શું ખરેખર બિહાર ચૂંટણી પ્રચાર દરમિયાન ભાજપાના ધારાસભ્ય પરના હુમલાનો વીડિયો છે…? જાણો શું છે સત્ય….

આ વીડિયોનો બિહાર ચૂંટણી સાથે કોઈ સંબંધ નથી. આ વીડિયો બિહારનો નથી, પરંતુ પશ્ચિમ બંગાળનો છે. પૂરગ્રસ્ત વિસ્તારનું મૂલ્યાંકન કરવા ગયેલા ભાજપના નેતાઓ પર કેટલાક લોકોએ હુમલો કર્યો હતો.

બિહાર ચૂંટણીની તારીખોની જાહેરાત થઈ ત્યારથી, બધા રાજકીય પક્ષો તૈયારીમાં લાગી ગયા છે. આ પૃષ્ટભૂમિ પર અનેક સાચા-ખોટા વીડિયો સોશિયલ મીડિયામાં વાયરલ થઈ રહ્યા છે. જેમાં કેટલાક લોકો વાહન પર હુમલો કરતા હોય તેવો એક વીડિયો સોશિયલ મીડિયા પર વાયરલ થઈ રહ્યો છે. આ વીડિયોને શેર કરીને દાવો કરવામાં આવી રહ્યો છે કે, “આ બિહારનો છે, જ્યાં પ્રચાર કરી રહેલા ભારતીય જનતા પાર્ટીના નેતાઓનો જનતા દ્વારા પીછો કરવામાં આવ્યો હતો અને માર મારવામાં આવ્યો હતો.”

શું દાવો કરવામાં આવી રહ્યો છે.?

સોશિયલ મીડિયા યુઝર્સ દ્વારા તારીખ 13 ઓક્ટોબર 2025ના એક પોસ્ટ શેર કરવામાં આવી હતી. આ પોસ્ટમાં દાવો કરવામાં આવ્યો હતો કે, “આ બિહારનો છે, જ્યાં પ્રચાર કરી રહેલા ભારતીય જનતા પાર્ટીના નેતાઓનો જનતા દ્વારા પીછો કરવામાં આવ્યો હતો અને માર મારવામાં આવ્યો હતો.”

Facebook | Fb post Archive 

FACT CHECK

ઉપરોક્ત પોસ્ટમાં કરવામાં આવેલા દાવાની સત્યતા તપાસવી જરૂરી જણાતા અમે અમારી પડતાલ/તપાસ કાર્યવાહી શરૂ કરી હતી. 

સૌપ્રથમ અમે ગૂગલ રિવર્સ ઈમેજના માધ્યમથી સર્ચ કરતા અમને ઘણા પરિણામો પ્રાપ્ત થયા હતા. ઉપરોક્ત પરિણામો પરથી અમને ‘BANGLA TIMES’ નામની યુટ્યુબ ચેનલ પર વાયરલ વીડિયોનું લાંબું વર્ઝન મળ્યું. આ વીડિયો 6 ઓક્ટોબર, 2025 ના રોજ શેર કરવામાં આવ્યો હતો. ઉપલબ્ધ માહિતી અનુસાર, “નાગરકાટામાં પૂર પીડિતો પર લોકોનો ગુસ્સો ફાટી નીકળ્યો! રાહતની માંગ કરી રહેલા ગુસ્સે ભરાયેલા લોકોએ ભાજપના ધારાસભ્યોને ઘેરી લીધા અને માર માર્યો. એક ધારાસભ્યનું માથું પણ લાકડીથી ફોડી નાખવામાં આવ્યું. વિસ્તારમાં હિંસા ઝડપથી વધી. સ્થાનિક સૂત્રોના જણાવ્યા અનુસાર, લોકો ગુસ્સે છે કે પૂરગ્રસ્ત વિસ્તારોમાં લાંબા સમયથી રાહત પહોંચી નથી.”

તેમજ વધુ સર્ચ કરતા અમને 6 ઓક્ટોબર, 2025 ના રોજ TV9 ની સત્તાવાર યુટ્યુબ ચેનલ પર અપલોડ કરાયેલો વાયરલ વીડિયો મળ્યો. કેપ્શનમાં લખ્યું છે, “પશ્ચિમ બંગાળમાં ભાજપ સાંસદ પર હુમલો. ભાજપ સાંસદ લોહીથી લથપથ… બંગાળમાં અશાંતિ!”

તેમજ વધુ સર્ચ કરતા દૈનિક ભાસ્કરનો એક અહેવાલ પ્રાપ્ત થયો હતો. જેની સાથે માહિતી આપવામાં આવી હતી કે, “પશ્ચિમ બંગાળના જલપાઈગુડીમાં ભાજપના સાંસદ ખગેન મુર્મુ પર હુમલો કરવામાં આવ્યો હતો. આ હુમલામાં ભાજપના નેતા ગંભીર રીતે ઘાયલ થયા હતા. તેમને માથામાં ગંભીર ઈજા થઈ હતી, જેના કારણે તેમનો આખો ચહેરો લોહીથી લથપથ થઈ ગયો હતો. આ ઘટના ઉત્તર બંગાળમાં સ્થિત માલદાના નાગરકાટામાં બની હતી. ભાજપના સાંસદ ખગેન મુર્મુનો કાફલો ત્યાંથી પસાર થઈ રહ્યો હતો ત્યારે ટોળાએ તેમના પર પથ્થરો, ચંપલ, જૂતા અને લાકડીઓથી હુમલો કરવાનું શરૂ કર્યું. ખગેનને માથામાં ઈજા થઈ હતી, પરંતુ ધારાસભ્ય શંકર ઘોષ બચી ગયા હતા.”

પરિણામ

આમ, અમારી પડતાલમાં ઉપરોક્ત પોસ્ટ ખોટી સાબિત થાય છે. કારણ કે, પોસ્ટ સાથે શેર કરવામાં આવેલો વીડિયો બિહારનો નથી. આ વીડિયોને બિહાર ચૂંટણી સાથે કોઈ લેવા-દેવા નથી. આ વીડિયો પશ્ચિમ બંગાળનો છે. પૂરગ્રસ્ત વિસ્તારનું મૂલ્યાંકન કરવા ગયેલા ભાજપના નેતાઓ પર કેટલાક લોકોએ હુમલો કર્યો હતો. 

(જો તમારી પાસે પણ સોશિયલ મિડિયાના માધ્યમથી કોઈ શંકાસ્પદ મેસેજ, પોસ્ટ, ફોટો અને વિડિયો અથવા સમાચાર હોય, તો તેની સત્યતા જાણવા માટે તમે અમને અમારા વોટ્સઅપ ફેક્ટલાઈન નંબર (9049053770) પર મોકલો. અમારા લેટેસ્ટ ફેક્ટ ચેક વાંચવા માટે Facebook, Instagram અને Twitter પર Fact Crescendoને ફોલો કરો.)