ડો. કાકોલી ઘોષનો સંસદમાં ઠપકો આપતો એડિટેડ વીડિયો વાયરલ, જાણો શું છે સત્ય…

સંસદમાં મહિલા સાંસદને ગાળો ભાંડવાનો વીડિયો સોશિયલ મીડિયા પર વાયરલ થઈ રહ્યો છે. તેમાં કેન્દ્રીય ગૃહમંત્રી અમિત શાહ પણ દેખાઈ રહ્યા છે. વીડિયોમાં મહિલા સાંસદ મોંઘવારી મુદ્દે ગૃહમાં પોતાનો મત રજૂ કરતી જોવા મળે છે. આ વીડિયોને શેર કરીને દાવો કરી રહ્યા છે કે, “મહિલા સાંસદ દ્વારા ઠપકો આપ્યા બાદ અમિત શાહ બેસી ગયા.”

શું દાવો કરવામાં આવી રહ્યો છે.?

સોશિયલ મીડિયા યુઝર્સ દ્વારા તારીખ 29 ઓક્ટોબર 2024ના એક પોસ્ટ શેર કરવામાં આવી હતી. આ પોસ્ટમાં દાવો કરવામાં આવ્યો હતો કે, “મહિલા સાંસદ દ્વારા ઠપકો આપ્યા બાદ અમિત શાહ બેસી ગયા.”

Facebook | Fb video archive

FACT CHECK

ઉપરોક્ત પોસ્ટમાં કરવામાં આવેલા દાવાની સત્યતા તપાસવી જરૂરી જણાતા અમે અમારી પડતાલ/તપાસ કાર્યવાહી શરૂ કરી હતી. 

સૌપ્રથમ અમે પહેલા મહિલા સાંસદના વીડિયોને ગૂગલ રિવર્સ ઈમેજના માધ્યમથી સર્ચ કરતા અમને 1 ઓગસ્ટ 2022ના રોજ લોકસભાની કાર્યવાહીનો વીડિયો સંસદ ટીવીની યુટ્યુબ ચેનલ પર અપલોડ કરવામાં આવ્યો છે. જેમાં તૃણમૂલ કોંગ્રેસના સાંસદ ડો.કાકોલી ઘોષ દસ્તીદાર મોંઘવારી મુદ્દે બોલતા જોઈ શકાય છે. આમાં, 12:30 મિનિટ પછી વાયરલ વીડિયોનો એક ભાગ જોઈ શકાય છે. આમાં અમિત શાહને બતાવવામાં આવ્યા નથી.

આ વીડિયો 1 ઓગસ્ટ 2022ના રોજ ઓલ ઈન્ડિયા તૃણમૂલ કોંગ્રેસ (AITC)ની યુટ્યુબ ચેનલ પર પણ અપલોડ કરવામાં આવ્યો છે. 

આ પછી, અમે અમિત શાહના વીડિયોનો સ્ક્રીનશોટ લીધો અને તેને ગૂગલ રિવર્સ ઈમેજના માધ્યમથી સર્ચ કરતા અમને અમિત શાહનો આ વીડિયો સંસદ ટીવીની વેબસાઈટ પર જોઈ શકાય છે. તે 7 ફેબ્રુઆરી 2022ના રોજ અપલોડ કરવામાં આવ્યો હતો. જેમાં અમિત શાહ અસદુદ્દીન ઓવૈસીના કાફલા પર થયેલા હુમલા અંગે રાજ્યસભામાં બોલતા બતાવવામાં આવ્યા છે. વીડિયોના છેલ્લા ભાગમાં વાયરલ ક્લિપ જોઈ શકાય છે. 

રાજ્યસભાની કાર્યવાહીનો ભાગ ભારતીય જનતા પાર્ટી (BJP)ની યુટ્યુબ ચેનલ પર પણ જોઈ શકાય છે. આ પણ 7 ફેબ્રુઆરી 2022 ના રોજ અપલોડ કરવામાં આવ્યું છે.

આમ, સ્પષ્ટ થાય છે કે, વાયરલ વીડિયો બે અલગ-અલગ ભાગને જોડીને બનાવવામાં આવ્યો છે. 

પરિણામ

આમ, અમારી પડતાલમાં ઉપરોક્ત પોસ્ટ ખોટી સાબિત થાય છે. કારણ કે, મહિલા સાંસદ ડૉ.કાકોલી ઘોષની વીડિયો લોકસભાની કાર્યવાહીનો છે, જ્યારે અમિત શાહનો વીડિયો રાજ્યસભાની કાર્યવાહીનો છે. બે અલગ-અલગ વીડિયોને જોડીને એડિટ કરી ખોટા દાવા સાથે વાયરલ કરવામાં આવી રહ્યો છે.

(જો તમારી પાસે પણ સોશિયલ મિડિયાના માધ્યમથી કોઈ શંકાસ્પદ મેસેજ, પોસ્ટ, ફોટો અને વિડિયો અથવા સમાચાર હોય, તો તેની સત્યતા જાણવા માટે તમે અમને અમારા વોટ્સઅપ ફેક્ટલાઈન નંબર (9049053770) પર મોકલો. અમારા લેટેસ્ટ ફેક્ટ ચેક વાંચવા માટે Facebook, Instagram અને Twitter પર Fact Crescendoને ફોલો કરો.)