બોટાદ જિલ્લાના હડદડ ગામમાં કપાસના વજનમાં ગેરકાયદેસર કપાત વિરૂદ્ધ આમ આદમી પાર્ટી દ્વારા યોજાયેલી ખેડૂત મહાપંચાયત દરમિયાન પોલીસ અને ખેડૂતો વચ્ચે થયેલા હિંસક ઘર્ષણ પછી ઘણા વીડિયો સોશિયલ મીડિયામાં વાયરલ થઈ રહ્યા છે. જેમાં એક વીડિયોમાં પોલીસ અમુક મહિલા પર લાઠીચાર્જ કરતી જોઈ શકાય છે. આ વીડિયોને શેર કરીને દાવો કરવામાં આવી રહ્યો છે કે, “મહિલાઓ પર લાઠી ચાર્જનો આ વીડિયો ગુજરાત પોલીસનો છે.”
શું દાવો કરવામાં આવી રહ્યો છે.?
સોશિયલ મીડિયા યુઝર્સ દ્વારા તારીખ 15 ઓક્ટોબર 2025ના એક પોસ્ટ શેર કરવામાં આવી હતી. આ પોસ્ટમાં દાવો કરવામાં આવ્યો હતો કે, “મહિલાઓ પર લાઠી ચાર્જનો આ વીડિયો ગુજરાત પોલીસનો છે.”
FACT CHECK
ઉપરોક્ત પોસ્ટમાં કરવામાં આવેલા દાવાની સત્યતા તપાસવી જરૂરી જણાતા અમે અમારી પડતાલ/તપાસ કાર્યવાહી શરૂ કરી હતી.
સૌપ્રથમ અમે ગૂગલ રિવર્સ ઈમેજના માધ્યમથી સર્ચ કરતા અમને ઘણા પરિણામો પ્રાપ્ત થયા હતા.
ઉપરોક્ત પરિણામો પરથી અમને સમાજવાદી પાર્ટીના અધ્યક્ષ અને સાંસદ અખિલેશ યાદવ દ્વારા 15 ઓગસ્ટના શેર કરવામાં આવેલો આ જ વીડિયો પ્રાપ્ત થયો હતો. જેની સાથે માહિતી આપવામાં આવી હતી કે, “કન્નૌજમાં એક ઇલેક્ટ્રિશિયનનું વીજ કરંટ લાગવાથી મૃત્યુ અત્યંત દુ:ખદ છે. આવા સંવેદનશીલ વાતાવરણમાં લોકો, ખાસ કરીને મહિલા પ્રત્યે પોલીસનું વર્તન ખૂબ જ વાંધાજનક છે. દોષિત પોલીસકર્મીઓને સસ્પેન્ડ કરવા જોઈએ અને શિક્ષાત્મક પગલાં લેવા જોઈએ.”
તેમજ વધુ સર્ચ કરતા અમને દૈનિક ભાસ્કર દ્વારા 15 ઓગસ્ટના શેર કરવામાં આવેલો અહેવાલ પ્રાપ્ત થયો હતો. જેની સાથે માહિતી આપવામાં આવી હતી કે, “કન્નૌજમાં વીજ કરંટથી એક યુવાનનું મોત થતાં ભારે હોબાળો મચી ગયો હતો. શુક્રવારે સાંજે પરિવારે વળતરની માંગણી સાથે મૃતદેહ રસ્તા પર મૂકીને રસ્તો બ્લોક કરી દીધો હતો. માહિતી મળતાં જ પોલીસ ઘટનાસ્થળે પહોંચી હતી. જ્યારે મહિલાઓએ હાર માનવાનો ઇનકાર કર્યો, ત્યારે પોલીસે બળજબરીથી મૃતદેહ ઉપાડવાનું શરૂ કર્યું, જેનાથી મહિલાઓ ગુસ્સે થઈ ગઈ.”
તેમજ વધુ સર્ચ કરતા અમને લાઈવહિન્દુસ્તાન, જાગરણ, એબીપી ન્યૂઝ દ્વારા પ્રસારિત અહેવાલ પ્રાપ્ત થયા હતા અને આ જ માહિતી આપવામાં આવી હતી.
પરિણામ
આમ, અમારી પડતાલમાં ઉપરોક્ત પોસ્ટ ખોટી સાબિત થાય છે. કારણ કે, પોસ્ટ સાથે શેર કરવામાં આવેલો વીડિયો ગુજરાતની પોલીસ દ્વારા કરવામાં આવેલી કાર્યવાહીનો નહીં પરંતુ ઉત્તર પ્રદેશની કન્નૌજ પોલીસ દ્વારા કરવામાં આવેલી કાર્યવાહ દરમિયાનનો છે.
(જો તમારી પાસે પણ સોશિયલ મિડિયાના માધ્યમથી કોઈ શંકાસ્પદ મેસેજ, પોસ્ટ, ફોટો અને વિડિયો અથવા સમાચાર હોય, તો તેની સત્યતા જાણવા માટે તમે અમને અમારા વોટ્સઅપ ફેક્ટલાઈન નંબર (9049053770) પર મોકલો. અમારા લેટેસ્ટ ફેક્ટ ચેક વાંચવા માટે Facebook, Instagram અને Twitter પર Fact Crescendoને ફોલો કરો.)
Title:શું ખરેખર ગુજરાત પોલીસ દ્વારા લોકો પર કરવામાં આવેલા લાઠી ચાર્જનો વીડિયો છે…? જાણો શું છે સત્ય….
Fact Check By: Frany KariaResult: False
