જાણો બાળકને ઢોર માર મારી રહેલી મહિલાના વાયરલ થઈ રહેલા વીડિયોનું શું છે સત્ય…

તાજેતરમાં સોશિયલ મીડિયા પર બાળકને ઢોર માર મારી રહેલી એક મહિલાનો વીડિયો વાયરલ થઈ રહ્યો છે જેની સાથે એવો દાવો કરવામાં આવી રહ્યો છે કે, એક મહિલા ગુસ્સામાં બાળકને ઢોર માર મારી રહી છે. પરંતુ ફેક્ટ ક્રેસેન્ડોની પડતાલમાં આ દાવો ખોટો હોવાનું સાબિત થાય છે કારણ કે, પોસ્ટમાં બાળકને ઢોર માર મારી રહેલી એક મહિલાનો જે વીડિયો મૂકવામાં આવ્યો છે એ જાણી જોઈને બનાવવામાં આવેલો વીડિયો છે. વીડિયોમાં દેખાઈ રહેલી મહિલાએ તેના પતિને સબક શીખવાડવા માટે આ વીડિયો બનાવવાનું નાટક કર્યું હતું. લોકોને ગેરમાર્ગે દોરવા માટે વીડિયોને ખોટી અને અધૂરી માહિતી સાથે સોશિયલ મીડિયા પર વાયરલ કરવામાં આવી રહ્યો છે.

શું દાવો કરવામાં આવી રહ્યો છે.?

એક ફેસબુક યુઝર દ્વારા 20 જુલાઈ, 2024 ના રોજ એક પોસ્ટ શેર કરવામાં આવી હતી. પોસ્ટમાં મૂકવામાં આવેલા વીડિયોના શીર્ષકમાં એવું લખવામાં આવ્યું છે કે, આ વિડીયો દરેક મિત્રો પર્સનલ તથા દરેક ગ્રુપ માં ફેલાવો કે તાત્કાલિક આ મહિલા (ડાકણ ) અને વિડિયો બનાવનાર બંને પોલીસ ના હાથ માં પકડી ને યોગ્ય કાર્યવાહી થઈ શકે….. આ વીડિયો સાથેના લખાણમાં એવો દાવો કરવામાં આવી રહ્યો છે કે, એક મહિલા ગુસ્સામાં બાળકને ઢોર માર મારી રહી છે.

Facebook Post | Archive

FACT CHECK

ઉપરોક્ત પોસ્ટમાં કરવામાં આવેલા દાવાની સત્યતા તપાસવી જરૂરી જણાતાં અમે અમારી પડતાલ/તપાસ કાર્યવાહી શરૂ કરી હતી. તપાસની શરૂઆતમાં અમે પોસ્ટમાં મૂકવામાં આવેલા વીડિયોને ધ્યાનથી જોયા બાદ તેનો એક સ્ક્રીનશોટ લઈને સર્ચ કરતાં અમને પોસ્ટમાં મૂકવામાં આવેલા આજ વીડિયો સાથેના સમાચાર ઈન્ડિયા ટીવી દ્વારા 18 જુલાઈ, 2024 ના રોજ પ્રસારિત કરવામાં આવ્યા હોવાની માહિતી પ્રાપ્ત થઈ હતી. જેમાં એવી માહિતી આપવામાં આવી હતી કે, ઉત્તરાખંડના રુડકીના જેબરડા ખાતે બનેલી ઘટનાનો આ વીડિયો છે. 

ઉપરોક્ત સમાચારમાં વાયરલ વીડિયોમાં દેખાઈ રહેલી મહિલાએ પોલીસને જણાવ્યું કે, છેલ્લા 10 વર્ષથી તેનો તેના પતિ સાથે વિવાદ ચાલી રહ્યો છે અને પતિ ન તો ઘરે રહે છે અને ન તો પૈસા મોકલે છે. તે ઘણા સમયથી ઘરે આવ્યો નથી. મહિલા દુકાનમાં કામ કરીને ઘરનો ખર્ચ માંડ માંડ ચલાવે છે. તેના પતિને ડરાવવા અને ઘરની જવાબદારીઓ તરફ ધ્યાન કેન્દ્રિત કરવા માટે, તેણે લગભગ 2 મહિના પહેલા તેના મોટા પુત્ર સાથે આ વીડિયો બનાવ્યો હતો અને તેને તેના પતિને મોકલ્યો હતો, ત્યારબાદ તેના પતિએ તેને સોશિયલ મીડિયા પર વાયરલ કર્યો હતો. મહિલાએ કહ્યું કે, માર મારતી વખતે તેણે માત્ર બાળકની છાતી પર માથું રાખવાનું નાટક કર્યું હતું પરંતુ બાળકને બચકું નહતું ભર્યું કે કોઈ રીતે ઈજા પહોંચાડી ન હતી.

અમારી વધુ તપાસમાં અમને આ ઘટના અંગે ઉત્તરાખંડ પોલીસ દ્વારા 17 જુલાઈ, 2024 ના રોજ કરવામાં આવેલી ટ્વિટ પણ પ્રાપ્ત થઈ હતી.

हरिद्वार क्षेत्रान्तर्गत झबरेड़ा में महिला द्वारा अपने बच्चे को निर्दयतापूर्वक पीटने संबंधी प्रसारित हो रहे वीडियो पर हरिद्वार पुलिस द्वारा की गई कार्यवाही। pic.twitter.com/TLjKIGMOOo

— Uttarakhand Police (@uttarakhandcops) July 17, 2024

પોલીસે આ વીડિયો અંગે શું કહ્યું…?

જ્યારે આ કેસનો વીડિયો વાયરલ થયો ત્યારે ઉત્તરાખંડની હરિદ્વાર પોલીસની પ્રતિક્રિયા પણ આવી. વાયરલ વીડિયો પર પોલીસે જણાવ્યું કે, મહિલાનો તેના પતિ સાથે વિવાદ ચાલી રહ્યો હતો. તેનો પતિ ન તો ઘરે આવે છે અને ન તો તેને કોઈ જીવન ખર્ચ આપે છે. આવી સ્થિતિમાં પતિને ડરાવવા માટે મહિલાએ પોતાના જ બાળકને માર મારતો વીડિયો બનાવીને તેના પતિને મોકલી દીધો હતો. જે હાલ સોશિયલ મીડિયા પર વાયરલ થઈ રહ્યો છે. પોલીસે વધુમાં જણાવ્યું કે, આ વીડિયો બે મહિના જૂનો છે. મહિલા અને બાળકનું ‘પ્રથમ તબક્કાનું કાઉન્સેલિંગ’ આજે CWC સમક્ષ થયું હતું. 

पति से विवाद, घर न आने, खर्च न देने के चलते "अपने पति को डराने के लिए" अपने ही बच्चे को पीटने का वीडियो पति को सेंड करने का थाना झबरेड़ा का दो माह पुराना वीडियो आज सोशल मीडिया में वायरल हो रहा है।

महिला व बच्चे की आज 'पहले चरण की काउंसलिंग' CWC के समक्ष हुई है। pic.twitter.com/inZqWx190M

— Haridwar Police Uttarakhand (@haridwarpolice) July 17, 2024

મહિલાનું સતત કાઉન્સેલિંગ કરવામાં આવી રહ્યું છે

હાલમાં આ મામલો CWCની સમજ હેઠળ છે, જ્યાં મહિલાનું કાઉન્સેલિંગ કરવામાં આવી રહ્યું છે. તપાસ સમિતિએ મહિલાનો મોબાઈલ નંબર પણ લીધો છે. બાળકો સાથે પણ સમયાંતરે વાત કરવામાં આવશે અને કોઈપણ દિવસે મહિલાના ઘરે જઈને શારીરિક તપાસ કરવામાં આવશે. બીજી તરફ ઝાબરેડા પોલીસ પણ આ મામલે ચાંપતી નજર રાખશે. મહિલાના પતિની ભૂમિકાની પણ તપાસ કરવામાં આવી રહી છે.

ઉપરોકત આજ માહિતી સાથેના અન્ય સમાચાર પણ અમને પ્રાપ્ત થયા હતા. જે તમે અહીં જોઈ શકો છો. m.punjab.punjabkesari.in | vandebharatlivetvnews.com

પરિણામ

આમ, અમારી પડતાલમાં ઉપરોક્ત પોસ્ટમાં કરવામાં આવેલો દાવો ખોટો હોવાનું સાબિત થાય છે કારણ કે, પોસ્ટમાં બાળકને ઢોર માર મારી રહેલી એક મહિલાનો જે વીડિયો મૂકવામાં આવ્યો છે એ જાણી જોઈને બનાવવામાં આવેલો વીડિયો છે. વીડિયોમાં દેખાઈ રહેલી મહિલાએ તેના પતિને સબક શીખવાડવા માટે આ વીડિયો બનાવવાનું નાટક કર્યું હતું. લોકોને ગેરમાર્ગે દોરવા માટે વીડિયોને ખોટી અને અધૂરી માહિતી સાથે સોશિયલ મીડિયા પર વાયરલ કરવામાં આવી રહ્યો છે. 

(જો તમારી પાસે પણ સોશિયલ મીડિયાના માધ્યમથી કોઈ શંકાસ્પદ મેસેજ, પોસ્ટ, ફોટો અને વીડિયો અથવા સમાચાર હોય, તો તેની સત્યતા જાણવા માટે તમે અમને અમારા વોટ્સઅપ ફેક્ટલાઈન નંબર (9049053770) પર મોકલો. અમારા લેટેસ્ટ ફેક્ટ ચેક વાંચવા માટે Facebook, Instagram અને Twitter પર Fact Crescendoને ફોલો કરો)