મૂકવામાં આવેલા વીડિયોને ધ્યાનથી જોયા બાદ વીડિયોનો એક સ્ક્રીનશોટ લઈને ગુગલ રિવર્સ ઈમેજનો સહારો લઈને સર્ચ કરતાં અમને આજ વીડિયોમાં હાર્દિક પટેલે પહેરેલા કપડાં સાથેના સમાચાર GSTV NEWS દ્વારા 17 જાન્યુઆરી, 2017ના રોજ પ્રસારિત કરવામાં આવ્યા હોવાની માહિતી પ્રાપ્ત થઈ હતી. જેમાં એવી માહિતી આપવામાં આવી હતી કે, હાર્દિક પટેલે હિંમતનગરની એક રેલીમાં સંબોધન કર્યું કે, જો અમને અનામત નહીં આપવામાં આવે તો મે તે છીનવી લઈશું.

ઉપરોક્ત સમાચારમાં અમને વાયરલ વીડિયો પ્રાપ્ત ન થતાં અમે અમારી તપાસને આગળ વધારી ગુગલનો સહારો લઈને જુદા-જુદા કીવર્ડથી સર્ચ કરતાં અમને હિંમતનગરમાં યોજાયેલી આ સભાનો સંપૂર્ણ વીડિયો દીપ ન્યૂઝ દ્વારા 15 જૂન, 2017 ના રોજ તેના યુટ્યુબ પર અપલોડ કરવામાં આવ્યો હોવાની માહિતી પ્રાપ્ત થઈ હતી. જેમાં તમે વાયરલ વીડિયો 4.30 મિનિટથી 4.40 મિનિટ સુધી જોઈ શકો છો. જેના પરથી એ સ્પષ્ટ સાબિત થાય છે કે, વાયરલ વીડિયો જૂનો છે.

હવે એ પણ જાણવું જરુરી હતું કે, હાર્દિક પટેલ ભાજપમાં ક્યારે જોડાયા?

તપાસમાં અમને ટીવી9 ગુજરાતી દ્વારા 2 જૂન, 2022ના રોજ પ્રસારિત કરવામાં આવેલા સમાચાર પ્રાપ્ત થયા હતા. જેમાં એવી માહિતી આપવામાં આવી હતી કે, હાર્દિક પટેલ સત્તાવાર રીતે ભાજપમાં જોડાયા. જેના પરથી એ સ્પષ્ટ સાબિત થાય છે કે, વાયરલ વીડિયો હાર્દિક પટેલના ભાજપમાં જોડાયાના ઘણા વર્ષો પહેલાંનો છે.

પરિણામ

આમ, અમારી પડતાલમાં ઉપરોક્ત પોસ્ટમાં કરવામાં આવેલો દાવો અધૂરી માહિતી સાથેનો હોવાનું સાબિત થાય છે કારણ કે, પોસ્ટમાં ભાજપના નેતા હાર્દિક પટેલના નિવેદનનો જે વીડિયો મૂકવામાં આવ્યો છે એ તાજેતરનો નહીં પરંતુ વર્ષ 2017માં જ્યારે ગુજરાતમાં પાટીદાર અનામત આંદોલન થયું હતું એ સમયે હાર્દિક પટેલે હિંમતનગર ખાતે એક હુંકાર સભામાં આપેલા નિવેદનનો છે. આ વીડિયોને તાજેતરની પરિસ્થિતિ સાથે કોઈ જ સંબંધ નથી. લોકોને ગેરમાર્ગે દોરવા માટે વીડિયો ખોટી માહિતી સાથે સોશિયલ મીડિયા પર વાયરલ કરવામાં આવી રહ્યો છે. 

(જો તમારી પાસે પણ સોશિયલ મીડિયાના માધ્યમથી કોઈ શંકાસ્પદ મેસેજ, પોસ્ટ, ફોટો અને વીડિયો અથવા સમાચાર હોય, તો તેની સત્યતા જાણવા માટે તમે અમને અમારા વોટ્સઅપ ફેક્ટલાઈન નંબર (9049053770) પર મોકલો. અમારા લેટેસ્ટ ફેક્ટ ચેક વાંચવા માટે Facebook, Instagram અને Twitter પર Fact Crescendoને ફોલો કરો)