તાજેતરમાં સોશિયલ મીડિયા પર પોલીસની PCR વાનમાં બિયર પી રહેલા વ્યક્તિનો એક વીડિયો વાયરલ થઈ રહ્યો છે જેની સાથે એવો દાવો કરવામાં આવી રહ્યો છે કે, અમદાવાદ પોલીસની PCR વાનમાં આરોપી બિયર પી રહ્યો છે. પરંતુ ફેક્ટ ક્રેસેન્ડોની પડતાલમાં આ દાવો ખોટો હોવાનું સાબિત થાય છે કારણ કે, પોસ્ટમાં પોલીસની PCR વાનમાં બિયર પી રહેલા વ્યક્તિનો જે વીડિયો મૂકવામાં આવ્યો છે એ અમદાવાદનો નહીં પરંતુ મહેસાણાનો જૂનો વીડિયો છે. આ વીડિયોને અમદાવાદ કે હાલની પરિસ્થિતિ સાથે કોઈ જ સંબંધ નથી. લોકોને ગેરમાર્ગે દોરવા માટે વીડિયોને ખોટી માહિતી સાથે સોશિયલ મીડિયા પર વાયરલ કરવામાં આવી રહ્યો છે.
શું દાવો કરવામાં આવી રહ્યો છે.?
એક ફેસબુક યુઝર દ્વારા 13 જુલાઈ, 2024 ના રોજ એક પોસ્ટ શેર કરવામાં આવી હતી. પોસ્ટમાં મૂકવામાં આવેલા વીડિયોના શીર્ષકમાં એવું લખવામાં આવ્યું છે કે, વાહ રે અમદાવાદ પોલીસ તમારી સેવા ચાકરી! પીસીઆર વાનમાં આરોપીએ બીયર પીધું, વીડિયો વાયરલ. આ વીડિયો સાથે એવો દાવો કરવામાં આવી રહ્યો છે કે, અમદાવાદ પોલીસની PCR વાનમાં આરોપી બિયર પી રહ્યો છે.
FACT CHECK
ઉપરોક્ત પોસ્ટમાં કરવામાં આવેલા દાવાની સત્યતા તપાસવી જરૂરી જણાતાં અમે અમારી પડતાલ/તપાસ કાર્યવાહી શરૂ કરી હતી. તપાસની શરૂઆતમાં અમે પોસ્ટમાં મૂકવામાં આવેલા વીડિયોને ધ્યાનથી જોયા બાદ તેનો એક સ્ક્રીનશોટ લઈને સર્ચ કરતાં અમને પોસ્ટમાં મૂકવામાં આવેલા આજ વીડિયો અંગે ખુલાસો કરતી એક ટ્વિટ અમદાવાદ પોલીસના ટ્વિટર સત્તાવાર ટ્વિટર પર 12 જુલાઈ, 2024 ના રોજ કરવામાં આવી હોવાની માહિતી પ્રાપ્ત થઈ હતી. જેમાં એવી માહિતી આપવામાં આવી હતી કે, અમદાવાદ શહેરમાં પીસીઆરમાં આરોપી બિયર પી રહ્યો છે તેવો વિડિયો વાયરલ થયેલ તે અંગે તપાસ કરતા આ વિડીયો અમદાવાદ શહેરનો હોવાનું જણાઈ આવેલ નથી.અમદાવાદ શહેર પોલીસની છબી ખરડાય તે હેતુસર આ વિડીયો વાયરલ કરવામાં આવી રહ્યો છે.
અમારી વધુ તપાસમાં અમને આજ વીડિયો અંગે વધુ એક સ્પષ્ટતા કરતી ટ્વિટ મહેસાણા પોલીસના એસપી દ્વારા પણ 12 જુલાઈના રોજ કરવામાં આવી હતી. જેમાં તેઓએ જણાવ્યું હતું કે, “વાયરલ થઈ રહેલો આ વીડિયો વર્ષ 2022 માં મહેસાણાના સાંથલ પોલીસ સ્ટોશનની હદ વિસ્તારમાં ઉતારવામાં આવ્યો હતો. જેમાં બિયર પી રહેલા વ્યક્તિનું નામ જોરાવરસિંહ ઉર્ફે ભાયલુભા બાપુભા ઝાલા રહે. કટોસણ, તા. જોટાણા અને જિલ્લો. મહેસાણાનો હોવાનું જાણવા મળેલ છે. આ વ્યક્તિ હાલમાં દેત્રોજ પોલીસ સ્ટેશન અમદાવાદ ગ્રામ્યના ખૂનના કેસમાં સાબરમતી જેલમાં છે.”
અમારી વધુ તપાસમાં અમને વાયરલ થઈ રહેલો વીડિયો અમદાવાદ પોલીસનો ન હોવાની સ્પષ્ટતા કરવા અંગેના સમાચાર મુંબઈ સમાચાર દ્વારા 13 જુલાઈ, 2024 ના રોજ પ્રસારિત કરવામાં આવ્યા હોવાની માહિતી પ્રાપ્ત થઈ હતી.
આજ વીડિયો અને માહિતી સાથેના અન્ય સમાચાર પણ અમને પ્રાપ્ત થયા હતા. જે તમે અહીં જોઈ શકો છો. mirchinews.co.in | divyabhaskar.co.in
પરિણામ
આમ, અમારી પડતાલમાં ઉપરોક્ત પોસ્ટમાં કરવામાં આવેલો દાવો ખોટો હોવાનું સાબિત થાય છે કારણ કે, પોસ્ટમાં પોલીસની PCR વાનમાં બિયર પી રહેલા વ્યક્તિનો જે વીડિયો મૂકવામાં આવ્યો છે એ અમદાવાદનો નહીં પરંતુ મહેસાણાનો જૂનો વીડિયો છે. આ વીડિયોને અમદાવાદ કે હાલની પરિસ્થિતિ સાથે કોઈ જ સંબંધ નથી. લોકોને ગેરમાર્ગે દોરવા માટે વીડિયોને ખોટી માહિતી સાથે સોશિયલ મીડિયા પર વાયરલ કરવામાં આવી રહ્યો છે.
(જો તમારી પાસે પણ સોશિયલ મીડિયાના માધ્યમથી કોઈ શંકાસ્પદ મેસેજ, પોસ્ટ, ફોટો અને વીડિયો અથવા સમાચાર હોય, તો તેની સત્યતા જાણવા માટે તમે અમને અમારા વોટ્સઅપ ફેક્ટલાઈન નંબર (9049053770) પર મોકલો. અમારા લેટેસ્ટ ફેક્ટ ચેક વાંચવા માટે Facebook, Instagram અને Twitter પર Fact Crescendoને ફોલો કરો)
Title:જાણો પોલીસની PCR વાનમાં બિયર પી રહેલા આરોપીના વાયરલ થઈ રહેલા વીડિયોનું શું છે સત્ય…
Fact Check By: Vikas VyasResult: Missing Context
