સંકલ્પ ડેરીની છાશ 475 રૂપિયા અડધા લિટર નથી વહેચવામાં આવી રહી… જાણો શું છે સત્ય… - Fact Crescendo Gujarati | The leading fact-checking website in India

સંકલ્પ ડેરીની છાશની થેલીનો ફોટો ડિજીટલી એડિટ કરી અને ખોટા દાવા સાથે વાયરલ કરવામાં આવી રહ્યો છે. સંકલ્પ ડેરી દ્વારા 25 રૂપિયા લિટર છાશ વહેંચવામાં આવી રહી છે.

સ્ટેચ્યુ ઓફ યુનિટી પાસેના સંકલ્પ રેસ્ટોરન્ટનું એક બીલ સોશિયલ મીડિયામાં વાયરલ થઈ રહ્યુ છે. જેમાં છાશના એક ગ્લાસનો ભાવ 200 રૂપિયા લખેલો હોવાને કારણે ગુજરાતના સોશિયલ મીડિયામાં આ બીલ ખૂબ જ વાયરલ થઈ રહી છે. આ વચ્ચે સંકલ્પ છાસની થેલીનો ફોટો સોશિયલ મીડિયામાં વાયરલ થઈ રહ્યો છે. જેમાં 475 રૂપિયા અડધા લિટરના લખેલા વંચાય છે. આ ફોટોને શેર કરીને દાવો કરવામાં આવી રહ્યો છે કે, “સંકલ્પ ડેરીની છાશ 475 રૂપિયાની અડધો લિટર વેચાય રહી છે.”

શું દાવો કરવામાં આવી રહ્યો છે.?

Dhirubhai Virani નામના ફેસબુક યુઝર દ્વારા તારીખ 01 એપ્રિલ 2023ના એક પોસ્ટ શેર કરવામાં આવી હતી. આ પોસ્ટમાં દાવો કરવામાં આવ્યો હતો કે, “સંકલ્પ ડેરીની છાશ 475 રૂપિયાની અડધો લિટર વેચાય રહી છે.”

FACT CHECK

ઉપરોક્ત પોસ્ટમાં કરવામાં આવેલા દાવાની સત્યતા તપાસવી જરૂરી જણાતા અમે અમારી પડતાલ/તપાસ કાર્યવાહી શરૂ કરી હતી.

સૌપ્રથમ અમે ગૂગલ પર જૂદા-જૂદા કીવર્ડ સાથે સર્ચ કરતા અમને LinkedIn પર સંકલ્પ મિલ્ક પ્રોડક્ટની પ્રોફાઇલ પ્રાપ્ત થઈ હતી. જેમાં છાશની પ્રોડક્ટના પેકિંગનો ઓરિજનલ ફોટો પ્રાપ્ત થયો હતો. જે તમે નીચે જોઈ શકો છો.

તેમજ સંકલ્પ સોના ની વેબસાઇટ પર પણ મિલ્ક પ્રોડક્ટમાં છાશના ઓરિજનલ પેકેટનો ફોટો પ્રાપ્ત થયો હતો. જેમાં ક્યાંય પણ 475 રૂપિયા અડધો લિટર છાશનો ભાવ હોવાનું લખવામાં આવ્યુ ન હતુ. જે તમે નીચે જોઈ શકો છો.

ઓરિજનલ ફોટો અને વાયરલ એડિટેડ ફોટોનો તફાવત તમે નીચે જોઈ શકો છો. ઓરિજનલ ફોટોમાં છેડછાડ કરવામાં આવી હોવાનું જોઈ શકાય છે.

તેમજ અમારી પડતાલને વધુ મજબૂત કરવા અમે સંકલ્પ સોના ફૂડ કંપનીના માલિક મહાદેયો નિકમ જોડે વાત કરી હતી તેમણે અમને પ્રોડક્ટનો ઓરિજનલ ફોટો મોકલાવ્યો હતો અને જણાવ્યુ હતુ કે, “તેઓ સંકલ્પ સોનાની છાશ 25 રૂપિયા લિટરમાં વહેચે છે જ્યારે તેઓ ગુજરાતમાં કોઈ પણ પ્રોડક્ટનું વેચાણ નથી કરી રહ્યા. તેમજ તેમણે તેમની પ્રોડક્ટનો ફોટો ખોટા દાવા સાથે વાયરલ થતો હોવાનું તેમણે જણાવ્યુ હતુ.”

પરિણામ

આમ, અમારી પડતાલમાં ઉપરોક્ત પોસ્ટ ખોટી સાબિત થાય છે. કારણ કે, સંકલ્પ ડેરીની છાશની થેલીનો ફોટો ડિજીટલી એડિટ કરી અને ખોટા દાવા સાથે વાયરલ કરવામાં આવી રહ્યો છે. સંકલ્પ ડેરી દ્વારા 25 રૂપિયા લિટર છાશ વહેંચવામાં આવી રહી છે.

(જો તમારી પાસે પણ સોશિયલ મિડિયાના માધ્યમથી કોઈ શંકાસ્પદ મેસેજ, પોસ્ટ, ફોટો અને વિડિયો અથવા સમાચાર હોય, તો તેની સત્યતા જાણવા માટે તમે અમને અમારા વોટ્સઅપ ફેક્ટલાઈન નંબર (9049053770) પર મોકલો. અમારા લેટેસ્ટ ફેક્ટ ચેક વાંચવા માટે Facebook, Instagram અને Twitter પર Fact Crescendoને ફોલો કરો.)