શું ખરેખર ગુજરાતમાં ભાજપાના નેતા પર ઈંડા ફેંકવામાં આવ્યા…? જાણો શું છે સત્ય….

પોસ્ટ સાથે શેર કરવામાં આવેલો વીડિયો ગુજરાતની સ્થાનિક સ્વરાજની ચૂંટણી બાદ ભાજપા નેતા પર ઈંડા ફેંકવામાં આવ્યા તેનો નથી પરંતુ કર્ણાટકના ધારાસભ્ય પર ફેંકવામાં આવેલા ઈંડાનો છે.

ગુજરાતની સ્થાનિક સ્વરાજ્યની ચૂંટણીમાં ભાજપે 2022ની વિધાનસભા ચૂંટણી કરતાં પણ વધુ સારું પ્રદર્શન કર્યું છે. કુલ 68 નગરપાલિકામાંથી 64 નગરપાલિકાના પરિણામોમાં ભાજપે 92 ટકા એટલે કે 59 નગરપાલિકાઓ પર વિજય મેળવ્યો છે. આ વચ્ચે એક વીડિયો વાયરલ થઈ રહ્યો છે જેમાં ભાજપાનો ખેસ પહેરેલા એક વ્યક્તિ પર ઈંડુ ફેંકવામાં આવે છે. આ વીડિયોને શેર કરીને દાવો કરવામાં આવી રહ્યો છે કે, “ગુજરાતમાં ભાજપાના નેતા પર ઈંડા ફેંકવામાં આવ્યા તેનો વીડિયો છે.”

શું દાવો કરવામાં આવી રહ્યો છે.?

સોશિયલ મીડિયા યુઝર્સ દ્વારા તારીખ 18 ફેબ્રુઆરી 2025ના એક પોસ્ટ શેર કરવામાં આવી હતી. આ પોસ્ટમાં દાવો કરવામાં આવ્યો હતો કે, “ગુજરાતમાં ભાજપાના નેતા પર ઈંડા ફેંકવામાં આવ્યા તેનો વીડિયો છે.”

Facebook | Fb post Archive | Fb video archive

FACT CHECK

ઉપરોક્ત પોસ્ટમાં કરવામાં આવેલા દાવાની સત્યતા તપાસવી જરૂરી જણાતા અમે અમારી પડતાલ/તપાસ કાર્યવાહી શરૂ કરી હતી. 

સૌપ્રથમ અમે ગૂગલ રિવર્સ ઈમેજના માધ્યમથી સર્ચ કરતા અમને ઘણા પરિણામો પ્રાપ્ત થયા હતા. ઉપરોક્ત પરિણામો પરથી અમને ટાઈમ્સ નાઉ દ્વારા પ્રસારિત અહેવાલ પ્રાપ્ત થયો હતો. જેની સાથે માહિતી આપવામાં આવી હતી કે, “કર્ણાટક સમાચાર: અટલ બિહારી વાજપેયીની જન્મજયંતિના કાર્યક્રમ દરમિયાન બેંગલુરુમાં ભાજપના ધારાસભ્ય એન. મુનીરત્ન નાયડુ પર ઇંડા ફેંકવામાં આવ્યા હતા.” 

તેમજ વધુ સર્ચ કરતા અમને ધ ઈન્ડિયન એક્સપ્રેસ દ્વારા તેમની યુટ્યુબ ચેનલ પર પ્રસારિત અહેવાલ પ્રાપ્ત થયો હતો. જેની સાથે માહિતી આપવામાં આવી હતી કે, “કર્ણાટકના ભૂતપૂર્વ મંત્રી અને ભાજપના ધારાસભ્ય મુનિરત્નાએ બેંગલુરુમાં એક કાર્યક્રમ દરમિયાન તેમના પર ઈંડું ફેંકવામાં આવ્યા બાદ તેમની હત્યાનું કાવતરું ઘડાયું હોવાનો આરોપ લગાવ્યો હતો. તેમણે દાવો કર્યો હતો કે જો તેમને કંઈ થયું તો ડેપ્યુટી સીએમ ડીકે શિવકુમાર, તેમના ભાઈ ડીકે સુરેશ અને કોંગ્રેસના નેતાઓ કુસુમા અને હનુમાનથરાયપ્પા જવાબદાર રહેશે.” 

તેમજ વધુ સર્ચ કરતા અમને આ જ માહિતી આપતો અહેવાલ જુદા-જુદા મીડિયા હાઉસ (ઈન્ડિયા ટુડે, હિન્દુસ્તાન ટાઈમ્સ, એનડીટીવી) દ્વારા પ્રસારિત કરવામાં આવ્યો હતો.

પરિણામ

આમ, અમારી પડતાલમાં ઉપરોક્ત પોસ્ટ ખોટી સાબિત થાય છે. કારણ કે, પોસ્ટ સાથે શેર કરવામાં આવેલો વીડિયો ગુજરાતની સ્થાનિક સ્વરાજની ચૂંટણી બાદ ભાજપા નેતા પર ઈંડા ફેંકવામાં આવ્યા તેનો નથી પરંતુ કર્ણાટકના ધારાસભ્ય પર ફેંકવામાં આવેલા ઈંડાનો છે. 

(જો તમારી પાસે પણ સોશિયલ મિડિયાના માધ્યમથી કોઈ શંકાસ્પદ મેસેજ, પોસ્ટ, ફોટો અને વિડિયો અથવા સમાચાર હોય, તો તેની સત્યતા જાણવા માટે તમે અમને અમારા વોટ્સઅપ ફેક્ટલાઈન નંબર (9049053770) પર મોકલો. અમારા લેટેસ્ટ ફેક્ટ ચેક વાંચવા માટે Facebook, Instagram અને Twitter પર Fact Crescendoને ફોલો કરો.)