વાયરલ વીડિયોમાં પાકિસ્તાન પર ભારતીય હવાઈ હુમલો દર્શાવવામાં આવ્યો નથી. આ એક જૂનો વીડિયો છે જેમાં ગાઝા પર ઇઝરાયલી હવાઈ હુમલો દર્શાવવામાં આવ્યો છે.
એક વીડિયો સોશિયલ મીડિયા પર વાયરલ થયો છે જેમાં કેટલાક લોકો કેમ્પસાઇટમાં ફરતા હોય છે, અને પછી અચાનક તે જગ્યાએ બોમ્બ ધડાકા થાય છે, જેના કારણે લોકો ગભરાઈ જાય છે. આ વીડિયો શેર કરતા યુઝર્સે દાવો કર્યો છે કે “આ વીડિયો પાકિસ્તાન પર ભારતીય હુમલો દર્શાવે છે.”
શું દાવો કરવામાં આવી રહ્યો છે.?
સોશિયલ મીડિયા યુઝર્સ દ્વારા તારીખ 07 મે 2025ના એક પોસ્ટ શેર કરવામાં આવી હતી. આ પોસ્ટમાં દાવો કરવામાં આવ્યો હતો કે, “આ વીડિયો પાકિસ્તાન પર ભારતીય હુમલો દર્શાવે છે.”
Facebook | Fb post Archive | Fb video archive
FACT CHECK
ઉપરોક્ત પોસ્ટમાં કરવામાં આવેલા દાવાની સત્યતા તપાસવી જરૂરી જણાતા અમે અમારી પડતાલ/તપાસ કાર્યવાહી શરૂ કરી હતી.
અમે વાયરલ વીડિયોમાંથી કેટલાક સ્ક્રીનશોટ લઈને અને રિવર્સ ઈમેજ સર્ચ કરીને અમારી તપાસ શરૂ કરી. આનાથી અમને 15 નવેમ્બર 2024ના રોજ ધ ન્યૂ યોર્ક ટાઈમ્સના ઓફિશિયલ X હેન્ડલ પર એક ટ્વિટ મળ્યું. ટ્વિટમાં વાયરલ વીડિયો હતો. ટ્વિટમાં લખ્યું હતું કે, “બુધવારે દક્ષિણ ગાઝામાં ઇઝરાયલી સેનાએ એક ગીચ વસ્તીવાળા તંબુ છાવણી પર બોમ્બમારો કર્યો હતો જેને હજારો વિસ્થાપિત પેલેસ્ટિનિયનો માટે માનવતાવાદી ક્ષેત્ર તરીકે નિયુક્ત કરવામાં આવ્યો હતો.“
વીડિયોમાં લખેલા લખાણ મુજબ, આ હુમલો 13 નવેમ્બર 2024ના રોજ ગાઝાના અલ માવાસી ખાતેના તંબુ છાવણીમાં થયો હતો.
14 નવેમ્બર 2024ના રોજ ધ ન્યૂ યોર્ક ટાઈમ્સમાં પ્રકાશિત થયેલા એક વિગતવાર અહેવાલમાં કહેવામાં આવ્યું છે કે, “ઇઝરાયેલી સૈન્યએ દક્ષિણ ગાઝામાં એક ગીચ વસ્તીવાળા તંબુ છાવણી પર બોમ્બમારો કર્યો છે, જેને હજારો વિસ્થાપિત પેલેસ્ટિનિયનો માટે માનવતાવાદી ક્ષેત્ર તરીકે નિયુક્ત કરવામાં આવ્યો છે, જેમાં કહેવામાં આવ્યું છે કે હવાઈ હુમલામાં વિસ્તારમાં લોડેડ વેપન લોન્ચરને નિશાન બનાવવામાં આવ્યું હતું.”
પેલેસ્ટિનિયન સમાચાર એજન્સી વાફા અને ઘાયલોને લઈ જવામાં આવેલા મેડિકલ સેન્ટરના એક પેરામેડિકે જણાવ્યું હતું કે, બુધવારે અલ-માવાસી નામના ઝોન પર થયેલા હવાઈ હુમલામાં ઓછામાં ઓછો એક વ્યક્તિ માર્યો ગયો હતો. વાફાએ અહેવાલ આપ્યો હતો કે પીડિત એક બાળક હતો અને 20 થી વધુ લોકો ઘાયલ થયા હતા. ઇઝરાયેલી સૈન્યએ કહ્યું હતું કે, તેણે લોન્ચરને નિશાન બનાવ્યું હતું કારણ કે તે ઇઝરાયેલી નાગરિકો માટે ખતરો હતો પરંતુ વધુ વિગતો આપી ન હતી કે લોન્ચર કયા પ્રકારના હથિયારો લઈ રહ્યું હતું તે જણાવ્યું ન હતું. સૈન્યએ ઉમેર્યું હતું કે તેણે વિસ્તારના નાગરિકોને સ્થળાંતર કરવા માટે અગાઉથી ચેતવણીઓ જારી કરી હતી.
ઇઝરાયેલી સૈન્યએ ભૂતકાળમાં અલ-માવાસી પર અનેક હુમલાઓ કર્યા છે અને 7 ઓક્ટોબર, 2023ના રોજ ઇઝરાયેલ પર હુમલો કરનાર સશસ્ત્ર પેલેસ્ટિનિયન જૂથ હમાસ પર ઇઝરાયેલીઓ પર હુમલો કરવા માટે માનવતાવાદી ક્ષેત્ર અને નાગરિક માળખાગત સુવિધાઓનો વ્યવસ્થિત ઉપયોગ કરવાનો આરોપ મૂક્યો છે.
અમને 14 નવેમ્બર 2024ના રોજ એક ઇન્સ્ટાગ્રામ હેન્ડલ પર અપલોડ કરાયેલો આવો જ એક વીડિયો મળ્યો.
આવા જ વીડિયો અહીં અને અહીં જોઈ શકાય છે.
આનાથી સ્પષ્ટ થાય છે કે વાયરલ વીડિયો ગાઝાનો છે.
પરિણામ
આમ, અમારી પડતાલમાં ઉપરોક્ત પોસ્ટ ખોટી સાબિત થાય છે. કારણ કે, વાયરલ વીડિયોમાં પાકિસ્તાન પર ભારતીય હવાઈ હુમલો દર્શાવવામાં આવ્યો નથી. આ એક જૂનો વીડિયો છે જેમાં ગાઝા પર ઇઝરાયલી હવાઈ હુમલો દર્શાવવામાં આવ્યો છે.
(જો તમારી પાસે પણ સોશિયલ મિડિયાના માધ્યમથી કોઈ શંકાસ્પદ મેસેજ, પોસ્ટ, ફોટો અને વિડિયો અથવા સમાચાર હોય, તો તેની સત્યતા જાણવા માટે તમે અમને અમારા વોટ્સઅપ ફેક્ટલાઈન નંબર (9049053770) પર મોકલો. અમારા લેટેસ્ટ ફેક્ટ ચેક વાંચવા માટે Facebook, Instagram અને Twitter પર Fact Crescendoને ફોલો કરો.)
Title:ગાઝાનો જૂનો વીડિયો પાકિસ્તાન પર ભારતીય હવાઈ હુમલા તરીકે વાયરલ થઈ રહ્યો છે… જાણો શું છે સત્ય….
Fact Check By: Frany KariaResult: False
