જાણો તાજેતરમાં દુબઈ ખાતે એર-શોમાં ક્રેશ થયેલા ભારતના તેજસ ફાઈટર પ્લેનના નામે વાયરલ થઈ રહેલા વીડિયોનું શું છે સત્ય…

તાજેતરમાં સોશિયલ મીડિયા પર ક્રેશ થયેલા ફાઈટર પ્લેનનો એક વીડિયો વાયરલ થઈ રહ્યો છે જેની સાથે એવો દાવો કરવામાં આવી રહ્યો છે કે, તાજેતરમાં દુબઈ ખાતે એર-શોમાં ભારતનું તેજસ ફાઈટર પ્લેન ક્રેશ થયું તેનો આ વીડિયો છે. પરંતુ ફેક્ટ ક્રેસેન્ડોની પડતાલમાં આ દાવો ખોટો હોવાનું સાબિત થાય છે કારણ કે, પોસ્ટમાં ક્રેશ થયેલા ફાઈટર પ્લેનનો જે વીડિયો મૂકવામાં આવ્યો છે એ તાજેતરનો નહીં પરંતુ ઓગસ્ટ 2025માં પોલેન્ડ ખાતે ક્રેશ થયેલા ફાઈટર પ્લેનનો છે. આ વીડિયોને ભારતના તેજસ ફાઈટર પ્લેન કે દુબઈ એર-શો સાથે કોઈ જ સંબંધ નથી. આ વીડિયો સોશિયલ મીડિયા પર ખોટી માહિતી સાથે લોકોને ગેરમાર્ગે દોરવા વાયરલ કરવામાં આવી રહ્યો છે.

શું દાવો કરવામાં આવી રહ્યો છે.?

એક સોશિયલ મીડિયા યુઝર દ્વારા 22 નવેમ્બર, 2025ના રોજ એક પોસ્ટ શેર કરવામાં આવી હતી. પોસ્ટમાં મૂકવામાં આવેલા વીડિયોના શીર્ષકમાં એવું લખવામાં આવ્યું છે કે, દુબઈ એર સોમા તેજસ ક્રેશ. આ લખાણમાં એવો દાવો કરવામાં આવી રહ્યો છે કે તાજેતરમાં દુબઈ ખાતે એર-શોમાં ભારતનું તેજસ ફાઈટર પ્લેન ક્રેશ થયું તેનો આ વીડિયો છે.

Facebook Post | Archive

FACT CHECK

ઉપરોક્ત પોસ્ટમાં કરવામાં આવેલા દાવાની સત્યતા તપાસવી જરૂરી જણાતાં અમે અમારી પડતાલ/તપાસ કાર્યવાહી શરૂ કરી હતી. તપાસની શરૂઆતમાં અમે પોસ્ટમાં મૂકવામાં આવેલા વીડિયોને ધ્યાનથી જોયા બાદ વીડિયોનો એક સ્ક્રીનશોટ લઈ ગૂગલ રિવર્સ ઈમેજ દ્વારા સર્ચ કરતાં પોસ્ટમાં મૂકવામાં આવેલા આ જ વીડિયો સાથેના સમાચાર NBC News દ્વારા 29 ઓગસ્ટ, 20225ના રોજ અપલોડ કરવામાં આવ્યો હોવાની માહિતી પ્રાપ્ત થઈ હતી. આ વીડિયો સાથે એવી માહિતી આપવામાં આવી હતી કે, પોલેન્ડમાં એર શોની તૈયારીઓ દરમિયાન F-16 જેટ ક્રેશ થયું તે ક્ષણનો આ વીડિયો છે.

ઉપરોક્ત આ જ વીડિયો અને માહિતી સાથેના અન્ય સમાચાર પણ અમને પ્રાપ્ત થયા હતા. જે તમે અહીં જોઈ શકો છો. Times News | GMA Integrated News  

પરિણામ

આમ, અમારી પડતાલમાં ઉપરોક્ત પોસ્ટમાં કરવામાં આવેલો દાવો ખોટો હોવાનું સાબિત થાય છે કારણ કે, પોસ્ટમાં ક્રેશ થયેલા ફાઈટર પ્લેનનો જે વીડિયો મૂકવામાં આવ્યો છે એ તાજેતરનો નહીં પરંતુ ઓગસ્ટ 2025માં પોલેન્ડ ખાતે ક્રેશ થયેલા ફાઈટર પ્લેનનો છે. આ વીડિયોને ભારતના તેજસ ફાઈટર પ્લેન કે દુબઈ એર-શો સાથે કોઈ જ સંબંધ નથી. આ વીડિયો સોશિયલ મીડિયા પર ખોટી માહિતી સાથે લોકોને ગેરમાર્ગે દોરવા વાયરલ કરવામાં આવી રહ્યો છે. 

(જો તમારી પાસે પણ સોશિયલ મીડિયાના માધ્યમથી કોઈ શંકાસ્પદ મેસેજ, પોસ્ટ, ફોટો અને વીડિયો અથવા સમાચાર હોય, તો તેની સત્યતા જાણવા માટે તમે અમને અમારા વોટ્સઅપ ફેક્ટલાઈન નંબર (9049053770) પર મોકલો. અમારા લેટેસ્ટ ફેક્ટ ચેક વાંચવા માટે Facebook, Instagram અને Twitter પર Fact Crescendoને ફોલો કરો)