શું ખરેખર અમેરિકામાં લોકો દ્વારા ટ્રમ્પ સહિતન લીડર વિરૂદ્ધમાં પ્રદર્શન કરવામાં આવ્યુ…? જાણો શું છે સત્ય….

ફેક્ટ ક્રેસન્ડોની પડતાલમાં આ દાવો ખોટો સાબિત થાય છે. કારણ કે, આ વીડિયો નવેમ્બર 2021માં સ્કોટલેન્ડના ગ્લાસગોનો છે. જેમાં એક પર્યાવરણીય સંગઠન દ્વારા વિરોધ પ્રદર્શન કરવામાં આવ્યુ હતુ.

હાલમાં એક વિડિયો સોશિયલ મીડિયા પર ખૂબ જ વાયરલ થઈ રહ્યો છે. જે વીડિયોમાં પીએમ નરેન્દ્ર મોદી સહિત દુનિયાના ઘણા પ્રમુખ નેતાઓના મોંઢા અને હથકડી પહેરી પ્રદર્શન કરતા જોઈ શકાય છે. આ વીડિયોને શેર કરીને દાવો કરવામાં આવી રહ્યો છે કે, “અમેરિકામાં આ નેતાઓને તાનશાહ ગણાવી વિરોધ પ્રદર્શન કરવામાં આવ્યુ.”

શું દાવો કરવામાં આવી રહ્યો છે.?

સોશિયલ મીડિયા યુઝર્સ દ્વારા તારીખ 12 એપ્રિલ 2025ના એક પોસ્ટ શેર કરવામાં આવી હતી. આ પોસ્ટમાં દાવો કરવામાં આવ્યો હતો કે, “અમેરિકામાં આ નેતાઓને તાનશાહ ગણાવી વિરોધ પ્રદર્શન કરવામાં આવ્યુ.”

Facebook | Fb post Archive | Fb video archive

FACT CHECK

ઉપરોક્ત પોસ્ટમાં કરવામાં આવેલા દાવાની સત્યતા તપાસવી જરૂરી જણાતા અમે અમારી પડતાલ/તપાસ કાર્યવાહી શરૂ કરી હતી. 

સૌપ્રથમ અમે ગૂગલ રિવર્સ ઈમેજના માધ્યમથી સર્ચ કરતા અમને ઘણા પરિણામો પ્રાપ્ત થયા હતા. 

ઉપરોક્ત પરિણામો પરથી અમને Global News ની ઓફિશિયલ યુટ્યુબ ચેનલ પર શેર કરવામાં આવેલો વીડિયો પ્રાપ્ત થયો હતો. જે વીડિયો 3 નવેમ્બર 2021ના શેર કરવામાં આવ્યો હતો. જેની સાથે માહિતી આપવામાં આવી હતી કે, “સ્વીડિશ કાર્યકર્તા ગ્રેટા થનબર્ગના ‘ફ્રાઈડેઝ ફોર ફ્યુચર’ અને અન્ય ઘણા સંગઠનોએ સ્કોટલેન્ડના ગ્લાસગોમાં આબોહવા સંકટ સામે વિરોધ પ્રદર્શન કર્યું. દરમિયાન, પર્યાવરણ કાર્યકરોએ પરિષદમાં ભાગ લેતા મુખ્ય દેશોના નેતાઓના માસ્ક પહેર્યા હતા અને તેમને ‘આબોહવા ગુનેગારો’ તરીકે દર્શાવ્યા હતા.”

તેમજ વધુ કીવર્ડ સાથે સર્ચ કરતા અમને બ્રાઝિલના ન્યૂઝ આઉટલેટ ‘ફોલ્હા ડી એસ. પાઉલો’ પર પ્રસારિત અહેવાલ પ્રાપ્ત થયો હતો. જેની સાથે માહિતી આપવામાં આવી હતી કે, “વૈશ્વિક નેતાઓ સામેના વિરોધ પ્રદર્શનમાં ભૂતપૂર્વ યુએસ રાષ્ટ્રપતિ ડોનાલ્ડ ટ્રમ્પ, ચીનના રાષ્ટ્રપતિ શી જિનપિંગ, તત્કાલીન બ્રાઝિલના રાષ્ટ્રપતિ બોલ્સોનારો, ઓસ્ટ્રેલિયન વડા પ્રધાન સ્કોટ મોરિસન, રશિયન નેતા વ્લાદિમીર પુતિન અને ભારતીય વડા પ્રધાન નરેન્દ્ર મોદી તેમજ મીડિયા ઉદ્યોગપતિ રૂપર્ટ મર્ડોકના માસ્ક હતા.”

તેમજ અન્ય મીડિયા હાઉસ દ્વારા પણ આ જ માહિતી સાથેનો અહેવાલ પ્રસારિત કરવામાં આવ્યો હતો. જે તમે નીચે જોઈ શકો છો.

પરિણામ

આમ, અમારી પડતાલમાં ઉપરોક્ત પોસ્ટ ખોટી સાબિત થાય છે. કારણ કે, આ વીડિયો નવેમ્બર 2021માં સ્કોટલેન્ડના ગ્લાસગોનો છે. જેમાં એક પર્યાવરણીય સંગઠન દ્વારા વિરોધ પ્રદર્શન કરવામાં આવ્યુ હતુ. આ વીડિયોને ભ્રામક દાવા સાથે શેર કરવામાં આવી રહ્યો છે.

(જો તમારી પાસે પણ સોશિયલ મિડિયાના માધ્યમથી કોઈ શંકાસ્પદ મેસેજ, પોસ્ટ, ફોટો અને વિડિયો અથવા સમાચાર હોય, તો તેની સત્યતા જાણવા માટે તમે અમને અમારા વોટ્સઅપ ફેક્ટલાઈન નંબર (9049053770) પર મોકલો. અમારા લેટેસ્ટ ફેક્ટ ચેક વાંચવા માટે Facebook, Instagram અને Twitter પર Fact Crescendoને ફોલો કરો.)