આ વાયરલ વીડિયો ગુજરાતમાં ભાવવધારાના વિરોધનો છે. તેનો કાવડ યાત્રા સાથે કોઈ સંબંધ નથી. આ વીડિયોને ભ્રામક દાવા સાથે વાયરલ કરવામાં આવી રહ્યો છે.
શ્રાવણ મહિનામાં કાંવડિયાઓને લગતી ઘણી પોસ્ટ સોશિયલ મીડિયા પર વાયરલ થઈ રહી છે. જેમાં એક વીડિયોમાં, કેટલાક લોકો રસ્તા પર દૂધ ફેંકતા જોઈ શકાય છે. આ વીડિયોને શેર કરીને દાવો કરવામાં આવી રહ્યો છે કે, “અલવરમાં કાંવડિયાઓની ટક્કરથી ગુસ્સે ભરાયેલા લોકોએ વાહનમાં રાખેલુ દૂધ ઢોળી દીધુ હતું.”
શું દાવો કરવામાં આવી રહ્યો છે.?
સોશિયલ મીડિયા યુઝર્સ દ્વારા તારીખ 20 જૂલાઈ 2025ના એક પોસ્ટ શેર કરવામાં આવી હતી. આ પોસ્ટમાં દાવો કરવામાં આવ્યો હતો કે, “અલવરમાં કાંવડિયાઓની ટક્કરથી ગુસ્સે ભરાયેલા લોકોએ વાહનમાં રાખેલુ દૂધ ઢોળી દીધુ હતું.”
FACT CHECK
ઉપરોક્ત પોસ્ટમાં કરવામાં આવેલા દાવાની સત્યતા તપાસવી જરૂરી જણાતા અમે અમારી પડતાલ/તપાસ કાર્યવાહી શરૂ કરી હતી.
સૌપ્રથમ અમે ગૂગલ પર કીવર્ડ સાથે સર્ચ કરતા અમને ઘણા પરિણામો પ્રાપ્ત થયા હતા.
ઉપરોક્ત પરિણામો પરથી અમને ટ્વિટર પર આ વીડિયો 20 જુલાઈના પ્રાપ્ત થયો હતો. જેની સાથે માહિતી આપવામાં આવી હતી કે, “આ વીડિયો ગુજરાતના સાબરકાંઠાનો છે, જ્યાં ડેરી ખેડૂતો દૂધ ખરીદીના ભાવમાં વધારાનો વિરોધ કરી રહ્યા છે.”
તેમજ વધુ સર્ચ કરતા અમને અમદાવાદ મિરર દ્વારા પ્રસારિત એક અહેવાલ પ્રાપ્ત થયો હતો. જેની સાથે માહિતી આપવામાં આવી હતી કે, સાબરકાંઠા અને અરવલ્લી જિલ્લામાં દૂધના ભાવ સામે પશુપાલકો વિરોધ કરી રહ્યા છે. આ દરમિયાન સાબર ડેરીની બહાર પશુપાલકો અને પોલીસ વચ્ચે ઘર્ષણ થયું હતું. હિંસા દરમિયાન એક ખેડૂતના મૃત્યુ બાદ ત્રણ દિવસથી ચાલી રહેલા આંદોલનમાં તીવ્ર વધારો થયો છે. પૂર્વ ધારાસભ્ય જશુ પટેલ સહિત 74 નેતાઓ અને 1 હજારથી વધુ અજાણ્યા વિરોધીઓ સામે કેસ નોંધવામાં આવ્યો છે.
તેમજ વધુ સર્ચ કરતા ટીવીનાઈન ગુજરાતી દ્વારા પણ તેમના ઓફિશિયલ ટ્વિટર એકાઉન્ટ પર આ વીડિયોને શેર કર્યો હતો. જે તમે નીચે જોઈ શકો છો.
પરિણામ
આમ, અમારી પડતાલમાં ઉપરોક્ત પોસ્ટ ખોટી સાબિત થાય છે. કારણ કે, પોસ્ટ સાથે શેર કરવામાં આવેલો વીડિયો ગુજરાતમાં ભાવવધારાના વિરોધનો છે. તેનો કાવડ યાત્રા સાથે કોઈ સંબંધ નથી. આ વીડિયોને ભ્રામક દાવા સાથે વાયરલ કરવામાં આવી રહ્યો છે.
(જો તમારી પાસે પણ સોશિયલ મિડિયાના માધ્યમથી કોઈ શંકાસ્પદ મેસેજ, પોસ્ટ, ફોટો અને વિડિયો અથવા સમાચાર હોય, તો તેની સત્યતા જાણવા માટે તમે અમને અમારા વોટ્સઅપ ફેક્ટલાઈન નંબર (9049053770) પર મોકલો. અમારા લેટેસ્ટ ફેક્ટ ચેક વાંચવા માટે Facebook, Instagram અને Twitter પર Fact Crescendoને ફોલો કરો.)
Title:ગુજરાતના પશુપાલકોના વિરોધના વીડિયોને કાંવડિયો સાથે જોડી ખોટા દાવા સાથે વાયરલ કરવામાં આવી રહ્યો… જાણો શું છે સત્ય….
Fact Check By: Frany KariaResult: False
