કેપ્ટન અંશુમન સિંહની પત્નીની તસવીર પર અભદ્ર ટિપ્પણી કરનાર વ્યક્તિને સુરક્ષા એજન્સીઓ હજુ સુધી પકડી શકી નથી. આ દરમિયાન સોશિયલ મીડિયા પર એક તસવીર વાયરલ થઈ રહી છે, જેમાં એક વ્યક્તિ બે પોલીસકર્મીઓ સાથે છે. આને શેર કરીને દાવો કરવામાં આવી રહ્યો છે કે, “પોલીસે સ્મૃતિ સિંહના ફોટા પર અભદ્ર ટિપ્પણી કરનાર વ્યક્તિની ધરપકડ કરી લીધી છે.”
શું દાવો કરવામાં આવી રહ્યો છે.?
સોશિયલ મીડિયા યુઝર્સ દ્વારા તારીખ 11 જૂલાઈ 2024ના એક પોસ્ટ શેર કરવામાં આવી હતી. આ પોસ્ટમાં દાવો કરવામાં આવ્યો હતો કે, “પોલીસે સ્મૃતિ સિંહના ફોટા પર અભદ્ર ટિપ્પણી કરનાર વ્યક્તિની ધરપકડ કરી લીધી છે.”
FACT CHECK
ઉપરોક્ત પોસ્ટમાં કરવામાં આવેલા દાવાની સત્યતા તપાસવી જરૂરી જણાતા અમે અમારી પડતાલ/તપાસ કાર્યવાહી શરૂ કરી હતી.
તપાસની શરૂઆતમાં અમે વાયરલ તસવીરને ગૂગલ ઈમેજ પર સર્ચ કરી હતી. પરિણામે, અમને DCP સેન્ટ્રલ દિલ્હી પોલીસ ના સત્તાવાર ‘X’ હેન્ડલ પર એક ટ્વિટ મળ્યું.
6 જુલાઈના રોજ કરવામાં આવેલ આ ટ્વિટમાં વાયરલ ફોટો હાજર છે. આ ટ્વિટમાં લખવામાં આવ્યું છે કે કસ્ટડીમાં જોવા મળેલા વ્યક્તિનું નામ મોહમ્મદ કાસિમ છે જેની સ્નેચિંગ કેસમાં ધરપકડ કરવામાં આવી હતી. દિલ્હી પોલીસ હેઠળના હૌઝ કાઝી પોલીસ સ્ટેશનની ટીમે આ ધરપકડ કરી છે. નીચેની ટ્વિટ જુઓ.
પ્રાપ્ત માહિતીનો સહારો લઈને અને વધુ સર્ચ કરતા અમને TV9ની વેબસાઈટ પર સમાચાર મળ્યા. 9 જુલાઈ 2023 ના રોજ પ્રકાશિત થયેલા અહેવાલ મુજબ, એક વ્યક્તિએ શહીદ કેપ્ટન અંશુમાન સિંહની પત્નીની કીર્તિ ચક્ર લઈ રહેલી તસવીર પર અભદ્ર ટિપ્પણી કરી હતી.
મામલો સામે આવ્યા બાદ લોકોએ વિરોધ કર્યો હતો. આ ઉપરાંત, રાષ્ટ્રીય મહિલા આયોગ (NCW)એ આને ગંભીરતાથી લીધું હતું અને દિલ્હી પોલીસને કેસ નોંધીને કડક કાર્યવાહી કરવાની અપીલ કરી હતી. દિલ્હી પોલીસના સ્પેશિયલ સેલે આ અંગે કેસ પણ નોંધ્યો હતો.
અહેમદ નામના આ યુઝરની ધરપકડ કરવાની માંગ ઉઠી છે. આ માંગ મહિલા આયોગ (NCW)ના અધ્યક્ષ રેખા શર્માએ પણ ઉઠાવી છે.
8 જુલાઈના રોજ NCWના સત્તાવાર એકાઉન્ટ પરથી એક ટ્વિટ કરવામાં આવી છે. જેમાં રેખા શર્માએ દિલ્હી પોલીસ કમિશનર સંજય અરોરાને પત્ર લખીને અભદ્ર ટિપ્પણી કરનાર વ્યક્તિની ધરપકડ કરવાની માંગ કરી છે.
અમે સ્પષ્ટતા માટે હૌઝ કાઝીના SHOનો સંપર્ક કર્યો. તેણે અમને કહ્યું કે વાયરલ દાવો ખોટો છે. સ્નેચિંગ કેસમાં વ્યક્તિની ધરપકડ કરવામાં આવી છે. તેમને અભદ્ર ટિપ્પણી કરવાના મુદ્દા સાથે કોઈ લેવાદેવા નથી.
પરિણામ
આમ, અમારી પડતાલમાં ઉપરોક્ત પોસ્ટ ખોટી સાબિત થાય છે. કારણ કે, વાયરલ ફોટોમાં દેખાતા આરોપીની સ્નેચિંગ કેસમાં ધરપકડ કરવામાં આવી છે. તેમને અભદ્ર ટિપ્પણી કરવાના મુદ્દા સાથે કોઈ લેવાદેવા નથી.
(જો તમારી પાસે પણ સોશિયલ મિડિયાના માધ્યમથી કોઈ શંકાસ્પદ મેસેજ, પોસ્ટ, ફોટો અને વિડિયો અથવા સમાચાર હોય, તો તેની સત્યતા જાણવા માટે તમે અમને અમારા વોટ્સઅપ ફેક્ટલાઈન નંબર (9049053770) પર મોકલો. અમારા લેટેસ્ટ ફેક્ટ ચેક વાંચવા માટે Facebook, Instagram અને Twitter પર Fact Crescendoને ફોલો કરો.)
Title:પોલીસ કસ્ટડીમાં જોવા મળેલો વ્યક્તિ એ આરોપી નથી જેણે શહીદ કેપ્ટન અંશુમન સિંહની પત્ની પર અભદ્ર ટિપ્પણી કરી હતી… જાણો શું છે સત્ય….
Written By: Frany KariaResult: False
