જાણો ભારતમાં શાળાઓમાં વિદ્યાર્થીઓ દ્વારા સ્ટ્રોબેરી ક્વિક નામની દવા ખરીદવામાં આવતી હોવાના નામે વાયરલ ફોટોનું શું છે સત્ય…

તાજેતરમાં સોશિયલ મીડિયા પર પેકેટમાં રહેલી દવાની ગોળીઓનો એક ફોટો વાયરલ થઈ રહ્યો છે જેની સાથે એવો દાવો કરવામાં આવી રહ્યો છે કે, ભારતની શાળાઓમાં વિદ્યાર્થીઓ દ્વારા સ્ટ્રોબેરી ક્વિક નામની દવાની ખરીદી કરવામાં આવી રહી છે તેનો આ ફોટો છે. પરંતુ ફેક્ટ ક્રેસેન્ડોની પડતાલમાં આ દાવો ખોટો હાવાનું સાબિત થાય છે કારણ કે, પોસ્ટમાં પેકેટમાં રહેલી દવાની ગોળીઓનો જે ફોટો મૂકવામાં આવ્યો છે એ એક જૂનો ફોટો છે. વાયરલ માહિતી તદ્દન ખોટી છે અને આ ફોટોને માહિતી સાથે કોઈ જ સંબંધ નથી. લોકોને ગેરમાર્ગે દોરવા માટે વીડિયોને ખોટી માહિતી સાથે સોશિયલ મીડિયા પર વાયરલ કરવામાં આવી રહ્યો છે.

શું દાવો કરવામાં આવી રહ્યો છે.?

એક ફેસબુક યુઝર દ્વારા 2 ફેબ્રુઆરી, 2025ના રોજ એક પોસ્ટ શેર કરવામાં આવી હતી. પોસ્ટમાં મૂકવામાં આવેલા વીડિયોના શીર્ષકમાં એવું લખવામાં આવ્યું છે કે, શાળાઓમાં નવી દવાઓ… જો તમારા બાળકો શાળામાં ન હોય તો પણ કૃપા કરીને આ દવા લોકોને જણાવો. માતાપિતાએ આ દવા વિશે જાણવું જોઈએ. આ ‘સ્ટ્રોબેરી ક્વિક’ તરીકે ઓળખાતી એક નવી દવા છે. હાલમાં શાળાઓમાં એક ખૂબ જ ભયાનક વસ્તુ ચાલી રહી છે જેના વિશે આપણે બધાએ જાગૃત રહેવાની જરૂર છે. એક પ્રકારનો ક્રિસ્ટલ મેથ ફરતો હોય છે. જે સ્ટ્રોબેરી પોપ રોક્સ (એક કેન્ડી જે તમારા મોંમાં ‘પોપ’ થાય છે) જેવો દેખાય છે. તે સ્ટ્રોબેરી જેવી ગંધ પણ આપે છે અને તે શાળાના આંગણામાં બાળકોને આપવામાં આવી રહી છે. તેઓ તેને સ્ટ્રોબેરી મેથ અથવા સ્ટ્રોબેરી ક્વિક કહી રહ્યા છે. બાળકો આ કેન્ડી સમજીને ખાઈ રહ્યા છે અને તેમને ગંભીર સ્થિતિમાં હોસ્પિટલમાં લઈ જઈ રહ્યા છે. તે ચોકલેટ, પીનટ બટર, કોલા, ચેરી, દ્રાક્ષ અને નારંગીમાં પણ આવે છે. કૃપા કરીને તમારા બાળકોને અજાણ્યાઓ પાસેથી કેન્ડી ન લેવા અને મિત્ર (જેને તે આપવામાં આવી હશે અને તે કેન્ડી હોવાનું માનતા હશે) પાસેથી આવી દેખાતી કેન્ડી પણ ન લેવા સૂચના આપો અને જે પણ તેમની પાસે હોય તે તરત જ શિક્ષક, આચાર્ય વગેરેને આપો. આ ઇમેઇલ શક્ય તેટલા લોકોને મોકલો.. આ વીડિયો સાથેના લખાણમાં એવો દાવો કરવામાં આવી રહ્યો છે કે, ભારતની શાળાઓમાં વિદ્યાર્થીઓ દ્વારા સ્ટ્રોબેરી ક્વિક નામની દવાની ખરીદી કરવામાં આવી રહી છે તેનો આ ફોટો છે.

Facebook Post | Archive

FACT CHECK

ઉપરોક્ત પોસ્ટમાં કરવામાં આવેલા દાવાની સત્યતા તપાસવી જરૂરી જણાતાં અમે અમારી પડતાલ/તપાસ કાર્યવાહી શરૂ કરી હતી. તપાસની શરૂઆતમાં અમે પોસ્ટમાં મૂકવામાં આવેલા ફોટોને ધ્યાનથી જોયા બાદ ગુગલ રિવર્સ ઈમેજ સર્ચ કરતાં અમને એ જાણવા મળ્યું કે, આ જ ફોટો ધ સન ન્યૂઝ એજન્સી દ્વારા 7 માર્ચ, 2017 ના રોજ શેર કરવામાં આવ્યો હતો.

ફોટા સાથેના અહેવાલ મુજબ, ઇંગ્લેન્ડના માન્ચેસ્ટરમાં ચાર 13 વર્ષની છોકરીઓને ‘ટેડી બેર એક્સ્ટસી ગોળીઓ’ ખાધા બાદ હોસ્પિટલમાં દાખલ કરવામાં આવી હતી.

છોકરીઓએ વાયથેનશોમાં સિવિક સેન્ટર નજીક ગુલાબી, “ટેડી બેર” ગોળીઓ ગળી લીધી અને તેમને હોસ્પિટલમાં લઈ જવામાં આવી હતી. પોલીસે જણાવ્યું કે, તેમની હાલત સ્થિર છે અને તેમને રજા આપવામાં આવી છે.

નીચે આપેલ સન ન્યૂઝ સ્ક્રીનશોટમાં તમે વાયરલ ફોટો જોઈ શકો છો.

The Sun News

સ્ટ્રોબેરી ક્વિક અફવા

અરુણાચલ પ્રદેશ પોલીસે શાળાના બાળકોમાં સ્ટ્રોબેરી-સ્વાદવાળી ‘મેથ કેન્ડી’ ફેલાતી હોવાની અફવાઓને ફગાવી દીધી છે. તેમણે માતાપિતાને આ સંદર્ભમાં સોશિયલ મીડિયા પોસ્ટ્સને અવગણવા પણ વિનંતી કરી.

રાજધાનીના પોલીસ અધિક્ષક રોહિત રાજબીર સિંહે પણ એક નોટિસમાં સ્પષ્ટતા કરી હતી કે, સોશિયલ મીડિયા પોસ્ટમાં દાવો કરવામાં આવ્યો છે કે, “સ્ટ્રોબેરી મેથ” અથવા “સ્ટ્રોબેરી ક્વિક” ડ્રગ્સ શાળાના બાળકોને કેન્ડીના રૂપમાં વહેંચવામાં આવી રહ્યા છે તે સાચું નથી. આ દાવો ખોટો છે અને સૌપ્રથમ 2007 માં AMEIT માં દેખાયો હતો અને યુએસ ડ્રગ એન્ફોર્સમેન્ટ એડમિનિસ્ટ્રેશન સહિત કાયદા અમલીકરણ એજન્સીઓએ વારંવાર કહ્યું છે કે, એવા કોઈ વિશ્વસનીય પુરાવા નથી કે, આ પ્રકારના સ્વાદવાળા મેથામ્ફેટામાઇનની હાજરી અથવા વિતરણ બાળકોને લક્ષ્ય બનાવી રહ્યું છે. વધુ માહિતી અહીં, અહીં અને અહીં વાંચી શકાય છે.

જૂની અફવા

29 એપ્રિલ, 2007 ના રોજ સ્નોપ્સ ફેક્ટ-ચેકિંગ સંસ્થાએ એવી અફવાઓનું ખંડન કર્યું કે, યુનાઇટેડ સ્ટેટ્સમાં બાળકોને “સ્ટ્રોબેરી ક્વિક” નામથી રંગીન અને સ્વાદવાળી મેથામ્ફેટામાઇન વેચવામાં આવી રહી છે.

સ્નોપ્સના લેખમાં, ફેડરલ ડ્રગ એજન્સી (DEA) એ જણાવ્યું હતું કે, “કેટલાક રંગીન મેથામ્ફેટામાઇન મળી આવ્યા હતા જે કેન્ડી જેવા દેખાતા હતા. જોકે, ડ્રગ ડીલરો નાના બાળકોને નિશાન બનાવવા માટે ઇરાદાપૂર્વક આવી રંગીન અને રંગીન દવાઓ બનાવી રહ્યા છે તે ખ્યાલ ખોટો છે.

DEA ના પ્રવક્તાએ સમજાવ્યું: “અમારી તપાસમાં આવી કોઈ વૃત્તિ નથી. કોઈએ સારા ઈરાદાથી અફવા ફેલાવી હશે. જોકે, તેનો કોઈ આધાર નથી. અમને ક્યારેય ‘સ્ટ્રોબેરી ફ્લેવર્ડ’ મેથ અથવા આ પ્રકારની દવા સાથે હોસ્પિટલમાં દાખલ થયેલા કોઈપણ બાળક વિશે કોઈ માહિતી મળી નથી. સંપૂર્ણ વિગતો અહીં અને અહીં વાંચી શકાય છે.

ટૂંકમાં, ‘સ્ટ્રોબેરી ક્વિક’ એક અફવા છે અને તેમાં કોઈ સત્ય નથી.

પરિણામ

આમ, અમારી પડતાલમાં ઉપરોક્ત પોસ્ટમાં કરવામાં આવેલો દાવો અધૂરી માહિતી સાથેનો હોવાનું સાબિત થાય છે કારણ કે, પોસ્ટમાં પેકેટમાં રહેલી દવાની ગોળીઓનો જે ફોટો મૂકવામાં આવ્યો છે એ એક જૂનો ફોટો છે. વાયરલ માહિતી તદ્દન ખોટી છે અને આ ફોટોને માહિતી સાથે કોઈ જ સંબંધ નથી. લોકોને ગેરમાર્ગે દોરવા માટે વીડિયોને ખોટી માહિતી સાથે સોશિયલ મીડિયા પર વાયરલ કરવામાં આવી રહ્યો છે. 

(જો તમારી પાસે પણ સોશિયલ મીડિયાના માધ્યમથી કોઈ શંકાસ્પદ મેસેજ, પોસ્ટ, ફોટો અને વીડિયો અથવા સમાચાર હોય, તો તેની સત્યતા જાણવા માટે તમે અમને અમારા વોટ્સઅપ ફેક્ટલાઈન નંબર (9049053770) પર મોકલો. અમારા લેટેસ્ટ ફેક્ટ ચેક વાંચવા માટે Facebook, Instagram અને Twitter પર Fact Crescendoને ફોલો કરો)