તાજેતરમાં સોશિયલ મીડિયા પર મનમોહનસિંહ અને સોનિયા ગાંધીનો એક વીડિયો વાયરલ થઈ રહ્યો છે. આ વીડિયો સાથેના લખાણમાં એવો દાવો કરવામાં આવી રહ્યો છે કે, વર્ષ 2014માં જ્યારે મનમોહનસિંહ વડાપ્રધાન હતા ત્યારે સોનિયા ગાંધી દ્વારા તેમનું અપમાન કરવામાં આવ્યું હતું તેનો આ વીડિયો છે. પરંતુ ફેક્ટ ક્રેસેન્ડોની પડતાલમાં આ દાવો ખોટો હોવાનું સાબિત થાય છે કારણ કે, પોસ્ટમાં મનમોહનસિંહ અને સોનિયા ગાંધીનો જે વીડિયો મૂકવામાં આવ્યો છે એ વર્ષ 2015નો છે ત્યારે મનમોહનસિંહ વડાપ્રધાન નહીં પરંતુ રાજ્યસભાના સાંસદ હતા. આ વીડિયોને સોશિયલ મીડિયા પર ખોટી માહિતી સાથે લોકોને ગેરમાર્ગે દોરવા વાયરલ કરવામાં આવી રહ્યો છે.
શું દાવો કરવામાં આવી રહ્યો છે?
એક સોશિયલ મીડિયા યુઝર દ્વારા 8 સપ્ટેમ્બર, 2025ના રોજ એક પોસ્ટ શેર કરવામાં આવી હતી. પોસ્ટમાં મૂકવામાં આવેલા વીડિયોના શીર્ષકમાં એવું લખવામાં આવ્યું છે કે, એટલે જ દેશને મોદીજી છે. આ વીડિયો સાથેના લખાણમાં એવો દાવો કરવામાં આવી રહ્યો છે કે, વર્ષ 2014માં જ્યારે મનમોહનસિંહ વડાપ્રધાન હતા ત્યારે સોનિયા ગાંધી દ્વારા તેમનું અપમાન કરવામાં આવ્યું હતું તેનો આ વીડિયો છે.
FACT CHECK
ઉપરોક્ત પોસ્ટમાં કરવામાં આવેલા દાવાની સત્યતા તપાસવી જરૂરી જણાતાં અમે અમારી પડતાલ/તપાસ કાર્યવાહી શરૂ કરી હતી. સૌપ્રથમ અમે પોસ્ટમાં મૂકવામાં આવેલા વીડિયોનો એક સ્ક્રીનશોટ લઈને ગુગલ રિવર્સ ઈમેજનો સહારો લઈ સર્ચ કરતાં અમને પોસ્ટમાં મૂકવામાં આવેલો આ જ વીડિયો કોંગ્રેસના સત્તાવાર યુટ્યુબ પર 16 જીન, 2015ના રોજ અપલોડ કરવામાં આવ્યો હોવાની માહિતી પ્રાપ્ત થઈ હતી. જેમાં એવી માહિતી આપવામાં આવી હતી કે, ચીનના ડેલિગેશન સાથે કોંગ્રેસના અધ્યક્ષની મિટીંગ.
Embed –
ત્યાર બાદ અમે મનમોહનસિંહના વડાપ્રધાન પદના કાર્યકાળ વિશે ગુગલનો સહારો લઈને સર્ચ કરતાં અમને વીકિપીડિયાની માહિતીમાં એ જાણવા મળ્યું હતું કે, 22 મે, 2004થી 26 મે, 2014 સુધી જ મનમોહનસિંહ ભારતના વડાપ્રધાન પદ પર ફરજ બજાવતા હતા. જ્યારે ત્યાર બાદ ભારતનું વડાપ્રધાન પદ નરેન્દ્ર મોદીએ સંભાળ્યું હતું.
જેના પરથી એ સ્પષ્ટ સાબિત થાય છે કે, પોસ્ટમાં મૂકવામાં આવેલો વીડિયો મનમોહનસિંહના વડાપ્રધાન હોવાના કાર્યકાળ પછીનો છે.
અમારી વધુ તપાસમાં અમને મનમોહનસિંહ અને સોનિયા ગાંધીની ચીની ડેલિગેશન સાથેની મુલાકાતના ફોટો સાથેની પોસ્ટ કોંગ્રેસના સત્તાવાર ટ્વિટર પર પણ 16 જૂન, 2015ના રોજ પ્રાપ્ત થઈ હતી. જેમાં એવું સ્પષ્ટ લખવામાં આવ્યું છે કે, ચીનના સંસદીય પ્રતિનિધિમંડળે કોંગ્રેસ અધ્યક્ષ શ્રીમતી સોનિયા ગાંધી અને ભૂતપૂર્વ પ્રધાનમંત્રી ડૉ. મનમોહન સિંહ સાથે મુલાકાત કરી.
પરિણામ
આમ, અમારી પડતાલમાં ઉપરોક્ત પોસ્ટમાં કરવામાં આવેલો દાવો ભ્રામક હોવાનું સાબિત થાય છે કારણ કે, પોસ્ટમાં મનમોહનસિંહ અને સોનિયા ગાંધીનો જે વીડિયો મૂકવામાં આવ્યો છે એ વર્ષ 2015નો છે ત્યારે મનમોહનસિંહ વડાપ્રધાન નહીં પરંતુ રાજ્યસભાના સાંસદ હતા. આ વીડિયોને સોશિયલ મીડિયા પર ખોટી માહિતી સાથે લોકોને ગેરમાર્ગે દોરવા વાયરલ કરવામાં આવી રહ્યો છે.
(જો તમારી પાસે પણ સોશિયલ મીડિયાના માધ્યમથી કોઈ શંકાસ્પદ મેસેજ, પોસ્ટ, ફોટો અને વીડિયો અથવા સમાચાર હોય, તો તેની સત્યતા જાણવા માટે તમે અમને અમારા વોટ્સઅપ ફેક્ટલાઈન નંબર (9049053770) પર મોકલો. અમારા લેટેસ્ટ ફેક્ટ ચેક વાંચવા માટે Facebook, Instagram અને Twitter પર Fact Crescendoને ફોલો કરો.)
Title:જાણો મનમોહનસિંહ અને સોનિયા ગાંધીના વાયરલ થઈ રહેલા વીડિયોનું શું છે સત્ય….
Fact Check By: Vikas VyasResult: False
